ខេត្តរតនគិរី ៖ អាជ្ញាធរស្រុកកូនមុំ បានសម្រេច លុបស្រះទឹកមួយកន្លែង ដែលជាអំណោយរបស់ សម្តេចនាយករដ្ឋមន្ត្រី ហ៊ុន សែន ជីកឲ្យពលរដ្ឋប្រើប្រាស់ យកទៅធ្វើជាដីឡូត៍ ដើម្បីលក់យកលុយ ចែកគ្នាចាយ ហើយគេដឹងថា ស្រះទឹក
តំណាងប្រជាពលរដ្ឋ បានឲ្យដឹងថា អ្នកភូមិនៅស្រុកកូនមុំ ជាងមួយរយគ្រួសារ បានប្រើប្រាស់ទឹកស្រះនោះ ជាប្រចាំ ជាពិសេសនៅរដូវប្រាំង។ ប៉ុន្តែឥឡូវស្រះទឹក ដែលធ្លាប់ប្រើកន្លងមក ត្រូវលោកអភិបាលស្រុក គាត់ឲ្យគេចាក់ដី លុបយកធ្វើជាដីឡូត៍ លក់ឲ្យគេធ្វើផ្ទះ ទៅវិញ។ រឿងនេះមេភូមិ និងប្រជាពលរដ្ឋ បានសួរនាំរកមូលហេតុដែរ តែគាត់បំបិទសិទ្ធិ មិនឲ្យដេញដោល ពីរឿងនោះឡើយ ធ្វើឲ្យប្រជាពលរដ្ឋ ជាងមួយរយគ្រួសារ ប្រឈមនឹងការខ្វះទឹកប្រើប្រាស់ ហើយក៏មិនពេញចិត្ត និងការអភិវឌ្ឍន៍ របស់អភិបាលស្រុកនោះដែរ។
ប្រជាពលរដ្ឋ បានបន្តទៀតថា ស្រះនោះអាជ្ញាធរស្រុក គាត់នឹងអង្កន់ជាដីឡូត៍ ទំហំ ៤ទៅ៥ ម៉ែត្រ ហើយលក់ក្នុងមួយឡូត៍ តម្លៃ ១ម៉ឺន ទៅ ១ម៉ឺន ២ ពាន់ដុល្លា។ គាត់ដូចជាមិនបាន គិតគូរពីទុក្ខលំបាករបស់រាស្ត្រ ដែលការខ្វះទឹកប្រើប្រាស់ទេ សូម្បីតែស្រះនោះ ជាអំណោយរបស់សម្តេច ហ៊ុន សែន ក៏លក់អស់ដែរ។ ស្រះនោះអាជ្ញាធរ គួរតែរក្សាឲ្យគង់ ធ្វើរបងការពារទឹកឲ្យមាំទាំ ជូនរាស្ត្រប្រើប្រាស់ គ្រាន់បាននឹកគុណ ដល់សម្តេច តែផ្ទុយទៅវិញ អភិបាលស្រុក ព្រោះតែប្រយោជន៍ផ្ទាល់ខ្លួន អ្វីក៏ហ៊ានធ្វើដែរ ហើយទង្វើនោះ ដូចជាបង្ខំប្រជាពលរដ្ឋ នៅស្រុកកូនមុំ អោយបំភ្លេចគុណ របស់ សម្តេច។
លោក ស៊ុន សំ សមាជិកក្រុមប្រឹក្សា ស្រុកកូនមុំ ធ្លាប់ធ្វើការបំភ្លឺ អោយអ្នកសារព័ត៌មានដឹងថា កាលពីចន្លោះ ឆ្នាំ១៩៨៩ សម្តេចបានអញ្ជើញ មកស្រុកកូនមុំ ហើយគាត់បានស្នើសុំ សម្តេចឲ្យលោកជួយ ហើយដីដែលជីកស្រះនោះ ជាកម្មសិទ្ធិរបស់គាត់ ព្រោះឃើញតំបន់នេះ ខ្វះទឹកប្រើប្រាស់។ ការសម្រេចលុបស្រះ ទាំង ៣ខាងលើនោះ គឺលោកអភិបាលស្រុក ធ្វើឡើងដោយគ្មានបានពិភាក្សា ជាមួយក្រុមប្រឹក្សាស្រុក ឡើយ។ សូម្បីមេភូមិ មេឃុំ និងប្រជាពលរដ្ឋក៏មិនបានដឹង ពីមូលហេតុនៃការ លុបស្រះទឹកនោះ ក្នុងបំណងអ្វីដែរ ពេលសួរនាំគេ ទើបដឹងថា លុបធ្វើសួនច្បារ ហើយនៅសល់ គេពុះច្រៀកអង្កន់ ជាដីឡូត៍ហើយលក់ យកលុយ តែពុំដឹងយកទៅ កសាងអ្វីទេ។
