ការកោះប្រជុំនេះ ធ្វើឡើងបន្ទាប់ពីសមាជិក គ.ជ.ប ថ្មី មួយរូប គឺលោក រ៉ុង ឈុន បានទៅចូលរួមក្នុងពិធីទិវាពលកម្មអន្តរជាតិជាមួយសង្គមស៊ីវិលកាលពីថ្ងៃកាលពីថ្ងៃទី១ឧសភា ឆ្នាំ២០១៥ ។
ប្រធាន គជប លោក ស៊ិក ប៊ុនហុក ប្រាប់ដឹងនៅថ្ងៃនេះថា កន្លងទៅសមាជិក គជប ទាំងអស់មិនដែលចូលរួមក្នុងកម្មវិធីទិវាពលកម្មអន្តរជាតិបែបនេះទេ ព្រោះស្ថាប័ន គជប គឺជាស្ថាប័នឯករាជ្យ។ លោកបញ្ជាក់ថា លោកនឹងធ្វើលិខិតអញ្ជើញសមាជិក គ.ជ.ប ទាំងអស់ ឲ្យចូលរួមប្រជុំនៅថ្ងៃចន្ទទី៤ខែឧសភា វេលាម៉ោង៩ព្រឹកនៅស្ថាប័ននេះ ដើម្បីជជែកពីករណីលោក រ៉ុង ឈុន ថាតើទង្វើរបស់លោកធ្វើនោះ ត្រូវច្បាប់ ឬខុសច្បាប់កម្រិតណា ។
កាលពីថ្ងៃសុក្រម្សិលមិញ បក្សប្រជាជនកម្ពុជា បានចេញសេចក្តីថ្លែងការណ៍ ចោទប្រកាន់លោក រ៉ុង ឈុន សមាជិក គ.ជ.ប ថ្មី ដែលទៅចូលរួមទិវាពលកម្មអន្តរជាតិលកាលពីថ្ងៃសុក្រថា នាំឲ្យមានទំនាស់ផលប្រយោជន៍ និងប៉ះពាល់ដល់តម្លៃ គ.ជ.ប ដែលគណបក្សទាំងពីរប្តេជ្ញាថា នឹងធ្វើឲ្យស្ថាប័ននេះ ឯករាជ្យ និងអព្យាក្រិត្យ ។
ទោះជាយ៉ាងណា សេចក្តីថ្លែងការណ៍ដដែល មិនបានលើកពីច្បាប់ ឬបទបញ្ជាផ្ទៃក្នុងត្រង់មាត្រាមកបញ្ជាក់ថា ទង្វើរបស់លោក រ៉ុង ឈុន ពិតជាខុសនឹងច្បាប់នោះទេ ក្នុងឋានៈលោកជាសមាជិក គ.ជ.ប នោះ ។
ទោះជាយ៉ាងនេះក្តី លោក រ៉ុង ឈុន អះអាងថា លោកទៅចូលរួមទិវាពលកម្មអន្តរជាតិ គឺមិនទៅចូលរួមជាមួយគណបក្សសង្គ្រោះជាតិទេ ។ លោកបញ្ជាក់ថា ថ្ងៃនេះជាថ្ងៃឈប់សម្រាក លោកមានសិទ្ធិចូលរួមសកម្មភាពសង្គម ដែលច្បាប់មិនបានហាមឃាត់ទេ ។ លោកថា «វាមិនមានទំនាស់ផលប្រយោជន៍ អីទេ ព្រោះថ្ងៃនេះជាថ្ងៃឈប់សម្រាក ហើយខ្ញុំទៅក៏មិនមែនក្នុងនាមសមាជិក គជប ។ តែក្រៅម៉ោងរដ្ឋបាល មិនមែនជាសមាជិក គ.ជ.ប ហើយខ្ញុំក៏មិនបានជិះឡានរដ្ឋដែរ ។ ខ្ញុំជិះម៉ូតូ ឲ្យមិត្តភក្តិខ្ញុំឌុប» ៕
No comments:
Post a Comment