ប្រជាសហគមន៍ជនជាតិចារ៉ាយ ៤ នាក់ បានដាក់ពាក្យប្តឹងទៅអង្គការសិទ្ធិមនុស្សអាដហុក ខេត្តរតនគិរី ដើម្បីសុំអន្តរាគមន៍ទប់ស្កាត់សកម្មភាពខុសច្បាប់ និងដកក្រុមហ៊ុនកាប់បំផ្លាញព្រៃទាំងនោះចេញ។
លោក សល់ ហ្លប់ អាយុ ៣៦ ឆ្នាំ បានអះអាងពេលមកដាក់ពាក្យប្តឹងកាលពីម្សិលមិញថា ព្រៃសហគមន៍ទំហំ ជា ៩១០០ ហិកតា ដែលប្រជាសហគមន៍ប្រមាណ ៣០០ គ្រួសារក្នុងភូមិប៉ាតាង ភូមិភិ និងភូមិដល អាស្រ័យផលពីដូនតា ត្រូវក្រុមហ៊ុនឈ្មោះ ៧ មករា ផាវើរី ធ្វើការឈូសឆាយចាប់តាំងពីឆ្នាំ ២០១៤ មក អស់ជាង ៤ ហិកតា នៅក្នុងភូមិប៉ាតាងហើយលើសពីនោះឈើធំៗ នៅក្នុងព្រៃក៏ត្រូវកាប់ដឹកចេញទៅលក់ឲ្យឈ្មួញវៀតណាមដែរ។
លោក សល់ ហ្លប់ បញ្ជាក់ថា៖ «ថៅកែក្រុមហ៊ុនខ្មែរ តែកម្មកសុទ្ធតែវៀតណាមទាំងអស់។ គេឈូសព្រៃហើយកាប់សុក្រំ កកោះ ស្រឡៅ មុខកាត់ ៥ ទៅ ៦ តឹក ដឹកតាមទូកទៅលក់ឲ្យឈ្មួញវៀតណាម»។
លោកថា ក្រុមហ៊ុនធ្វើសកម្មភាពដោយគ្មានឲ្យដំណឹងមកសហគមន៍ និងអាជ្ញាធរមូលដ្ឋានឡើយ។ ក្រៅពីនោះក្រុមហ៊ុនបានគំរាម មិនឲ្យអ្នកភូមិចូលធ្វើចម្ការវិលជុំ ឬចូលរកអនុផលព្រៃឈើទៀតផង ហើយបើអ្នកណាហ៊ានចូលធ្វើចម្ការនោះ ក្រុមហ៊ុននិងប្តឹងឲ្យបង់ប្រាក់ ៥ ពាន់ដុល្លារ ក្នុង ១ ហិកតា បើអារឈើមួយដើម ត្រូវបង់ ៥០០ ដុល្លារអាមេរិក។
លោក សល់ ហ្លប់ បន្តថា៖ «ព្រៃសហគមន៍យើងសោះ តែឲ្យយើងបង់លុយឲ្យក្រុមហ៊ុនទៅវិញ។ អត់ហ៊ានចូលទេ តាំងពីគេគំរាមមក។ ថ្ងៃក្រោយកូនចៅមិនដឹងបានព្រៃពីណាទេ។ អ៊ីចឹងបានយើងឲ្យអង្គការជួយឲ្យដកក្រុមហ៊ុនចេញ»។
លោក សេវ មេភូមិភិ ក៏បានអះអាងដែរថា ក្រុមហ៊ុន ៧ មករាផាវើរី មិនទាន់ឈូសឆាយដីព្រៃសហគមន៍ក្នុងភូមិលោកទេប៉ុន្តែ ពួកគេបានកាប់គាស់ និងដុតព្រៃអស់ប្រមាណជា ៤ ហិកតា ដើម្បីដាំដុះដើមកៅស៊ូ។ លោកមេភូមិនិយាយថា៖ «ក្រុមហ៊ុនហាមមិនឲ្យយើងចូលអារឈើយកទៅធ្វើផ្ទះទេ។ គេថា ដីក្រុមហ៊ុនទាំងអស់ហ្នឹង គឺរាប់ម៉ឺនហិកតាឯណោះ។ បើអ៊ីចឹងមែន វាប៉ះពាល់ដីចម្ការទាំងអស់»។
លោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុកដែលទទួលពាក្យបណ្តឹងពីពលរដ្ឋឲ្យដឹងថា ដើមឈើធំប្រមាណ ២ ពាន់ដើមក្នុងព្រៃអារក្សតាំងពីដូនតារាប់ពាន់ឆ្នាំកន្លងមកត្រូវបានកាប់ហើយដឹកចេញតាមអំពើចិត្ត។ ប្រជាសហគមន៍ក្នុងភូមិប៉ាតាង ធ្លាប់បានធ្វើការតវ៉ា ៣ ដងហើយប្រឆាំងទៅនឹងការឈូសឆាយ និងកាប់ឈើនោះ។
លោកបន្តថា អាដហុកនឹងអន្តរាគមន៍ទៅអាជ្ញាធរខេត្ត និងមន្រ្តីរដ្ឋបាលព្រៃ ដើម្បីឲ្យធ្វើការត្រួតពិនិត្យលើបញ្ហានេះ។
លោក សេវ ស្វេន មេឃុំសេសានបានឲ្យដឹងដែរថា ក្រុមហ៊ុន ៧ មករាផាវើរីនេះពិតជាអត់មានផ្សព្វផ្សាយប្រាប់ ឬសហការជាមួយសហគមន៍ និងអាជ្ញាធរមូលដ្ឋានទេ បើទោះជាលោកធ្លាប់ក្រើនរំឭកមករួចហើយក្តី។
លោកថា រឿងទំនាស់រវាងប្រជាសហគមន៍ និងក្រុមហ៊ុននោះ អាជ្ញាធរស្រុកអូរយ៉ាដាវ បានកោះហៅភាគីដែលពាក់ព័ន្ធទៅជួបប្រជុំគ្នានៅថ្ងៃអង្គារនេះ។
ភ្នំពេញប៉ុស្តិ៍មិនអាចទាក់ទងក្រុមហ៊ុន សុំអត្ថាធិប្បាយបានទេ កាលពីម្សិលមិញ។ តែលោក ម៉ា វិចិត្រ អភិបាលស្រុកអូរយ៉ាដាវប្រាប់ថា ដីព្រៃសហគមន៍ គឺស្ថិតក្នុងស្រុក អណ្តូងមាស ប៉ុន្តែ ប្រជាសហគមន៍របស់លោកបានកាន់កាប់ និងអាស្រ័យផលយូរមកហើយ ដើម្បីដោះស្រាយបញ្ហានេះ មន្រ្តីនៅការិយាល័យអន្តរវិស័យនៅសាលាខេត្ត រតនគិរីនឹងសម្របសម្រួលជាមួយនឹងសហគមន៍ និងក្រុមហ៊ុននៅថ្ងៃអង្គារនេះ៕
No comments:
Post a Comment