ភ្នំពេញៈ ទោះជាប្រឈមនឹងការជំទាស់ដោយរាជរដ្ឋាភិបាលកម្ពុជាក៏ដោយ ក៏សហចៅក្រមស៊ើបអង្កេតអន្តរជាតិនៃសាលាក្តីខ្មែរក្រហម នៅថ្ងៃអង្គារនេះ បានធ្វើការចោទប្រកាន់អតីតមេដឹកនាំខ្មែរក្រហមចំនួនពីរនាក់ទៀត គឺឈ្មោះ អ៊ឹម ចែម និងមាស មុត ជាច្រើនករណី ក្នុងនោះក៏រួមមានបទប្រឆាំងនឹងមនុស្សជាតិផងដែរ ដែលនេះគឺជាការចោទប្រកាន់ជាផ្លូវការលើកដំបូង របស់ចៅក្រមនៃសវនាការកូនកាត់មួយនេះ។
សហចៅក្រមស៊ើបអង្កេត លោក Mark Harmon បានដាក់ឲ្យ មាស មុត ដែលជាអតីតមេបញ្ជាការកងទ័ពជើងទឹក ឲ្យស្ថិតក្រោមការត្រួតពិនិត្យ ដោយកំបាំងមុខ ពីបទឧក្រិដ្ឋ ក្នុងសំណុំរឿង ០០៣ រួមមានបទចោទ៖ មនុស្សឃាត ឧក្រិដ្ឋកម្មប្រឆាំងនឹងមនុស្សជាតិ អំពើអមនុស្សធម៌ផ្សេងទៀតដែលបានប្រព្រឹត្តក្នុងមន្ទីរសន្តិសុខ វត្ត ឥន្ទញាណ កំពង់សោម ក្រចេះ និងមន្ទីរសន្តិសុខ ស-២១ និងបានប្រព្រឹត្តលើជនជាតិវៀតណាម ជនជាតិថៃ និងជនបរទេសផ្សេងទៀតនៅដែនសមុទ្រ និងនៅលើកោះ ដែលកម្ពុជាប្រជាធិបតេយ្យបានអះអាងថា ស្ថិតនៅក្រោមអធិបតេយ្យរបស់ខ្លួន និងអំពើបំពារបំពានយ៉ាងធ្ងន់ធ្ងរទៅលើអនុសញ្ញា ទីក្រុងហ្សឺណែវ ឆ្នាំ១៩៤៩ (តាមរយៈការប្រព្រឹត្តបទឧក្រិដ្ឋដែលក្នុងនោះមាន ការឃុំខ្លួនជនស៊ីវិលដោយខុសច្បាប់ ការដកហូតដោយចេតនាពីឈ្លើយសឹក ឬជនស៊ីវិលនូវសិទ្ធិទទួលបានការកាត់ទោសដោយយុត្តិធម៌ និងទៀងទាត់ ការធ្វើមនុស្សឃាតដោយចេតនា ការនិរទេស ឬការផ្លាស់ទីដោយខុសច្បាប់ ការបង្កដោយចេតនាឲ្យមានរបួសធ្ងន់ធ្ងរ ឬឲ្យមានការឈឺចាប់ធ្ងន់ធ្ងរដល់រាងកាយ ឬសុខភាព និងការធ្វើទារុណកម្ម)។
ចំណែកឯ ជនសង្ស័យម្នាក់ទៀត អ៊ឹម ចែម ដែលជាអតីតចៅហ្វាយស្រុកព្រះនេត្រព្រះ ខេត្តបន្ទាយមានជ័យ និងធ្លាប់ធ្វើជាប្រធានគុក ភ្នំត្រយូង ដែលមានមនុស្សយ៉ាងតិច ៤០ ០០០ នាក់បានស្លាប់នៅក្នុងទសវត្សរ៍ ១៩៧០ ឲ្យស្ថិតក្រោមការពិនិត្យ ដោយកំបាំងមុខ ដូចគ្នា ពីបទឧក្រិដ្ឋក្នុងសំណុំរឿង ០០៤ រួមមានបទចោទ៖ មនុស្សឃាត ដែលជាការរំលោភបំពានក្រមព្រហ្មទណ្ឌកម្ពុជា ឆ្នាំ១៩៥៦ ដែលបានប្រព្រឹត្តនៅមន្ទីរសន្តិសុខភ្នំទ្រយោង និងការដ្ឋានស្ពានស្រែង ឧក្រិដ្ឋកម្មប្រឆាំងនឹងមនុស្សជាតិ ដែលក្នុងនោះមាន ការធ្វើមនុស្សឃាត ការសម្លាប់រង្គាល ការធ្វើឲ្យទៅជាទាសករ ការដាក់ក្នុងមន្ទីរឃុំឃាំង ការធ្វើទុក្ខបុកម្នេញដោយមូលហេតុនយោបាយ និងអំពើអមនុស្សធម៌ផ្សេងទៀតនៅមន្ទីរសន្តិសុខភ្នំទ្រយោង និងឧក្រិដ្ឋកម្មប្រឆាំងនឹងមនុស្សជាតិ ដែលក្នុងនោះមាន ការធ្វើមនុស្សឃាត ការធ្វើឲ្យទៅជាទាសករ ការដាក់ក្នុងមន្ទីរឃុំឃាំងអំពើអមនុស្សធម៌ផ្សេងទៀតនៅការដ្ឋានស្ពានស្រែង។
សូមបញ្ជាក់ថា ការចោទប្រកាន់អតីតមេដឹកនាំខ្មែរក្រហមទាំងពីរនេះ គឺធ្វើឡើងដោយឯកតោភាគី ដោយមិនមានការឯកភាពពីសហចៅក្រមជាតិ លោក យូ ប៊ុនឡេង នៅឡើយ ដែលធ្លាប់បានអះអាងថា រូបលោកកំពុងធ្វើការពិចារណាលើ់បទចោទ ប្រឆាំងនឹងជនសង្ស័យទាំងពីរនាក់នេះ ដែលជាករណី ០០៣ និង ០០៤ ដែលរាជរដ្ឋាភិបាលកម្ពុជាស្នើមិនឲ្យបន្តទៀត។
No comments:
Post a Comment