នៅតាមព្រំដែនកម្ពុជាវៀតណាមក្នុងខេត្តរតនគិរី។ ក្រុមមន្ដ្រីបានអះអាងថាចំណាត់ការនេះ គឺធ្វើឡើងដើម្បីការពារកុំឲ្យមានឧក្រិដ្ឋកម្មឆ្លងព្រំដែន រួមទាំង «អន្តោប្រវេសន៍ខុសច្បាប់»។ ប៉ុន្តែទាហាន ដែលត្រូវបានបញ្ជាឲ្យទៅនៅក្នុងព្រៃខេត្តរតនគិរី បានប្រាប់ភ្នំពេញប៉ុស្តិ៍ថា គោលដៅចម្បងគឺច្បាស់ណាស់ ចាប់ជនភៀសខ្លួនម៉ុងតាញ៉ា។ ចាប់តាំងពីខែតុលាមកជនជាតិម៉ុងតាញ៉ាកាន់សាសនាគ្រិស្តជាង ១០០ នាក់ ដែលជាជនជាតិភាគតិចពីតំបន់ខ្ពង់រាបកណ្តាលវៀតណាម បានប្រថុយជីវិតដោយឆ្លងដែនចូលមកក្នុងប្រទេសកម្ពុជាដើម្បីគេចពីការធ្វើទុក្ខបុកម្នេញក្នុងប្រទេសវៀតណាម។ ភាគច្រើនក្នុងចំណោមពួកគេបានចំណាយពេលជាច្រើនសប្តាហ៍នៅក្នុងព្រៃដោយគ្មានម្ហូបអាហារ និងឈឺថ្កាត់ ខណៈព្យាយាមប៉ុនប៉ងគេចពីអាជ្ញាធរដែលស្វែងរកចាប់ខ្លួន។ ពួកគេជាច្រើននាក់ត្រូវបានចាប់ខ្លួន និងបញ្ជូនត្រឡប់ទៅប្រទេសវៀតណាមវិញ ខណៈអ្នកខ្លះទទួលបានសុវត្ថិភាពមកដល់ភ្នំពេញដើម្បីស្វែងរកសិទ្ធិជ្រកកោន។ រហូតមកទល់ពេលនេះ មានម៉ុងតាញ៉ាតែ ១៣ នាក់ប៉ុណ្ណោះទទួលបានសិទ្ធិជនភៀសខ្លួន ហើយ ៤០ នាក់កំពុងស្ថិតក្នុងភាពមិនច្បាស់លាស់ ដោយកំពុងរង់ចាំនាយកដ្ឋានជនភៀសខ្លួនចុះបញ្ជីពួកគេ រីឯអ្នកដទៃទៀតនៅតែកំពុងលាក់ខ្លួនក្នុងព្រៃខេត្តរតនគិរីនៅឡើយ ដោយសង្ឃឹមថា អង្គការសហប្រជាជាតិនឹងទៅជួយសង្គ្រោះពួកគេ។ប៉ុន្តែក្តីសង្ឃឹមរបស់ជនស្វែងរកសិទ្ធិជ្រកកោនទាំងនោះ ហាក់បីដូចជាកំពុងងងឹតទៅៗ ខណៈរដ្ឋាភិបាលកំពុងព្យាយាមបញ្ឈប់មិនឲ្យមានការហូរចូលតាមរយៈការដាក់ពង្រាយកម្លាំងទាហាននៅតំបន់ព្រំដែននោះ។ នៅជិតផ្លូវដីក្នុងព្រៃព្រំដែន គេឃើញមានជម្រកបណ្តោះអាសន្នដែលសាងសង់ពីឈើ និងតង់ ដែលទាហានស្នាក់នៅ។
លោក រស្មី អាយុ ៤៨ ឆ្នាំ បានថ្លែងថា លោកបានមករស់នៅក្នុងព្រៃនេះអស់រយៈពេលមួយសប្តាហ៍ហើយ។ ដោយស្នាក់នៅតែប៉ុន្មានម៉ែត្រ ពីព្រំដែនវៀតណាមជាមួយទាហានដទៃៗទៀត ជំរំរបស់ក្រុមទាហានមើលទៅហាក់បីដូចជាបានរស់នៅអស់រយៈពេលជាច្រើនខែអ៊ីចឹង។ រស្មី ថ្លែងថា លោកត្រូវគេប្រាប់ថា បេសកកម្មសំខាន់បំផុតគឺ «បញ្ឈប់ជនជាតិម៉ុងតាញ៉ាមិនឲ្យឆ្លងចូលកម្ពុជា»។ លោកបន្តថា ចំណែកឯបទល្មើសផ្សេងទៀតគឺជាការផ្តោតពេលក្រោយ។
