ស្តាប់សំឡេង៖ |
ចម្លងទុក |
នៅក្នុងកិច្ចប្រជុំរដ្ឋសភានៅព្រឹកនេះ លោក ហ៊ុន សែន បានខឹងសម្បារនឹងការលើកឡើងរបស់តំណាងរាស្ត្រគណបក្សសង្គ្រោះជាតិ ដែលចោទថាថា ប្រើផែនទីក្លែងក្លាយ ដើម្បីបោះបង្គោលព្រំដែនជាមួយវៀតណាម ។ លោកថា «ប្រធាន(លោក សម រង្ស៊ី)គ្រប់គ្រងបក្ស សមាជិកបក្សមិនបាន រហូតហ៊ានចោទថា រាជរដ្ឋាភិបាលប្រើផែនទីក្លែងក្លាយ អ្នកណាក្លែងក្លាយ អ្នកណាមិនក្លែងក្លាយ? និយាយគ្នាឲ្យច្បាស់ ធ្វើដល់រាជរដ្ឋាភិបាលមកប្រើផែនទីក្លែងក្លាយ? ស្នេហាជាតិអីតែលោកឯង ខ្ញុំបានឆ្លើយ[បំភ្លឺ]៥ម៉ោងជាង ទៅយកអាហ្នឹងមកមើលឡើងវិញ ឬក៏ត្រូវការឲ្យទូរទស្សន៍ជាតិជាក់ ទូរទស្សន៍ទាំងអស់ចាក់ឡើងវិញ ខ្ញុំស្នើឲ្យចាប់ផ្តើមពីល្ងាចហ្នឹងតែម្តង ចាក់ឡើងវិញ នូវអ្វីដែលខ្ញុំឆ្លើយនៅហ្នឹង(រដ្ឋសភា) ផែនទីពីណាអីពីណា កុំយកល្បែងក្មេងយកមកលេង ។ ឥឡូវខ្ញុំថា បើពិបាកពេក មានវិធីតែម្យ៉ាងគត់ គឺថាស្បថឲ្យរន្ទះបាញ់តែម្តង ខែនេះរន្ទះច្រើនណាស់» ។
លោក ហ៊ុន សែន បានប្រតិកម្មភ្លាមៗបែបនេះ ខណៈដែលលោក លិម គិមយ៉ា តំណាងរាស្ត្រគណបក្សសង្គ្រោះជាតិ បាននៅក្នុងពេលប្រជុំសភា ដោយជំរុញឲ្យរដ្ឋាភិបាល បង្ហាញពីតម្លាភាពលើការបោះបង្គោលព្រំដែន «តំណាងរាស្ត្រខ្លះស្នើសុំ ឲ្យឯកឧត្តម វ៉ា គឺមហុង បង្ហាញជាសាធារណៈផែនទីជាគោល ដើម្បីបោះព្រំដែន ដែលឯកឧត្តម វ៉ា គឺមហុង អត់បានធ្វើសោះ ។ ហើយដូច្នេះផែនទីនេះជាសិទ្ធិរបស់ប្រជាពលរដ្ឋយើងត្រូវដឹងពីការពុះព្រំដែនរបស់ប្រទេសយើង ហេតុនេះសូមសភាមេត្តាពិចារណាឲ្យបានដិតដល់ ពីការបាត់បង់បូរណភាពទឹកដីរបស់យើង ដែលយើងទាំងអស់គ្នាត្រូវតែការពារ» ។
សមាជិកក្រុមប្រឹក្សាឃ្លាំមើលកម្ពុជា លោក ម៉ៅ ពិសេស យល់ថា បញ្ហាព្រំដែនជាមួយវៀតណាមជារឿងថ្មីកំពុងតែកើតឡើងនេះ ដែលរដ្ឋាភិបាលត្រូវតែមានការបំភ្លឺឡើងវិញ ។ លោកថា «ព្រោះថាការលើកឡើងរបស់គាត់កាលពីមុននេះវាជារឿងមួយ ប៉ុន្តែឥឡូវនេះគឺមានការវិវត្តន៍ផ្សេងៗទៀត ចំពោះការរំកិលព្រំដែនពីសំណាក់ប្រទេសវៀតណាម ដូច្នេះយើងកំពុងតែរួញទៅៗហើយ កាលគាត់ថ្លែងការលើកមុន វាមិនទាន់ធ្ងន់ធ្ងរដល់ឃើញច្បាស់ផ្ទាល់ភ្នែកដូចឥឡូវ តែឥឡូវនេះយើងឃើញច្បាស់ផ្ទាល់ភ្នែក ហើយឃើញសកម្មភាពជាក់ស្តែងដែលមិនអាចប្រកែកបានថែមទៀត ។ អ៊ីចឹងទេ គាត់គួរតែចូលមកបំភ្លឺនៅសភាមួយសាទៀត ដើម្បីឲ្យវាមានបច្ចុប្បន្នភាពចំពោះព័ត៌មានដែលគាត់ទទួលបាន និងអ្វីដែលសង្គមស៊ីវិល ក៏ដូចជាខាងគណបក្សប្រឆាំងគេលើកឡើង ក៏ដូចជាបញ្ហារបស់ប្រជាពលរដ្ឋថ្មីៗនេះ គាត់អាចដឹងឮ និងយល់ដឹងកាន់តែច្បាស់ដែរ» ។
គួរបញ្ជាក់ថា ការកម្រើកឡើងវិញបញ្ហាព្រំដែននេះ គឺបន្ទាប់ពីតំណាងរាស្ត្របក្សប្រឆាំង បានផ្ញើលិខិតទៅប្រធានរដ្ឋសភា ឲ្យចេញកិច្ចអន្តរាគមន៍ទៅក្រសួងការបទេស ក្រោយពីបានចុះពិនិត្យផ្ទាល់នៅកន្លែងកើតហេតុ រកឃើញថាដំណាំ១០ហិកតារបស់កសិករខ្មែរ៩គ្រួសារនៅខេត្តត្បូងឃ្មុំ ត្រូវបានបំផ្លាញដោយអាជ្ញាធរវៀតណាម តែលោក ហោ ណាំងហុង អះអាងថា មកពីកសិករខ្មែរទៅដាំដំណាំលើដីវៀតណាម ។ ជាបន្តបន្ទាប់ពីមកទៀត តំណាងរាស្ត្រគណបក្សសង្គ្រោះជាតិ បានស្នើឲ្យលោក វ៉ា គឹមហុង ប្រធានគណៈកម្មាធិការព្រំដែនកម្ពុជាបង្ហាញផែនទីដែលយកមកប្រើសម្រាប់បោះបង្គោលព្រំដែនជាមួយវៀតណាម ដោយពួកគេអះអាងថា ការកំណត់ព្រំដែនកន្លងមកនេះធ្វើឲ្យមានការបាត់បង់ទឹកដីខ្លះទៅវៀតណាម បើតាមសន្ធិសញ្ញាបំពេញបន្ថែមឆ្នាំ២០០៥ ។ ប៉ុន្តែលោក វ៉ា គឹមហុង អះអាងថា សន្ធិសញ្ញានេះធ្វើឲ្យកម្ពុជាចំណេញបានប្រើខ្សែរទឹករួម ៕
No comments:
Post a Comment