ទំនាស់ដីធ្លីទាំងនោះ ធ្វើឲ្យសហគមន៍ប្រជាពលរដ្ឋខ្មែរ និងជនជាតិដើមភាគតិចជាច្រើនអស់សង្ឃឹម ហើយមិនជឿជាក់លើការដោះស្រាយរបស់មន្ត្រីរដ្ឋាភិបាលទេ។ ពួកគេអស់សង្ឃឹម
ដោយសារគ្មានជំនឿលើការដោះស្រាយពីមន្ត្រីរដ្ឋាភិបាល និងអាជ្ញាធរមូលដ្ឋាននេះ។ ក្រុមសហគមន៍ទំនាស់ដីធ្លីខ្លះ បាននាំគ្នាធ្វើពិធីបន់ស្រន់ដាក់បណ្ដាសា និងខ្លះទៀតក៏នាំគ្នារៀបចំធ្វើវេទិកាសាធារណៈសម្ដែងកង្វល់ ជាដើម។
សហគមន៍ទំនាស់ដីធ្លីចំនួន៣ នៅស្រុករវៀង ខេត្តព្រះវិហារ បានចោទប្រកាន់អាជ្ញាធរ និងសមត្ថកិច្ចមូលដ្ឋាន ថាបានរារាំងមិនឲ្យប្រជាពលរដ្ឋជួបប្រជុំគ្នាធ្វើវេទិកាសាធារណៈទេ កាលពីព្រឹកថ្ងៃទី២៨ ខែឧសភា។
ក្រុមសហគមន៍ទាំងបីនោះ គឺមកពីឃុំរួសរាន់ ឃុំរតនៈ និងឃុំរៀបរយ នៃស្រុករវៀង ចម្ងាយជាង ៥០គីឡូម៉ែត្រភាគខាងត្បូងឆៀងខាងកើតពីទីរួមខេត្តព្រះវិហារ។
តំណាងសហគមន៍ទំនាស់ដីធ្លីនៅឃុំរួសរាន់ គឺលោក វង្ស សុខេងលី។ លោកអះអាងថា កាលពីព្រឹកថ្ងៃព្រហស្បតិ៍ ទី២៨ ខែឧសភា ប្រជាពលរដ្ឋប្រមាណ ៤៧០នាក់ ដែលមានទំនាស់ដីធ្លីជាមួយក្រុមហ៊ុនតៃវ៉ាន់ ភី.អិន.ធី (PNT) និងក្រុមហ៊ុនវៀតណាម ធីង៉ា (Thy Nga) បានប្រមូលផ្ដុំគ្នាធ្វើវេទិកាសាធារណៈ ក្នុងបំណងទាមទារឲ្យរដ្ឋាភិបាលប្រគល់ដីធ្លី និងធនធានធម្មជាតិមកឲ្យសហគមន៍ពួកគេវិញ។ បុរសដដែលបញ្ជាក់ថា រូបលោកផ្ទាល់បានធ្វើលិខិតអញ្ជើញអាជ្ញាធរឃុំ ស្រុក ឲ្យមកចូលរួមវេទិកាសាធារណៈនេះតាំងពីថ្ងៃទី២៣ ខែឧសភា ក៏ប៉ុន្តែនៅពេលដែលវេទិកាសាធារណៈចាប់ផ្ដើម បែរជាអាជ្ញាធរ និងសមត្ថកិច្ចមករារាំង។ លោក វង្ស សុខេងលី បង្ហាញជំហរថា បើទោះបីជាអាជ្ញាធរ និងសមត្ថកិច្ចរារាំងក៏ដោយ ក៏ប្រជាពលរដ្ឋជាច្រើននៅតែជម្នះនាំគ្នាធ្វើវេទិកានោះទាល់តែបាន៖ «ប៉ូលិសសមត្ថកិច្ចដែលការពារក្រុមហ៊ុនហ្នឹងមករារាំង មិនឲ្យប្រជាពលរដ្ឋធ្វើតែម្ដង នៅពេលប្រជាពលរដ្ឋលើករោងវេទិកាឡើង គេមកដោះរោងប្រជាពលរដ្ឋចេញ មិនឲ្យសង់ឡើងវិញទេ»។
