លិខិតមួយច្បាប់របស់រដ្ឋាភិបាលកម្ពុជាដែលបានផ្ញើជូនប្រធានរដ្ឋសភា ចំពោះសំណើរបស់លោក អ៊ុំ សំអាន តំណាងរាស្ត្របក្សប្រឆាំងមណ្ឌលសៀមរាប ដែលបានស្នើឲ្យរាជរដ្ឋាភិបាល អនុវត្តច្បាប់លុបបំបាត់ភាពមិនប្រក្រតីក្នុងការប្រើប្រាស់ស្លាកលេខរថយន្តខេមរភូមិន្ទ នគរបាលជាតិ និងស្លាកលេខរាជការនោះ បានរៀបរាប់លម្អិតពីរបៀបផ្តល់ស្លាកលេខនៅតាមស្ថាប័នមួយចំនួនដូចជា ក្រសួងការពារជាតិ ក្រសួងមហាផ្ទៃ និងស្លាកលេខរដ្ឋ។
លោកនាយករដ្ឋមន្ត្រី បញ្ជាក់ថា៖ «ការផ្តល់ស្លាកលេខពិសេសឲ្យអ្នកណាម្នាក់ សុទ្ធតែធ្វើត្រឹមត្រូវតាមច្បាប់»។
លិខិតបន្តថា រាជរដ្ឋាភិបាលអនុញ្ញាតដល់ការប្រើប្រាស់ស្លាកលេខខេមរភូមិន្ទ នគរបាល រដ្ឋ និងរាជរដ្ឋាភិបាល ក្នុងគោលដៅការពារជាតិ សន្តិសុខសណ្ដាប់ធ្នាប់សង្គម និងផលប្រយោជន៍សាធារណៈ។ ការចេញអាជ្ញាប័ណ្ណស្លាកលេខសម្គាល់យានជំនិះ អាចធ្វើទៅបានលុះត្រាតែយានយន្តទាំងនោះនាំចូលស្របច្បាប់ និងបានបង់ពន្ធត្រឹមត្រូវ។
លិខិតបញ្ជាក់ថា៖ «ក្នុងស្ថានភាពបច្ចុប្បន្នដែលរាជរដ្ឋាភិបាលពុំទាន់មានមធ្យោបាយសម្រាប់បំពាក់ជូនបានគ្រប់គ្រាន់បម្រើឲ្យវិស័យការពារជាតិ ការបរិច្ចាគយានជំនិះគ្រប់ប្រភេទពីសំណាក់សប្បុរសជនគឺជាការចាំបាច់ និងមានប្រយោជន៍ធំធេងក្នុងវិស័យការពារជាតិ»។
នៅក្នុងលិខិតនោះថា ក្រសួងការពារជាតិ ក្រសួងមហាផ្ទៃ និងក្រសួងសាធារណៈការនិងដឹកជញ្ជូនបានអនុវត្តយ៉ាងតឹងរ៉ឹងលើការស្នើសុំប្រើប្រាស់ស្លាកលេខខេមរភូមិន្ទ នគរបាលនិងរដ្ឋ ជាពិសេសរថយន្តផ្ទាល់ខ្លួនរបស់នាយទាហាន និងនាយនគរបាលជាតិ។
នៅក្នុងលិខិតថា៖ «ជារដ្ឋាភិបាលបានយកចិត្តទុកដាក់ខ្ពស់ក្នុងការលុបបំបាត់ ការប្រើប្រាស់ស្លាកលេខខេមរភូមិន្ទ នគរបាល និងរដ្ឋដែលក្លែងក្លាយ និងបានចាត់វិធានការនិងការដាក់ទោសទណ្ឌចំពោះអ្នកក្លែងបន្លំប្រើប្រាស់ ស្លាកលេខខេមរភូមិន្ទ នគរបាលនិងរដ្ឋ។ រាជរដ្ឋាភិបាល លើកទឹកចិត្តឲ្យប្រជាពលរដ្ឋចូលរួមរាយការណ៍អំពីករណីមិនប្រក្រតីនានានៃការប្រើប្រាស់ស្លាកលេខទាំងនោះ ដើម្បីចាត់វិធានការតាមផ្លូវច្បាប់»។
ឆ្លើយតបនឹងលិខិតនេះ អ្នកតំណាងរាស្ត្រគណបក្សសង្គ្រោះជាតិ លោក អ៊ុំ សំអាន មានប្រសាសន៍ថា លោកចាប់អារម្មណ៍ចំណុចមួយដែលថា សប្បុរសជនអាចបរិច្ចាគជាអំណោយដល់ក្រសួង ដែលនេះជាបញ្ហាមិនប្រក្រតី ពីព្រោះមានអ្នកខ្លះយករថយន្តទៅក្នុងក្រសួងមហាផ្ទៃមួយរយៈដើម្បីចុះបញ្ជីសារពើពន្ធ រួចយកមកប្រើប្រាស់ជាលក្ខណៈឯកជន យកទៅកាងរកស៊ីខុសច្បាប់។
លោកបានថ្លែងថា៖ «ការបង្រ្កាបចំពោះស្លាកលេខនេះ គឺឃើញមានមែន តែមានតិចតួចបំផុត»។
លោក អំ សំអាត មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សលីកាដូ បានថ្លែងថា កន្លងមកអ្នកដែលប្រើប្រាស់ ស្លាកលេខខេមរភូមិន្ទ នគរបាលនិងរដ្ឋ តែងតែយកទៅប្រើប្រាស់ខុសគោលការណ៍ច្បាប់ដែលបានកំណត់ពីព្រោះអ្នកប្រើប្រាសពុំបានយកទៅប្រើប្រាស់ក្នុងបេសកកម្មទេ គឺតែងតែយកទៅប្រើប្រាស់ដើម្បីប្រយោជន៍ផ្ទាល់ខ្លួន ប្រព្រឹត្តបទល្មើស ដូចជា ដឹកឈើខុសច្បាប់ អីវ៉ាន់គេចពន្ធជាដើម។
លោកបានថ្លែងថា៖ «រដ្ឋាភិបាលគួរតែចាត់វិធានការជាបន្ទាន់ បើពុំដូច្នេះទេធ្វើឲ្យប៉ះពាល់យ៉ាងធ្ងន់ធ្ងរទៅដល់កិត្តិយសរបស់ជាតិ»។
សូមរំឭកផងដែរថា កាលពី ថ្ងៃទី៦ ខែកុម្ភៈ ឆ្នាំ២០១៥ កន្លងមកលោក សៅ សុខា អគ្គមេបញ្ជាការកងរាជអាវុធហត្ថលើផ្ទៃប្រទេសបានស្នើឲ្យត្រួតពិនិត្យ យានយន្តយោធាដែលមានស្លាកលេខ ខ.ម គ្រប់ប្រភេទ៕
No comments:
Post a Comment