លោកនាយកមន្រ្តីបានថ្លែងបែបនេះនៅក្នុងឱកាសខួបលើកទី៦៤នៃការបង្កើតគណបក្សប្រជាជនកម្ពុជា ថ្ងៃទី២៨ខែមិថុនា ឆ្នាំ២០១៥ ។
លោកនាយករដ្ឋមន្រ្តីបានថ្លែងថាគណបក្សប្រជាជនកម្ពុជាជាគណបក្សដែលរួមសុខរួមទុក្ខជាមួយប្រជាជន និងធ្វើអ្វីៗ ដើម្បីជាប្រយោជន៍ជាតិ ។ លោកបន្តថាគណបក្សប្រជាជនកម្ពុជាបានស្វែងរកសន្តិភាព និងការបង្រួបបង្រួមជាតិសម្រាប់ប្រទេសកម្ពុជា ។ លោកបន្ថែមថាគណបក្សប្រជាជនកម្ពុជាជាខឿននៃឯករាជ្យ អធិបតេយ្យ និងបូរណភាពទឹកដី ដោយប្រឆាំងនឹងការឈ្លានពានរបស់បរទេស ។
លោកហ៊ុន សែន បានថ្លែងនៅពេលបញ្ចប់នៃសុន្ទរកថារបស់លោកថា«គណបក្សប្រជាជនកម្ពុជាគាំទ្រពេញទំហឹងចំពោះការប្តេជ្ញាចិត្តមុះមុតរបស់រាជរដ្ឋាភិបាលក្នុងកិច្ចការពារអធិបតេយ្យជាតិ និងបូរណភាពទឹកដី ពិសេសការខិតខំដោះស្រាយបញ្ហាព្រំដែនជាមួយប្រទេសសជិតខាង ដោយឈរលើមូលដ្ឋានរដ្ឋធម្មនុញ្ញ ច្បាប់ជាតិ ច្បាប់អន្តរជាតិ និងឯកសារគតិយុត្តិពាក់ព័ន្ធនានា ដើម្បីកសាងខ្សែបន្ទាត់ព្រំដែនតែមួយជាមួយប្រទេសជិតខាង ទៅជាព្រំដែនស្ថិរភាព សន្តិភាព សហប្រតិបត្តិការ និងអភិវឌ្ឍ»។
តំណាងរាស្ត្រគណបក្សសង្គ្រោះជាតិដែលសកម្មក្នុងរឿងព្រំដែនលោក អ៊ុំ សំអាន ស្វាគមន៍ចំពោះប្រសាសន៍របស់នាយករដ្ឋមន្ត្រីដែលមានបំណង ដោះស្រាយបញ្ហាព្រំដែនជាមួយប្រទេសជិតខាង ជាពិសេសវៀតណាមដោយឈរលើគោលការណ៍ច្បាប់ ។ តែលោកថា ប្រសិនបើលោកនាយករដ្ឋមន្ត្រី មានឆន្ទៈដោះស្រាយបញ្ហាព្រំដែនពិតបាកដមែន រដ្ឋាភិបាលត្រូវលុបចោលសន្ធិសញ្ញាបំពេញបន្ថែម ២០០៥ ដោយលោកចាត់ទុកថា សន្ធិសញ្ញានេះជាហេតុផលចំបងដែលធ្វើឲ្យវៀតណាមអាចរំលោភអធិបតេយ្យភាពកម្ពុជា ។ យ៉ាងនេះក្តីលោកថា នៅសប្តាហ៍ក្រោយក្រុមតំណាងគណបក្សសង្គ្រោះជាតិប្រមាណ១០ រូប នឹងសរសេរលិខិតដាក់ទៅរដ្ឋាភិបាល ដោយស្នើឲ្យដាក់ពាក្យបណ្តឹងទៅតុលាការយុត្តិធម៌អន្តរជាតិ (ICJ)ជួយអន្តរាគមន៍ពីបញ្ហានេះ ។
សម្រាប់នាកយប្រតិបត្តិសហព័ន្ធនិស្សិតបញ្ញវ័នកម្ពុជាលោក ទិប ទាវ មានប្រសាសន៍ថា ជារឿងល្អមួយដែលលោកនាយករដ្ឋមន្ត្រី ប្រកាសពីជំហររបស់ខ្លួនក្នុងការការពារបូរណភាពទឹកដី ។ តែលោកថា លោកមិនទាន់មានជំនឿទៅលើការប្តេជ្ញារបស់នាយករដ្ឋន្ត្រីនោះទេ ដោយលោកសង្កេតឃើញថា កន្លងទៅលោកហ៊ុន សែន ធ្លាប់សន្យាការពារព្រៃឈើដែរ តែមិនមានប្រសិទ្ធភាព ។
គួរបញ្ជាក់ថា ថ្មីៗនេះ តំណាងរាស្រ្តគណបក្សសង្រ្គោះជាតិ១៥រូប បានប្រកាសទាមទារឲ្យរដ្ឋាភិបាលកម្ពុជាបង្កើតគណៈកម្មាធិការ ចម្រុះមួយ ដែលមានការចូលរួមពីគណបក្សមានអាសនៈក្នុងសភា និងអ្នកជំនាញពាក់ព័ន្ធ ដើម្បីអាចចូលរួមដោះស្រាយបញ្ហាព្រំដែនជាមួយប្រទេសវៀតណាម និងទាមទារឲ្យរដ្ឋាភិបាលយកករណីនេះទៅតុលាការយុត្តិធម៌អន្តរជាតិ។ ក្រុមតំណាងរាស្រ្តបានទាមទារឲ្យរដ្ឋាភិបាលបញ្ចេញផែនទីដែលប្រើដើម្បីបោះបង្គោលព្រំដែនជាមួយវៀតណាម និងទាមទារឲ្យរដ្ឋាភិបាលកម្ពុជាផ្អាកជាបណ្តោះអាសន្ននូវការបោះបង្គោលព្រំដែនជាមួយប្រទេសវៀតណាម រហូតដល់បង្កើតបានគណៈកម្មាធិការចម្រុះមួយសិន ។
កន្លងទៅ អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានអំពាវនាវឲ្យប្រជាជនគ្រប់និន្នាការនយោបាយ ជឿទុកចិត្តលើរដ្ឋាភិបាលកម្ពុជាក្នុងការដំណោះស្រាយលើ បញ្ហាព្រំដែនជាមួយប្រទេសវៀតណាម ៕
No comments:
Post a Comment