ក្រុមនេះបាននិយាយថា ពួកគេត្រូវបានថ្នាក់លើប្រាប់ឲ្យសម្របសម្រួលជាមួយនគរបាលមូលដ្ឋានប្រសិនបើឃើញជនម៉ុងតាញ៉ាឆ្លងចូលព្រំដែននៅទីតាំងផ្សេង។ ខណៈមានកាំភ្លើងវែងពីរដើមនៅពីក្រោយលោក រស្មីបាននិយាយថា ទាហាននឹងមិនប្រើហិង្សាទេ។ «យើងមិនមែនកំពុងស្វែងរកពួកគេទេ ប៉ុន្តែប្រសិនបើយើងឃើញពួកគេ យើងនឹងចាប់ពួកគេ ហើយបញ្ជូនពួកគេទៅឲ្យអាជ្ញាធរខេត្ត»។ ទោះយ៉ាងណាក្តីដូចទាហានដទៃទៀតដែលភ្នំពេញប៉ុស្តិ៍បាននិយាយជាមួយ លោក រស្មី ហាក់បីដូចជាមិនសប្បាយចិត្តជាមួយនឹងបេសកកម្មនេះទេ ជាអ្វីដែលលោកអះអាងថា ដោយសារមានសំណើពីរដ្ឋាភិបាលវៀតណាម។ លោកបានពន្យល់ថា លោកទៅទីនោះក្រោមបញ្ជាតឹងរ៉ឹង បើមិនដូច្នេះទេ លោកនឹងមិនទៅទេហើយនៅធ្វើចម្ការសម្រាប់រដូវភ្លៀវនេះវិញ ព្រោះជីវិតនៅក្នុងជំរំគឺជាការតស៊ូ។
លោកថ្លែងថា៖ «តង់មិនរឹងមាំខ្លាំងទេ នៅពេលភ្លៀង»។
លោកបន្ថែមថា ក្រុមរបស់លោកនឹងស្វែងរកសម្ភារមកធ្វើដំបូលឲ្យបានរឹងមាំ និងម៉ាស៊ីនភ្លើងមួយផងដែរ។
លោក David Manne នាយកនៅមជ្ឈមណ្ឌលជនភៀសខ្លួន និងអន្តោប្រវេសន៍ បានថ្លែងថា ចំណាត់ការណាក៏ដោយរបស់កម្ពុជា ក្នុងការ «រារាំងមិនឲ្យមានការការពារពីការធ្វើទុក្ខបុកម្នេញតាមរយៈការបញ្ជូនពួកគេត្រឡប់ទៅកន្លែងរងការធ្វើទុក្ខបុកម្នេញវិញគឺជាការរំលោភបំពានលើអនុសញ្ញាជនភៀសខ្លួន។ លោកបន្តថា៖ «គោលនយោបាយរារាំង និងបណ្តេញជនភៀសខ្លួនស្វែងរកការការពារគឺផ្ទុយនឹងស្មារតី បំណង និងកាតព្វកិច្ចក្នុងការអនុវត្តអនុសញ្ញាជនភៀសខ្លួន វាជាការបំពានសិទ្ធិ និងធ្វើឲ្យគ្រោះថ្នាក់ដល់ពួកគេ»។
លោកស្រី Wan-Hea Lee តំណាងប្រចាំប្រទេសនៃការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សបានថ្លែងថា ចំណាត់ការនេះនឹងលើកឡើងនូវសំណួរអំពីច្បាប់កម្ពុជា។ លោកស្រីថ្លែងបន្តថា៖ «ប្រទេសដែលចុះអនុសញ្ញាជនភៀសខ្លួនគឺមានកាតព្វកិច្ចអនុញ្ញាតឲ្យជនណាក៏ដោយដែលស្វែងរកសិទ្ធិជ្រកកោនមានលទ្ធភាពទទួលបាននីតិវិធីនៃការសុំសិទ្ធិជ្រកកោនរបស់ខ្លួន។ នីតិវិធីលម្អិតត្រូវបានកំណត់នៅក្នុងច្បាប់ជាតិ។ ដូច្នេះប្រសិនបើទាហានកម្ពុជាក្នុងខេត្តរតនគិរីត្រូវបានប្រាប់ឲ្យបញ្ឈប់ជនជាតិម៉ុងតាញ៉ាមិនឲ្យឆ្លងចូលព្រំដែនកម្ពុជាដែលពួកគេចង់ស្វែងរកសិទ្ធិជ្រកកោននោះការអនុវត្តរបស់កម្ពុជា ចំពោះអនុសញ្ញាអន្តរជាតិ និងច្បាប់ជាតិនឹងត្រូវចោទសួរជាសំណួរ»។
មន្រ្តីនៅក្រសួងមហាផ្ទៃ និងក្រសួងការបរទេស មិនអាចទាក់ទងសុំអត្ថាធិប្បាយបានទេកាលពីម្សិលមិញ៕
No comments:
Post a Comment