កាលពីរសៀលថ្ងៃទី០៥ ខែមីនា ឆ្នាំ២០១៥ លោក ហ៊ុន សែន ជានាយករដ្ឋមន្ត្រីនិងជាអនុប្រធានគណបក្សប្រជាជនបានថ្លែងជាសាធារណៈថានៅក្នុងតំបន់អាស៊ី កម្ពុជាទទួលបានប្រាក់ចំណូលប្រចាំឆ្នាំតិចជាងគេ បើប្រៀបធៀបជាមួយប្រទេសក្នុងតំបន់។ ហ៊ុន សែន ថ្លែងបែបនេះនៅក្នុងសន្និសីទចក្ខុវិស័យប្រទេសកម្ពុជាឆ្នាំ២០១៥ ដោយបានលើកទ្បើងថា “យើងត្រូវខិតខំប្រឹងប្រែងបន្តទៀតព្រោះការប្រមូលចំណូលរបស់យើងនៅទាប បើប្រៀបធៀបជាមួយប្រទេសដទៃទៀតក្នុងតំបន់អាស៊ាននិងប្រទេសដែលមានកម្រិតអភិវឌ្ឍន៍ប្រហាក់ប្រហែលគ្នា”។ ជាងនេះទៅទៀតលោក ហ៊ុន សែន បានថ្លែងថាបើប្រៀបធៀបទៅនឹងប្រទេសក្នុងតំបន់គឺកម្ពុជាមានប្រាក់ចំណូលទាបជាងគេ គឺមានប្រាក់ចំណូលតែជាង១២ភាគរយ។
ទាក់ទងនឹងបញ្ហាខាងលើនេះក្រុមអ្នកតាមដានស្ថានភាពសេដ្ឋកិច្ចកម្ពុជានិងជីវភាពរស់នៅរបស់ប្រជាពលរដ្ឋកម្ពុជាបានឲ្យដឹងថាលោក ហ៊ុន សែន កំពុងទទួលស្គាល់នូវការដឹកនាំដ៏អសមត្ថភាពរបស់ខ្លួន ព្រោះរយៈពេលជាង៣០ឆ្នាំដែលហ៊ុន សែន ក្តោបក្តាប់អំណាចជានាយករដ្ឋមន្ត្រីមិនបានធ្វើឲ្យកម្ពុជាមានការរីកចម្រើនដូចប្រទេសជិតខាងនិងប្រទេសក្នុងតំបន់នោះទេ។ មកដល់ពេលនេះប្រទេសកម្ពុជាជំពាក់បំណុលបរទេសជាច្រើនពាន់លានដុល្លារ ហើយប្រទេសចិនបានក្លាយជាម្ចាស់បំណុលធំបំផុតសម្រាប់កម្ពុជា ដែលជាហេតុធ្វើឲ្យចិនមានឥទ្ធិពលនយោបាយនិងសេដ្ឋកិច្ចកាន់តែខ្លាំងលើកម្ពុជា។ អាចនិយាយបានថា ចិននិងយួនគឺជាអ្នកក្តោបក្តាប់សេដ្ឋកិច្ចកម្ពុជាស្ទើរតែទាំងស្រុង ហេតុនេះហើយទើបកម្ពុជាប្រមូលបានប្រាក់ចំណូលទាបជាងគេក្នុងឆ្នាំ២០១៤ ដែលបញ្ហានេះលោក ហ៊ុន សែន ជាអ្នកទទួលស្គាល់ដោយខ្លួនឯង។
បញ្ហាសំខាន់ដែលធ្វើឲ្យកម្ពុជាទទួលប្រាក់ចំណូលប្រចាំឆ្នាំទាបជាងគេក្នុងតំបន់អាស៊ីគឺបណ្តាលមកពីអំពើពុករលួយដែលរាលដាលកាន់តែខ្លាំងទ្បើងៗ ជាពិសេសអំពើពុករលួយរបស់ស្ថាប័នគយ ស្ថាប័នពន្ធដារ ក្រសួងសេដ្ឋកិច្ចនិងក្រសួងពាណិជ្ជកម្ម គឺជាកត្តាដែលធ្វើឲ្យប្រាក់ចំណូលប្រចាំឆ្នាំនៅមានកំរិត។ ហេតុនេះហើយទើបសេដ្ឋកិច្ចកម្ពុជានៅតែទន់ខ្សោយក្នុងខណៈដែលប្រជាពលរដ្ឋខ្មែររាប់លាននាក់ធ្វើចំណាកស្រុកទៅប្រទេសសៀម និងប្រទេសមួយចំនួនទៀត ដើម្បីរកការងារធ្វើនិងទទួលបានប្រាក់ចំណូលចិញ្ចឹមជីវិត។ ក្រុមអ្នកជំនាញសេដ្ឋកិច្ចបានរិះគន់ថា ដោយសារតែលោក ហ៊ុន សែន គ្មានជំនាញផ្នែកសេដ្ឋកិច្ច ហើយគិតគូរតែរឿងពង្រឹងអំណាច ពុករលួយ បក្ខពួកនិយម គ្រួសារនិយម ទើបសេដ្ឋកិច្ចកម្ពុជានៅតែមានសភាពដុនដាប បើប្រៀបធៀបទៅនឹងប្រទេសជិតខាង៕
No comments:
Post a Comment