លោកនាយករដ្ឋមន្ត្រី ហ៊ុន សែន ព្រមានដាក់ទោសមន្ត្រីណា ដែលឃុបឃិតជាមួយឈ្មួញ បន្ទាបតម្លៃកសិផលប្រជាពលរដ្ឋ។
«ឈ្មួញជិតៗគាត់(លោក ហ៊ុន សែន)ជាច្រើន ឧកញ៉ា មន្ត្រីបែងចែកកន្លែងគ្នា ទីតាំងទិញស្រូវពីប្រជាពលរដ្ឋ មិនឲ្យមានអ្នកណាចូលទិញបាន។ហើយបន្ទាបតម្លៃស្រូវប្រជាពលរដ្ឋ»។ លោក កែម ឡី កំពុងតែប្រាប់លោកនាយករដ្ឋមន្ត្រីថា ឈ្មួញដែលបន្ទាប់តម្លៃកសិផលរបស់កសិករ គ្មាននរណាក្រៅពីក្រុមឧកញ៉ាដែលនៅជិតលោកនោះឡើយ ។ អ្នកស្រាវជ្រាវបញ្ហាសង្គមរូបនេះមិននិយាយឈ្មោះឈ្មួញឲ្យចំដែលលោកអះអាងថា នៅក្បែរលោក ហ៊ុន សែន នោះទេ ដោយលោកទុកឲ្យពលរដ្ឋតាមមើលដោយខ្លួនឯង ។
ក្នុងពិធីបើកការដ្ឋានសាងសង់ផ្លូវជាតិលេខ៥៥នៅខេត្តពោ ធិ៍សាត់ លោកនាយករដ្ឋមន្ត្រី ហ៊ុន សែន ព្រមានចាត់ការមន្ត្រីណា ដែលឃុបឃិតជាមួយឈ្មួញ បន្ទាបតម្លៃកសិផលប្រជាពលរដ្ឋ។ ទន្ទឹមនឹងនេះប្រមុខរដ្ឋាភិបាលកម្ពុជា បានបញ្ជាឲ្យចៅហ្វាយខេត្តទាំងអស់ ចាត់វិធានការឲ្យបានម៉ឹងម៉ាត់ចំពោះបញ្ហាឈ្មួញនេះ។ ហើយលោក ក៏ជំរុញឲ្យពង្រឹងយន្តការ យកចិត្តទុកដាក់បន្ថែមទៀត លើការបញ្ជាទិញផលិតផលកសិកម្មផងដែរ។បើទោះជាមានការព្រមានចាត់វិធានការពីសំណាក់លោក ហ៊ុន សែន ក៏ដោយ តែវិធានបែបនេះ លោក កែម ឡី ជឿជាក់ថា មិនទាន់មានប្រសិទ្ធភាពសម្រាប់ការបង្កើនតម្លៃកសិផលប្រជាពលរដ្ឋនោះទេ។
អ្នកវិភាគរូបនេះពន្យល់យ៉ាងដូច្នេះថា៖ «ត្រឹមត្រូវហើយ ខ្ញុំគាំទ្រវិធានការរបស់លោក ហ៊ុន សែន ពេលនេះ។ តែយន្ដការនេះមិនទាន់មានប្រសិទ្ធភាពក្នុងការបង្កើនតម្លៃកសិផលនោះទេ។ ដើម្បីឲ្យមានបង្កើនតម្លៃកសិផលប្រជាពលរដ្ឋ រដ្ឋាភិបាលត្រូវលើកកម្ពស់សមាគមកសិករ សហករ និងបង្រៀនឲ្យពួកគេយល់ដឹង កាន់តែច្បាស់ពីតម្លៃផលិតផល។ ហើយនៅពេលពួកគេមានសមាគមកសិករច្រើន ពួកគេមិនមានការព្រួយបារម្ភពីការលក់ដូរផលិតផលពួកគេ។ បើឲ្យទាបពួកគេគឺមិនលក់» ៕
No comments:
Post a Comment