មេធាវី​បរទេស​គ្រោង​ដាក់​ភស្តុតាង​បន្ថែម​ជុំវិញ​បណ្ដឹង​ប្រឆាំង​រដ្ឋាភិបាល​លោក ហ៊ុន សែន

មេធាវី​ជនជាតិ​អង់គ្លេស លោក រីឆាដ រ៉ូជើរ (Richard Rogers) តំណាង​ពលរដ្ឋ​រងគ្រោះ​ក្រោម​របប​លោក​នាយករដ្ឋមន្ត្រី ហ៊ុន សែន គ្រោង​នឹង​ដាក់​ភស្តុតាង​បន្ថែម​ទៀត​ទៅ​ឲ្យ​ព្រះរាជអាជ្ញា​តុលាការ​ព្រហ្មទណ្ឌ​អន្តរជាតិ (ICC) ជុំវិញ​បណ្ដឹង​ប្រឆាំង​បទ​ឧក្រិដ្ឋកម្ម​ប្រឆាំង​នឹង​មនុស្សជាតិ ដែល​ប្រព្រឹត្ត​ឡើង​ដោយ​ក្រុម​អ្នក​មាន​អំណាច​ក្នុង​ជួរ​រដ្ឋាភិបាល។



ភស្តុតាង​ថ្មី​ដែល​គ្រោង​នឹង​ដាក់​នៅ​ថ្ងៃ​ពុធ ទី​២២ ខែ​កក្កដា នេះ ជា​បន្ទុក​បន្ថែម​ទៀត​លើ​ទៅ​ពាក្យ​បណ្ដឹង​កាល​ពី​ឆ្នាំ​២០១៤ ដែល​បាន​ស្នើ​ឲ្យ​តុលាការ​អន្តរជាតិ​ ស៊ើប​អង្កេត​បឋម​លើ​បណ្ដឹង​មួយ​ចោទ​ប្រកាន់​មន្ត្រី​ជាន់​ខ្ពស់​រដ្ឋាភិបាល កងកម្លាំងប្រដាប់អាវុធ និង​ពាណិជ្ជករ ស្និទ្ធ​នឹង​រដ្ឋាភិបាល​ដែល​រំលោភ​ដីធ្លី​ជា​ប្រព័ន្ធ​ក្នុង​រយៈពេល ១០​ឆ្នាំ​កន្លង​មក។

ភស្តុតាង​ថ្មី​នេះ​រួម​មាន​បទល្មើស​នៃ​ការ​រំលោភ​ដីធ្លី​បន្ត​កើន​ឡើង​កាល​ពី​ឆ្នាំ​២០១៤ និង​ឆមាស​ទី​មួយ​ឆ្នាំ​២០១៥។ សព្វថ្ងៃ​នេះ មាន​ពលរដ្ឋ​ប្រមាណ ៨៣០.០០០​នាក់ (ប្រាំបី​សែន​បី​ម៉ឺន) រង​ផល​ប៉ះពាល់​ដោយសារ​បញ្ហា​ដីធ្លី​ចាប់​តាំង​ពី​ឆ្នាំ​២០០០ មក។

បច្ចុប្បន្ន ព្រះរាជអាជ្ញា​នៃ​តុលាការ​ព្រហ្មទណ្ឌ​អន្តរជាតិ កំពុង​ពិនិត្យ​បណ្ដឹង​របស់​លោក រីឆាដ រ៉ូជើរ ប៉ុន្តែ​មិន​ទាន់​សម្រេច​ដាក់​បញ្ចូល​ឲ្យ​ចៅក្រម​ជំនុំជម្រះ​នៅ​ឡើយទេ៕