បុរសរងគ្រោះស្លាប់បាត់បង់ជីវិតក្នុងគ្រោះថ្នាក់ក្រឡាប់គោយន្តនោះមានឈ្មោះ អ៊ុន យ៉ាន់ មកពីសហគមន៍ព្រៃឡង់ នៅឃុំរៀបរយ ស្រុករវៀង ខេត្តព្រះវិហារ ។ លោក អ៊ុន យ៉ាន់ និងអ្នករបួស១០នាក់នោះ បានធ្វើដំណើររួមគ្នា
ជាមួយប្រជាសហគមន៍ប្រមាណ៦០នាក់ផ្សេងទៀត បានធ្វើដំណើរទៅកាន់ទីរួមខេត្តព្រះវិហារ ក្នុងគោលបំណងទៅសម្តែងមតិជាមួយបណ្តាញសហគមន៍ផ្សេងៗទៀត មកពីទូទាំងខេត្តព្រះវិហារ ដើម្បីទាមទារឲ្យអាជ្ញាធរខេត្តដោះស្រាយបញ្ហាដីធ្លីរបស់ពួកគាត់ ។
ក្នុងចំណោមអ្នករបួសទាំង១០នាក់នោះ ៩នាក់កំពុងព្យាបាលនៅមន្ទីរពេទ្យខេត្តព្រះវិហារ និងម្នាក់មានរបួសធ្ងន់ត្រូវបានបញ្ជូនទៅព្យាបាលនៅមន្ទីរពេទ្យរុស្សីក្នុងរាជធានីភ្នំពេញ ។
សូមជម្រាបថា បញ្ហាទំនាស់ដីធ្លីរវាងប្រជាពលរដ្ឋ ទាំងជនជាតិដើមភាគតិច និងមិនមែនជនជាតិដើមភាគតិចជាមួយក្រុមហ៊ុនសម្បទានដីសេដ្ឋកិច្ច បានអូសបន្លាយជាច្រើនឆ្នាំ រហូតមកទល់ពេលនេះមិនទាន់មានដំណោះស្រាយណាមួយសមស្របតាមគោលការណ៍ច្បាប់នៅឡើយ ។
ប្រភពពីអង្គការសង្គមស៊ីវិលដែលតាមដានជម្លោះដីធ្លីនៅក្នុងខេត្តនេះលើកឡើងថា ប្រជាពលរដ្ឋបានដាក់ពាក្យបណ្តឹងទៅអាជ្ញាធរស្រុក ខេត្ត រហូតដល់ថ្នាក់ជាតិ ដោយស្នើសុំឲ្យមានការសិក្សាពីផលប៉ះពាល់ជាមុនសិន មុននឹងក្រុមហ៊ុនធ្វើការឈូសឆាយ តែអាជ្ញាធរមូលដ្ឋាន និងអាជ្ញាធរខេត្ត មិនត្រឹមតែមិនទប់ស្កាត់ការឈូសឆាយនោះទេ ថែមទាំងការពារក្រុមហ៊ុនឲ្យចូលឈូសឆាយថែមទៀត ដោយមិនស្តាប់ និងចាត់ការបណ្តឹងរបស់ប្រជាពលរដ្ឋ ដោយបានប្រើប្រាស់ប្រព័ន្ឋតុលាការ ដើម្បីដាក់សម្ពាធលើប្រជាពលរដ្ឋរងគ្រោះទៀតផង ៕
No comments:
Post a Comment