នៅពេលវិលត្រឡប់មកពីទីក្រុងគូឡាឡាំពួវិញ កាលពីថ្ងៃចន្ទ ប្រធានគណបក្សសង្គ្រោះជាតិ បានថ្លែងប្រាប់អ្នកយកព័ត៌មាន នៅអាកាសយានដ្ឋានអន្តរជាតិភ្នំពេញថា លោកមានបំណងជំរុញឲ្យមានការប្រាស្រ័យទាក់ទងទូលំទូលាយ ដែលមិនគ្រាន់តែក្នុងចំណោមមេដឹកនាំនយោបាយទេ ប៉ុន្តែក្នុងចំណោមប្រជាពលរដ្ឋកម្ពុជាផងដែរតាមរយៈការរៀបចំឡើងនូវសមាជជាតិ ជាវេទិកាសាធារណៈដូចកាលពីសម័យសម្តេច សីហនុ ដែលក្នុងសមាជនេះសាធារណជនអាចលើកពីបញ្ហាដោយផ្ទាល់ជាមួយអាជ្ញាធររបស់រដ្ឋ។ លោក សម រង្ស៊ី បន្តថា៖ «សមាជជាតិគឺស្ថិតក្នុងស្មារតីនៃ [វប្បធម៌សន្ទនា] ។ នៅសម័យសង្គមរាស្រ្តនិយម សម្តេច នរោត្តម សីហនុ មានបំណងឲ្យប្រជារាស្រ្តសាមញ្ញពីគ្រប់ខេត្ត និងក្រុង មកពិភាក្សាជាមួយនឹងព្រះអង្គ ដូច្នេះគាត់អាចស្តាប់ និងឈានដល់ដំណោះស្រាយ ។ យើងចង់បង្កើតទម្លាប់ថ្មី... ដើម្បីឲ្យលទ្ធិប្រជាធិបតេយ្យចាក់ឫស»។
លោកក៏បានបញ្ជាក់ផងដែរថា ថ្នាក់ដឹកនាំ និងឥស្សរជនត្រូវគោរពជនសាមញ្ញ ហើយអនុញ្ញាតឲ្យពួកគេសម្តែងនូវការមិនពេញចិត្តរបស់ខ្លួនទៅកាន់អ្នកកាន់អំណាច។
ទោះជាយ៉ាងណាលោក សុខ ឥសាន អ្នកនាំពាក្យគណបក្សប្រជាជន បានថ្លែងថា សមាជនេះមិនចាំបាច់ទេនៅក្នុងប្រទេសកម្ពុជា នៅសម័យទំនើបនេះ ព្រោះឥឡូវនេះ កម្ពុជាមានប្រព័ន្ធនយោបាយពហុបក្ស។
លោកបន្តថា៖ «ប្រជាជនដើរតាមនិន្នាការនយោបាយផ្សេងៗពីគ្នា តាមគណបក្សផ្សេងៗ ដូច្នេះ ការបង្កើតសមាជជាតិដែលស្រដៀងនឹងសមាជក្នុងសម័យសម្តេច សីហនុ មិនគួរបង្កើតឡើងទេ។ ប៉ុន្តែ ប្រសិនបើមេដឹកនាំមានឆន្ទៈ [បង្កើត] កម្មវិធីជួបជាមួយប្រជាជន និងដោះស្រាយបញ្ហា ពួកគេអាច [ធ្វើដូច្នេះ] បាន»។ លោក បន្ថែមទៀតថា លោក ហ៊ុន សែន បានជំរុញឲ្យមន្ត្រីបង្កើតវេទិកាបែបនេះ ក្នុងកិច្ចខិតខំប្រឹងប្រែងធ្វើកំណែទម្រង់រដ្ឋាភិបាលរបស់លោក។
លោកស្រី ជា វណ្ណាត អ្នកវិភាគនយោបាយឯករាជ្យ បានយល់ស្របថា រដ្ឋាភិបាលមិនគួរបង្កើតសមាជជាតិជាថ្មីទេ បើទោះបីជាដោយសារហេតុផលអ្វីក៏ដោយ ដោយលោកស្រីបានអះអាងថា សមាជនេះនឹងមិនសម្រេចបាននូវលទ្ធផលនៅក្នុងប្រទេសកម្ពុជា នាពេលនេះទេ ដោយសារតែជម្លោះដីធ្លីពាសពេញ ដែលត្រូវបានសម្រេចឲ្យអ្នកមាន និងអ្នកមានអំណាចឈ្នះ។ លោកស្រី បានថ្លែងថា៖ «នៅសម័យសម្តេចឪ [សីហនុ] ព្រះអង្គអាណិតប្រជារាស្រ្តណាស់ដែល មន្ត្រីណាដែលមានជម្លោះជាមួយនឹងប្រជារាស្រ្តនឹងត្រូវចាញ់»។ លោកស្រី វណ្ណាត ដែលបានរស់នៅឆ្លងកាត់របបជាច្រើន រួមទាំងសម័យសង្គមរាស្ត្រនិយមផងនោះបានបន្ថែមថា មេដឹកនាំសព្វថ្ងៃនេះ ត្រូវតែបង្ហាញថា ពួកគេមានគោលការណ៍របស់ខ្លួនស្របនឹងគោលការណ៍របស់មនុស្សសាមញ្ញ ដោយបញ្ហាផ្សេងៗដូចជា វិវាទដីធ្លី ត្រូវដោះស្រាយតាមរបៀបត្រឹមត្រូវ ដោយរដ្ឋាភិបាល។
ដំបូងឡើយ រដ្ឋធម្មនុញ្ញឆ្នាំ ១៩៩៣ របស់ប្រទេសកម្ពុជា បានបញ្ចូលបញ្ញត្តិស្តីពីសមាជជាតិប្រចាំឆ្នាំបើទោះបីជាបញ្ញតិ្តនេះត្រូវបានធ្វើវិសោធនកម្មកន្លងមកក៏ដោយ។ គ្មានសមាជត្រូវបានធ្វើឡើងក្រោមការគ្រប់គ្រងរបស់លោកនាយករដ្ឋមន្រ្តី ហ៊ុន សែន ទេ៕
No comments:
Post a Comment