ចៅក្រម អឿង សៀង នៃតុលាការកំពូលនៅព្រឹកថ្ងៃពុធនេះ បានអានសាលដីកាបដិសេធមិនឲ្យសកម្មជនគណបក្សសង្គ្រោះជាតិទាំងពីរនាក់បាននៅក្រៅឃុំ ប៉ុន្តែពុំបានបញ្ជាក់ពីមូលហេតុនៃការសម្រេចចិត្តនេះទេ ដោយអះអាងថា នៅក្នុងដីកានោះនឹងមានប្រាប់ពីមូលហេតុ ។
មេធាវីការពាររឿងក្តីគឺលោក ជូង ជូងី បានហៅការសម្រេចបន្តឃុំខ្លួនកូនក្តីរបស់លោកថា ជារឿងអយុត្តិធម៌ ព្រោះមិនមានភស្តុតាងដាក់បន្ទុកច្បាស់លាស់នោះទេ ។ លោកថា «ពេលដែលគាត់ទៅចូលរួមនៅស្ពាននាគនោះ គឺទី១ គាត់មិនមែនជាអ្នកដឹកនាំទេ ហើយទី២ ក្នុងអំពើហិង្សាដែលកើតឡើងនៅទីនោះ វាមិនមែនជារឿងកុបកម្មទេ វាជារឿងហិង្សាក្នុងបាតុកម្ម ហើយហិង្សាដែលកើតឡើងនោះ គឺជារឿងបុគ្គលផ្ទាល់ មិនមែនអ្នកណាមួយទៅដឹកនាំឲ្យមានហិង្សាទេ ហើយពេលដែលលោក មាជ សុវណ្ណារ៉ា ចូលរួមនោះ គឺគាត់អត់មានទៅញុះញ៉ង់ឲ្យគេប្រើអំពើហិង្សាទេ គឺគាត់ហាមឃាត់កុំឲ្យគេប្រើហិង្សា ហើយខ្លួនគាត់ក៏អត់មានប្រើហិង្សាទៅលើគេដែរ» ។
អនុប្រធានផ្នែកស៊ើបអង្កេតនៃសមាគម ការពារសិទ្ធិមនុស្សអាដហុកលោក ណៃ វ៉ង់ដា ដែលបានតាមដានករណីនេះមានប្រសាសន៍ថា វាជារឿងគួរឲ្យសោកស្ដាយ ដោយលោកចាត់ទុកថាការសម្រេចនេះ ស្ថិតក្រោមសម្ពាធនយោបាយ ។ លោកអំពាវឲ្យតុលាការកំពូល ពិចារណាឡើងវិញក្នុងការកាត់ក្តីឲ្យមានភាពយុត្តិធម៌ ។ លោកបញ្ជាក់ថា «ខ្ញុំគិតថា ការបន្តឃុំខ្លួនលោក មាជ សុវណ្ណារ៉ា នេះមិនមែនជារឿងចំនេញនយោបាយទេ ព្រោះប្រជាពលរដ្ឋខ្មែរអាចមើលឃើញកាន់តែច្បាស់ថា តុលាការខ្មែរនេះមិនមានឯករាជភាព ហើយឋិតនៅក្រោមសំពាធនយោបាយ» ។
លោក មាជ សុវណ្ណារ៉ា ថ្លែងថាការចោទប្រកាន់របស់តុលាការមកលើរូបលោកមិនសមហេតុផលឡើយ ។ តែលោកថា មានតែថ្នាក់ដឹកនាំនៃគណបក្សសង្គ្រោះជាតិ និងគណបក្សប្រជាជនកម្ពុជានោះទេ ដែលអាចអន្តរាគមន៍ជួយឲ្យលោកនៅក្រៅឃុំបាន ។ លោកថ្លែងថា «យើងឃើញថ្ងៃ៨ មីនា សិទ្ធិស្ត្រី យើងមានមនុស្សធម៌ហើយសម្រាប់កូនក្មេង សម្រាប់អ្នកមានផ្ទៃពោះ តែខ្លួនគាត់សុទ្ធតែប្រព្រឹត្តគ្រឿងញៀនសម្លាប់មនុស្ស បែរជានៅក្រៅឃុំ ហើយយើងជាអ្នកនយោបាយមានគុណធម៌ជាបញ្ញវន្តមួយរូប នៅស្រុកគេ ដែលយើងរៀនចេះដឹង ថាចង់មកជួយស្រុកខ្មែរ បែរជាគេឲ្យមនុស្សល្អៗត្រូវជាប់ទោស វាអយុត្តិធម៌ ។ ខ្ញុំសង្ឃឹមថា លោក ហ៊ុន សែន ចាស់ហើយ នឹងមានគុណធម៌សម្រាប់ក្មេងជំនាន់ក្រោយ»។
ប៉ុន្តែតំណាងរាស្ត្រគណបក្សសង្គ្រោះជាតិមណ្ឌលបាត់ដំបងដែលឃ្លាំមើលករណីនេះលោកស្រី មូរ សុខហួរ បញ្ជាក់ថាថា្នក់ដឹកនាំគណបក្សសង្គ្រោះជាតិ នឹងមិនមានជំនួបណាមួយក្នុងការចរចា ឬដោះដូរសកម្មជនបក្សរបស់ខ្លួនឡើយ ដើម្បីកុំឲ្យមានការគាបសង្កត់ពីបក្សកាន់អំណាច តែលោកស្រីអះអាងថា នឹងរកយុត្តិធម៌ជូនសកម្មជនទាំងនោះតាមនីតិវិធីច្បាប់ ។
គួររំឭកថា ក្រោយព្រឹត្តិការណ៍ហិង្សាក្បែរស្ពាននាគកាលពីថ្ងៃទី១៥ ខែកក្កដា ឆ្នាំ២០១៤ តុលាការ និងអាជ្ញាធរបានចាប់ខ្លួនតំណាងរាស្ត្រ និងសកម្មជនរបស់គណបក្សសង្គ្រោះជាតិជាបន្តបន្ទាប់ ប៉ុន្តែតំណាងរាស្ត្រ និងសកម្មជនមួយចំនួនត្រូវបានដោះលែងវិញ ក្រោយកិច្ចព្រមព្រៀងនយោបាយរបស់គណបក្សទាំងពីរកាលពីថ្ងៃទី២២ ខែកក្កដា ឆ្នាំ២០១៤ ដោយគណបក្សសង្គ្រោះជាតិព្រមចូលធ្វើការក្នុងសភា ៕
No comments:
Post a Comment