មិត្តអ្នកអានដែលដឹងរឿងស៊ីជម្រៅ បានរៀបរាប់ឲ្យដឹងថា នៅក្នុងរយៈពេល១-២ឆ្នាំកន្លងទៅនេះ អង្គភាពរដ្ឋាករទឹកស្វយ័តរាជធានីភ្នំពេញ បានធ្វើការដេញថ្លៃសម្ភារៈផ្សេងៗ និង ទឹកថ្នាំ PAC (Poly Aluminum Chloride) សម្រាប់យកមកលាយនៅក្នុងទឹកធ្វើឲ្យទឹកថ្លា ដោយនៅពេលដេញថ្លៃ គេបានកំណត់យកប្រភេទថ្នាំ Iron (Fe) 0.008 % ដែលមានកំរិតកាត់តិច (កាត់ទឹកឲ្យថ្លា) ដើម្បីដាក់លាយនៅក្នុងទឹក កុំឲ្យមានផលប៉ះពាល់ដល់អ្នកប្រើប្រាស់ ។ ប៉ុន្តែក្រោយពីក្រុមហ៊ុនដែលដេញថ្លៃផ្គត់ផ្គង់បាន ហើយក្រុមហ៊ុនធ្វើការផ្គត់ផ្គង់ថ្នាំខាងលើមកឲ្យខាងរដ្ឋាករទឹក គឺក្រុមហ៊ុនបែរជាយកប្រភេទថ្នាំ Iron (Fe) 0.3 % ដែលមានកម្លាំងជាតិកាត់ខ្លាំង មកផ្គត់ផ្គង់ឲ្យអង្គភាពរដ្ឋាករទឹក «ដោយធ្វើមិនត្រឹមត្រូវតាមបទដ្ឋានបច្ចេកទេស ដែលដាក់ឲ្យដេញថ្លៃនោះទេ» ហើយមន្ត្រីអង្គភាពដែលត្រូវរ៉ូវ និងឃុបឃិតគ្នា មិនបានបញ្ចេញប្រតិកម្មអ្វីនោះឡើយ គឺទទួលយកមកប្រើប្រាស់តែម្តង ដែលអំពើឃុបឃិតគ្នានេះបានធ្វើឲ្យគេដឹងថា ពួកគេបានសល់ប្រាក់លំអៀងពីការផ្គត់ផ្គង់ថ្នាំខុសពី គម្រោងដេញថ្លៃខាងលើនេះ ប្រមាណជិត ២០ម៉ឺនដុល្លារឯណោះ ព្រោះថ្នាំដែលមានជាតិកាត់ Iron (Fe) 0.008 % វាមានតម្លៃថ្លៃជាងថ្នាំដែលមានជាតិកាត់ 0.3% ។
រឿងដែលចម្លែកសម្រាប់នៅក្នុងការដេញថ្លៃផ្គត់ផ្គង់ថ្នាំខាងលើ នាឆ្នាំ ២០១៥-២០១៦ ខាងមុខនេះ ខណៈដែលក្រុមហ៊ុននានា បានត្រៀមដាក់ពាក្យចូលដេញថ្លៃដើម្បីផ្គត់ផ្គង់ថ្នាំ ដែលមានកម្លាំងជាតិកាត់ 0.3% ដូចអ្វីដែលរដ្ឋាករទឹកបានប្រើប្រាស់នាឆ្នាំកន្លងមក ស្រាប់តែថ្នាក់ដឹកនាំអង្គភាពរដ្ឋាករទឹកធ្វើការបដិសេធដោយកំណត់ឲ្យមានការដេញថ្លៃផ្គត់ផ្គង់ថ្នាំ ដែលមានជាតិកាត់ Iron (Fe) 0.008% វិញ ដោយបានលើកហេតុផលថា ជាតិកាត់ 0.3% មិនត្រឹមត្រូវតាមបច្ចេកទេស។
គេឆ្ងល់ថា បើដឹងថាថ្នាំដែលមានជាតិកាត់ 0.3% វាមានកម្លាំង និងកំរិតខ្លាំងធ្វើឲ្យប៉ះពាល់ដល់សុខភាពអ្នកប្រើប្រាស់ទឹកស្អាតដែរ ចុះហេតុអ្វីកាលពីឆ្នាំកន្លងៗមក ហេតុអ្វីបានជារដ្ឋាករទឹករាជធានីភ្នំពេញ អនុញ្ញាតឲ្យមានការប្រើប្រាស់ថ្នាំប្រភេទ 0.3% នេះទៅវិញ ។
អ្នកដឹងរឿងស៊ីជម្រៅបានឲ្យដឹងថា ថ្នាំដែលមានជាតិកាត់ខ្លាំង 0.3% នេះ នៅពេលដែលគេលាយចូលទៅក្នុងទឹកស្អាត ដើម្បីធ្វើឲ្យទឹករងថ្លា គឺវាមានកម្លាំងខ្លាំង អាចបំពង់ស៊ីយោធ្វើពីដែក ឬបំពង់ស៊ីយោជ័រ ដែលមានស្លែវានឹងកាត់ទៅជាកករ ហើយហូរតាមស៊ីយោទៅដល់អ្នកប្រើប្រាស់ ដែលធ្វើឲ្យប៉ះពាល់ដល់សុខភាពអ្នកប្រើប្រាស់ ទោះបីមិនប៉ះពាល់សុខភាពភ្លាមៗក៏ដោយ។ ប៉ុន្តែថ្នាំប្រភេទកាត់ខ្លាំងនោះ អាចនឹងធ្វើឲ្យយើងមានបញ្ហាសុខភាព នៅរយៈពេល ៤-៥ឆ្នាំខាងមុខ។
ដោយឡែកនៅប្រទេសថៃ និងប្រទេសវៀតណាម គេមិនប្រើប្រាស់ឡើយ ប្រភេទថ្នាំខាងលើនេះព្រោះវាធ្វើឲ្យប៉ះពាល់ ដល់សុខភាពអ្នកប្រើប្រាស់ប្រជាពលរដ្ឋរបស់គេ ដោយគេនៅប្រើប្រាស់សាច់ជូដើម្បីធ្វើឲ្យទឹករងថ្លានៅឡើយ ។
ខាងលើនេះ គឺគ្រាន់តែជាព័ត៌មានដែលមិត្តអ្នកអានអ្នកដឹងរឿងផ្ទៃក្នុងរបស់ រដ្ឋាករទឹកស្វយ័តរាជធានីភ្នំពេញ បានផ្តល់ព័ត៌មានមកឲ្យធ្វើការចុះផ្សាយដើម្បីមន្ត្រីមានសមត្ថកិច្ច និងក្រសួងពាក់ព័ន្ធជួយ ចុះធ្វើការស្រាវជ្រាវរកការពិតតែប៉ុណ្ណោះ។
ដោយឡែកមន្ត្រីទទួលខុសត្រូវផ្នែករដ្ឋាករទឹកស្វយ័តរាជធានីភ្នំពេញ អ្នកព័ត៌មានមិនអាចសុំការអត្ថាធិប្បាយបានឡើយ ពាក់ព័ន្ធទៅនឹងព័ត៌មានចោទប្រកាន់ខាងលើ ហើយអង្គភាពយើងខ្ញុំ នឹងរង់ចាំស្វាគមន៍ រង់ចាំការបំភ្លឺបកស្រាយជូនវិញជានិច្ច៕
http://everyday.com.kh/article/38454.html
No comments:
Post a Comment