បើឈរលើគោលការអភិវឌ្ឍន៍ គួរតែស្តារស្រះនោះឡើងវិញ ដើម្បីរក្សាកេរតំណែល របស់សម្តេច ហើយបានទឹក ឲ្យប្រជាពលរដ្ឋប្រើប្រាស់ ព្រោះអ្នកនៅកូនមុំ គេជីកអណ្តូងមិនចេញទេ រាល់ឆ្នាំមានតែ ប្រើទឹកស្រះហ្នឹង។ យ៉ាងនាក៏ដោយ លោក ឈឿន ចាន់ធាង អភិបាលស្រុកកូនមុំ បានអោយអ្នកសាព័ត៌មានដឹងថា ស្រះទឹកនោះ អត់មានទឹក ហើយនៅកៀកផ្លូវ នឹងបង្កគ្រោះថ្នាក់។ យើងបានលើកបញ្ហានេះ នៅក្នុងអង្គប្រជុំរួចហើយ ទើបសម្រេចលុប យកដីនោះដើម្បី អភិវឌ្ឍន៍ក្នុងស្រុក ហើយការលុបស្រះនេះ គឺដោយសារស្រះនោះ មិនមែននៅក្នុង បញ្ជីសារពើភណ្ឌ របស់រដ្ឋ។
លោកអភិបាលស្រុក បានបន្តទៀតថា យើងលក់បានលុយ មិនយកមកដាក់ហោប៉ៅឯណា គឺអភិវឌ្ឍន៍ធ្វើសួនច្បារមួយ នៅកណ្តាលដីនោះ ធ្វើផ្លូវកៅស៊ូ និងជីកស្រះថ្មី នៅខាងក្រោយចំនួន២ ហើយរៀបចំ ធ្វើអាងចម្រោះទឹក។ ការអភិវឌ្ឍន៍នោះ មិនបានសុំលុយពីរដ្ឋ មកធ្វើទេ ចំពោះវាមិនងាយបានអ្នកថា មិនពេញចិត្តគំរោងនេះ គឺជាមនុស្សឆ្កួត។ ទោះជាយ៉ាងនេះក្តីក្រុមប្រឹក្សាស្រុក នៅតែបន្តឆ្ងល់ថា បើលោកអភិបាលស្រុក ឈរលើគោលការអភិវឌ្ឍន៍មែន គួរតែរកកន្លែងផ្សេង ធ្វើការអភិវឌ្ឍទៅ ធ្វើយ៉ាងណាក៏បានដែរ មិនមែនដីនោះបានថ្លៃ ហើយទើបអភិវឌ្ឍន៍ ក្នុងរូបភាពអីចឹងទេ។
ម្យ៉ាងទៀតកន្លែងនេះ ជាអំណោយរបស់សម្តេច នាយករដ្ឋមន្ត្រី ជាអ្នកផ្តល់ឲ្យ ជាចំណងដៃដល់ ប្រជាពលរដ្ឋប្រើប្រាស់ទេ មិនត្រូវកែច្នៃទៅជា អ្វីផ្សេងឡើយ។ តំណាងប្រជាពលរដ្ឋជាង ១០០គ្រួសារ នៅស្រុកកូនមុំ សូមសំណូមពរ ឲ្យរាជរដ្ឋាភិបាល ជួយអន្តរាគមន៍ ក្នុងរឿងនេះដើម្បីរក្សាទុក ជាលក្ខណៈដើម ហើយព័ទ្ធរបង ការពារឲ្យគង់វង្ស និងសូមឲ្យអាជ្ញាធរពាក់ព័ន្ធជួយស្នើសុំលុយរដ្ឋ ស្តារស្រះនោះ ឲ្យមានទឹកគ្រប់រដូវកាល បានចែកប្រជាពលរដ្ឋ ប្រើដូចមុន។ ស្រះដែលលោកអភិបាលស្រុក ជីកថ្មីគឺអស់លុយ ហើយចំណាយពេលច្រើន អាចពុំមានអនាម័យ ព្រោះគេនឹងសង់ផ្ទះ រាប់សិបខ្នងនៅជាប់និងស្រះ ក្រោយពីទិញបាន ធ្វើជាកម្មសិទ្ធិរួចវាអាចបណ្តាលឲ្យ កាកសំណល់ផ្សេងៗ ធ្លាក់ឫរលួយហូរចូល ក្នុងប្រភពទឹក៕
No comments:
Post a Comment