ម៉ោង១ និង៣០នាទីរំលងអាធ្រាត្រ ឈានចូលថ្ងៃទី៣០ មេសា ស្ថិតតាមបណ្តោយផ្លូវព្រះមុន្នីវង្សកែងផ្លូវលេខ២៧៨ សង្កាត់ទន្លេបាសាក់ ខណ្ឌចំការមន។
ប្រភពព័ត៌មានបានឲ្យដឹងថា បុរសដែលជាមន្ត្រីប៉េអឹមស្លៀកពាក់ស៊ីវិល មិនត្រូវបានស្គាល់ឈ្មោះទេ ជិះម៉ូតូមួយគ្រឿងម៉ាក HONDA CLICK ពណ៌ស អត់មានស្លាកលេខ ធ្វើដំណើរតាមបណ្តោយផ្លូវព្រះមុន្នីវង្ស ក្នុងទិសសដៅពីត្បូងទៅជើង ដោយមានធុំក្លិនស្រាផង ខណៈមកដល់ចំណុចផ្លូវកែង២៧៨ក៏ជួបប្រទះនឹងកំលាំងល្បាតរបស់អធិការដ្ឋានខណ្ឌចំការមនឃើញជិះម៉ូតូអត់មានស្លាកលេខបានហៅឱ្យឈប់ និងធ្វើការសួរនាំ បំរុងយកម៉ូតូទៅរក្សាទុកនៅអធិការដ្ឋានខណ្ឌចំការមន ស្រាប់តែបុរសរូបនោះបានអះអាងថា ខ្លួនជាអាវុធហត្ថ បើចង់យកម៉ូតូទៅណាចាំមេរបស់គេមកសិន ។
បន្ទាប់មកបុរសដែលជិះម៉ូតូអត់ស្លាកលេខបានទូរស័ព្ទឆ្វាត់ឆ្វែងហៅអ្នកមកអន្តរាគមន៍ ។ ប្រមាណ២០នាទីក្រោយទើបមានរថយន្តអាវុធហត្ថមានស៊ីរ៉ែនបើកមកដល់ និងមានបុរស២នាក់ចុះពីលើរថយន្តសួរថា យុទ្ធនាការចាប់ម៉ូតូដឹកនាំដោយនរណាគេ បន្ទាប់ពីសួរនាំរួចហើយទើបប្រាប់ឲ្យបុរសដែលជិះម៉ូតូអត់ស្លាកលេខយកទៅដោះស្រាយគ្នានៅអធិការដ្ឋានខណ្ឌចំការមនទាំងអស់គ្នា ។
បុរសដែលជិះម៉ូតូអត់ស្លាកលេខមិនត្រឹមតែអាងខ្សែប៉ុណ្ណោះទេ ថែមទាំងដេញចាប់អ្នកយកព័ត៌មានហាមមិនឲ្យថត គ្រាន់តែបើកម៉ាស៊ីនថតក៏ត្រូវបុរសរូបនោះដេញចាប់មិនឲ្យថតទេ។ ក្នុងហេតុការណ៍ខាងលើនេះមានអ្នករិះគន់ថា គ្រាន់តែរឿងប៉ុណ្ណឹងចាំបាច់ហៅខ្សែឱ្យមកជួយដែរ ការធ្វើរបៀបនេះមានន័យថា វប្បធម៌អាងខ្សែមកដោះស្រាយបញ្ហាអ្វីមួយនៅតែពេញនិយមសំរាប់ជនមួយចំនួនតូចដដែល ៕
No comments:
Post a Comment