លោក ប៉ិល ធី អាយុ ៤៣ ឆ្នាំបានឲ្យដឹងថា ពួក
លោក ១១ គ្រួសារជាប្រជាពលរដ្ឋរស់នៅក្នុងភូមិត្រាំប៉ោង ឃុំព្រះប្រឡាយត្រូវបានលោក ផេង ស៊ីផលប្តឹងទៅតុលាការខេត្តកាលពីឆ្នាំ ២០១៤ ពីបទ «ប៉ះពាល់ដីកម្មសិទ្ធិឯកជន» ២០ ហិកតា ហើយកាលពីថ្ងៃចន្ទម្សិលមិញ រូបលោក និងអ្នកភូមិ ៣ នាក់ផ្សេងទៀតបានចូលទៅបំភ្លឺតាមការកោះហៅ។
លោកបានបញ្ជាក់ថា៖ «ក្រុមនិស្សិតបានវាស់ដី និងចេញបង្កាន់ដៃឲ្យក្នុងឆ្នាំ ២០១២។ តែប្លងដីមិនទាន់បានផងរាប់ឆ្នាំហើយ បែរជាមានគេប្តឹងយកដីទៅតុលាការទៀត»។
លោក ប៉ិល ធី បានអះអាងថា ពួកលោកទាំង ១១ គ្រួសារ និងប្រជាជនចំណាកស្រុកផ្សេងៗបាននាំគ្នាទៅកាប់គាស់ដីដើម្បីរស់នៅ និងធ្វើស្រែចម្ការតាំងពីឆ្នាំ ២០០៤ មកម្ល៉េះ ដោយគ្មានអ្នកណាម្នាក់ទៅរារាំង និងអះអាងថាដីនោះជារបស់គេនោះទេ។ រហូតដល់ឆ្នាំ ២០១៤ ទើបមានមានឈ្មោះ ផេង ស៊ីផល ទៅប្តឹងពួកលោកតែម្តង ដោយអះអាងថា ដី ២០ ហិកតាដែលពួកលោកកំពុងកាន់កាប់អាស្រ័យផលនោះគឺជាដីរបស់គេក្នុងចំណោម ៤៩ ហិកតា។
លោក ប៉ិល ធី បានរៀបរាប់ប្រាប់ចៅក្រមស៊ើបសួរលោក កួន ចន្ថា និងព្រមទាំងបានបង្ហាញបង្កាន់ដៃដែលក្រុមនិស្សិតចេញឲ្យទៀត។ លោកបានអះអាងថា លោកចន្ថាបានសួរលោកថា «សុខចិត្តជាប់គុកទេ បើអត់ឲ្យដីគេ?»។
លោក ធី បានឆ្លើយប្រាប់វិញថា៖ «ខ្ញុំសុខចិត្តជាប់គុក ព្រោះអត់បានទៅលួចប្លន់គេទេគឺខំកាប់គាស់ខ្លួនឯងទាំងនឿយហត់។ ខ្ញុំអត់មានភ័យខ្លាចទេ តែអស់សំណើចទៅវិញដែលសុខៗមានគេមកប្តឹងបែបនេះ»។
ប្រជាពលរដ្ឋធ្លាប់បដិសេធមិនព្រមលក់ដីឲ្យទៅមេភូមិម្នាក់ក្នុង ១ ហិកតា ១០០ ដុល្លារហើយក្រោយមកក៏កើតមានការប្តឹងទៅតុលាការតែម្តង។ ក្រៅពីនោះលោក ប៉ិល ធី ក៏បានអះអាងផងដែរថា ពួកគាត់គឺស្ថិតក្នុងចំណោមប្រជាពលរដ្ឋប្រមាណជា ៥០០ នាក់ដែលសុខចិត្តដោះដូរដីឲ្យក្រុមយោធាដើម្បីធ្វើលំនៅឋានកាលពីឆ្នាំ ២០១១ បន្ទាប់ពីអាជ្ញាធរបានសន្យាផ្តល់ដីនៅកន្លែងផ្សេងម្នាក់ៗពីរហិកតាវិញ។ ប៉ុន្តែរហូតមកទល់ពេលនេះពួកគាត់ប្រហែលជា ២០០ នាក់មិនទាន់ទទួលបានដី ២ ហិកតាតាមការសន្យាទេ។
លោកស្រី ណារេន អ្នកសម្របសម្រួលអង្គការសិទ្ធិមនុស្សអាដហុកខេត្តឧត្តរមានជ័យបានឲ្យដឹងថា លោកកំពុងតែបន្តអង្កេតពីបញ្ហាដីធ្លីទាំងនោះ ហើយការអង្កេតកន្លងមកបានរកឃើញថា ប្រជាពលរដ្ឋភាគច្រើននៅក្នុងឃុំព្រះប្រឡាយ និងឃុំត្រពាំប្រាសាទមិនទាន់ទទួលបានប្លង់ដីដែលក្រុមនិស្សិតបានវាស់វែងឲ្យកាលពីមុនបោះឆ្នោតនោះទេ។ លោកថា៖ «មន្ទីរដែនដីខេត្តភាគច្រើនមិនទាន់ផ្តល់ប័ណ្ណដីដែលនិស្សិតវាស់ឲ្យពលរដ្ឋនោះទេ ដោយសារតែមិនធ្វើតាមនីតិវិធីទេ តែតាមអំណាច ឬបក្ខពួក ពុករលួយដែលធ្វើឲ្យប័ណ្ណមិនដល់ដៃប្រជាពលរដ្ឋ។ កន្លែងខ្លះមួយភូមិអត់ទាំងអស់ក៏មាន»។
លោកបានបន្ថែមថា ប័ណ្ណដីខ្លះត្រូវបានអាជ្ញាធរដកហូតវិញ ដោយអះអាងថាខុសបច្ចេកទេស ហើយចាំចុះពិនិត្យសាជាថ្មីម្តងទៀត។
ភ្នំពេញប៉ុស្តិ៍មិនអាចទាក់ទងលោក កួន ចន្ថា ចៅក្រមស៊ើបសួរ និងលោក គឹម គាវិន ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តឧត្តរមានជ័យដើម្បីសុំអត្ថាធិប្បាយបានទេកាលពីម្សិលមិញ។ រីឯលោក វ៉ាត ប៉ារ៉ានីន មន្ត្រីព័ត៌មានសាលាខេត្តឧត្តរមានជ័យជាប់ប្រជុំមិនធ្វើអត្ថាធិប្បាយបានទេ។
លោក អែម សាវឿន មេភូមិត្រាំប៉ោងបានដឹងថា ក្រុមនិស្សិត ពិតជាបានវាស់វែងដី និងចេញបង្កាន់ដៃជូនប្រជាពលរដ្ឋមែន។ ប៉ុន្តែប្លង់ដីមិនទាន់បានប្រគល់ឲ្យនោះទេ ដោយសារតែដីមានទំនាស់ និងពាក់ព័ន្ធច្រើនពេក។ លោកថា៖ «ដីខ្លះមានគេប្តឹងជំទាស់ ខ្លះថា វាស់មិនសុក្រឹត។ វាច្របូកច្របល់ណាស់។ អ៊ីចឹងទើបប្លង់មិនទាន់ចេញនោះ»៕
No comments:
Post a Comment