ចំណែកអាជ្ញាធរមូលដ្ឋានវិញ បានចាត់ទុកវេទិកាសាធារណៈដែលធ្វើឡើងដោយសហគមន៍ទំនាស់ដីធ្លីនោះ ថាមិនមែនជាឆន្ទៈផ្លូវច្បាប់ពិតប្រាកដទេ។
អភិបាលស្រុករវៀង លោក ឯ សារ៉ូ បានបដិសេធថា អាជ្ញាធរមិនបានបញ្ជូនសមត្ថកិច្ចទៅរុះរើរោងវេទិកាសាធារណៈ ដូចដែលអ្នកភូមិចោទប្រកាន់នោះទេ គឺគ្រាន់តែបានបញ្ជូនកម្លាំងមួយចំនួនទៅឃ្លាំមើលក្បែរៗនោះប៉ុណ្ណោះ។ លោកអភិបាលស្រុករវៀង ចាត់ទុកវេទិកាសាធារណៈដែលរៀបចំដោយសហគមន៍ទំនាស់ដីធ្លីនោះ ថាគឺជាវេទិកាសម្ដែងមតិដោយគ្មានច្បាប់ និងគ្មានតំណាងត្រឹមត្រូវទេ ពីព្រោះលោកបានហៅឈ្មោះ វង្ស សុខេងលី ដែលធ្វើជាតំណាងប្រជាពលរដ្ឋក្នុងការរៀបចំវេទិកាមកសាកសួរ គឺវេទិកានោះមិនមែនរៀបចំដោយអង្គការណាឡើយ។ ដូច្នេះ ឈ្មោះ វង្ស សុខេងលី ដែលគ្រាន់តែជាប្រជាពលរដ្ឋម្នាក់ មិនមានលក្ខណៈផ្លូវច្បាប់គ្រប់គ្រាន់ធ្វើជាតំណាងប្រជាពលរដ្ឋ ដើម្បីរៀបចំវេទិកាសាធារណៈសម្ដែងមតិនោះទេ៖ «ហើយខ្ញុំបានធ្វើលិខិតមួយហាមឃាត់កុំឲ្យគាត់ធ្វើ។ ផ្ដាំតាមរយៈវិទ្យុអាស៊ីសេរី ថ្ងៃក្រោយបើសិនជាគាត់ចង់ធ្វើវេទិកា ឲ្យគាត់ធ្វើជាសំណើសុំមកក្រុមប្រឹក្សាឃុំ ឬក៏ស្រុកមក ដើម្បីក្រុមប្រឹក្សាឃុំ ឬក៏ស្រុក រៀបចំធ្វើវេទិកាឲ្យស្របតាមគោលការណ៍ តាមនីតិវិធីតែម្ដង»។
អាជ្ញាធរស្រុករវៀង សង្ស័យថា វេទិកាសាធារណៈដែលសហគមន៍ទំនាស់ដីធ្លីឃុំរួសរាន់ ឃុំរតនៈ និងឃុំរៀបរយ ប្រមូលផ្ដុំជួបជុំគ្នានោះ គឺរៀបចំដោយអង្គការពន្លកខ្មែរ ដែលមានមូលដ្ឋាននៅទីរួមខេត្តព្រះវិហារ។
ក៏ប៉ុន្តែ មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ បានបដិសេធថា វេទិកាសាធារណៈនោះ គឺមិនមែនអង្គការពន្លកខ្មែរជាអ្នករៀបចំទេ។ ទោះយ៉ាងណា លោក ប៉ិក សោភ័ណ បានចាត់ទុកសកម្មភាពរារាំងរបស់សមត្ថកិច្ចនោះ ថាគឺជាការអនុវត្តច្បាប់ផ្ទុយពីរដ្ឋធម្មនុញ្ញរបស់ប្រទេសកម្ពុជា៖ «ការរារាំងបែបនេះ គឺវាផ្ទុយពីរដ្ឋធម្មនុញ្ញ ជាពិសេសគឺឃើញថា បានរំលោភសិទ្ធិ និងគំរាមកំហែងដល់ពលរដ្ឋដែលរងគ្រោះដោយការរំលោភបំពានយកដីធ្លី»។
