ក្នុងពិធីសម្ពោធផ្លូវជាតិលេខ៤១ ក្នុងខេត្តកំពង់ស្ពឺ កាលពីម្សិលមិញ លោកហ៊ុន សែនបានលើកឡើងថា ក្នុងតួនាទីរបស់លោកជានាយករដ្ឋមន្ត្រី លោកមិនដែលយកពន្ធដីធ្លីពីប្រជាពលរដ្ឋទេ។
លោកថ្លែងថា គណបក្សមួយនឹងប្រមូលពន្ធដីធ្លីប្រជាពលរដ្ឋ ដើម្បីគេអាចយកពន្ធទាំងនោះទៅដំឡើងប្រាក់បៀវត្សរ៍មន្ត្រីរាជការបាន។
ទោះជាយ៉ាងណា លោកមិនបាននិយាយឈ្មោះគណបក្សនោះទេ ប៉ុន្តែ គេដឹងថា លោកចង់សំដៅលើគណបក្សសង្គ្រោះជាតិ ដែលបានក្លាយជាគូប្រកួតយ៉ាងស្រួចស្រាល់ ជាមួយគណបក្សប្រជាជនដែលបានសន្យាដំឡើងប្រាក់បៀវត្សរ៍មន្ត្រីរាជការ និងកងកម្លាំងប្រដាប់អាវុធ នៅពេលខ្លួនឈ្នះឆ្នោត។
លោកហ៊ុន សែនបញ្ជាក់ថា៖ «គណបក្សមួយ ដែលចង់ឈ្នះឆ្នោត តែងតែសន្យាពី [ការដំឡើង] ប្រាក់បៀវត្សរ៍។ ឥឡូវនេះជំនាន់ខ្ញុំបានធ្វើជាង៣០ឆ្នាំហើយ មិនដែលយកពន្ធលើដីស្រែពីកសិករទេ សូម្បីតែមួយសេន។ ប៉ុន្តែខ្ញុំមិនធានាទេ...ប្រសិនបើ ហ៊ុន សែន មិនបន្ត...គេនឹងយកពន្ធ ទុកឲ្យយកទៅ។ នេះ [អ្នក] ចង់ផ្លាស់ប្តូរ»។
ប៉ុន្តែ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ កាលពីម្សិលមិញបានរំឭកប្រជាពលរដ្ឋពីសារនយោបាយរបស់គណបក្សសង្គ្រោះជាតិ ដោយលោកបញ្ជាក់ថា នៅពេលគណបក្សសង្គ្រោះជាតិឈ្នះឆ្នោត ខ្លួននឹងមិនយកពន្ធលើដីស្រែប្រជាពលរដ្ឋទេ ប៉ុន្តែ នឹងពិនិត្យលើការបង់ពន្ធដីសម្បទានរាប់ម៉ឺនហិកតា ដែលកាន់កាប់ដោយក្រុមហ៊ុនឯកជន។
លោកបញ្ជាក់ថា៖ «សារនយោបាយរបស់គណបក្សសង្គ្រោះជាតិ គឺនិយាយច្បាស់ហើយ គ្មានយកពន្ធលើដីប្រជាពលរដ្ឋទេ។ ទុកឲ្យប្រជាពលរដ្ឋវិនិច្ឆ័យ។ កុំប៉ះដីកសិករ គេគ្រាន់តែធ្វើស្រែចម្ការដើម្បីចិញ្ចឹមជីវិត ស្ទើរមិនចង់គ្រប់។ គណបក្សសង្គ្រោះជាតិ សម្លឹងមើលក្រុមហ៊ុនឯកជន ដែលកាន់កាប់ដីរាប់ម៉ឺនហិកតា។ យើងនឹងពិនិត្យថា តើក្រុមហ៊ុនទាំងនោះបង់ពន្ធគ្រប់គ្រាន់ ឬអត់?»។
លោក តឹក វណ្ណារ៉ា នាយកប្រតិបតិ្តនៃវេទិកាអង្គការមិនមែនរដ្ឋាភិបាល បានថ្លែងថា ទាំងរដ្ឋាភិបាលបច្ចុប្បន្ន និងរដ្ឋាភិបាលថ្មី នៅតែពិបាកដំឡើងប្រាក់បៀវត្សរ៍មន្ត្រីរាជការ ប្រសិនបើពួកគេមិនអាចលុបបំបាត់អំពើពុករលួយទេនោះ។
លោកបានបញ្ជាក់ថា៖ «រដ្ឋាភិបាលអាចដំឡើងប្រាក់បៀវត្សរ៍បាន ប្រសិនបើអាចលុបបំបាត់អំពើពុករលួយបាន ហើយមានអ្នកវិនិយោគល្អៗមកវិនិយោគ យើងអាចយកពន្ធ»៕
No comments:
Post a Comment