សមាគមការពារសិទ្ធិមនុស្សអាដហុក (adhoc) ឲ្យដឹងថា កាលពីព្រឹកថ្ងៃទី២៨ ខែឧសភា ដូចគ្នានេះ សមត្ថកិច្ចរបស់រដ្ឋាភិបាល ក៏បានបញ្ជូនកម្លាំងមួយចំនួនទៅរារាំងសហគមន៍ប្រជាពលរដ្ឋនៅឃុំសង្កែ២ ស្រុកឆែប មិនឲ្យជួបប្រជុំជាមួយអង្គការសិទ្ធិមនុស្សក្រៅរដ្ឋាភិបាល ដើម្បីផ្សព្វផ្សាយអំពីសិទ្ធិ ក៏ដូចជាផ្លូវច្បាប់មួយចំនួនទៀតដែរ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ មានប្រសាសន៍ថា កាលពីព្រឹកថ្ងៃទី២៨ ខែឧសភា លោកបានអញ្ជើញទៅចូលរួមបើកវគ្គផ្សព្វផ្សាយស្ដីពីសិទ្ធិ និងច្បាប់ នៅឃុំសង្កែ២ ស្រុកឆែប។ លោកថា មានសមត្ថកិច្ចខ្លះត្រូវបានបញ្ជូនទៅទីនោះ ដើម្បីហាមឃាត់មិនឲ្យដំណើរការកម្មវិធី។ លោក ឡោ ចាន់ បានចាត់ទុកសកម្មភាពរបស់សមត្ថកិច្ចដែលរារាំងមិនឲ្យប្រជាពលរដ្ឋទាំងនៅឃុំសង្កែ២ ស្រុកឆែប និងនៅឃុំរួសរាន់ ស្រុករវៀង បានជួបប្រជុំគ្នានោះ គឺជាការគាបសង្កត់ និងរំលោភទៅលើសិទ្ធិមនុស្ស៖ «នេះជាការដាក់សម្ពាធមួយយ៉ាងធ្ងន់ធ្ងរ ក៏ដូចជាការគំរាមកំហែងដោយប្រយោល។ អាហ្នឹងបើនិយាយទៅ គឺជាការបិទសិទ្ធិសេរីភាពក្នុងការទទួលបានព័ត៌មាន»។
សមាគមការពារសិទ្ធិមនុស្សអាដហុក សម្ដែងការព្រួយបារម្ភទៅលើបញ្ហាទំនាស់ដីធ្លីរវាងប្រជាពលរដ្ឋជាមួយក្រុមហ៊ុនដីសម្បទានសេដ្ឋកិច្ច ដែលកាន់តែកើនឡើងៗនៅខេត្តព្រះវិហារ ហើយអាជ្ញាធររដ្ឋាភិបាល ហាក់គ្មានគោលនយោបាយដោះស្រាយឲ្យសមរម្យជូនប្រជាពលរដ្ឋនោះ។ សមាគមការពារសិទ្ធិមនុស្សអាដហុក ឲ្យដឹងថា បច្ចុប្បន្នទំនាស់ដីធ្លីដែលក្តៅគគុកកំពុងកើតឡើងជាច្រើនកន្លែងនៅក្នុងស្រុកចំនួន៧ និងក្រុង១ ក្នុងខេត្តព្រះវិហារ៕
No comments:
Post a Comment