នេះជាលើកដំបូងហើយដែលរដ្ឋមន្ត្រីរូបនេះ បានចេញមុខបកស្រាយជាសាធារណៈពីបញ្ហាជម្លោះដីធ្លីដ៏រ៉ាំរៃរវាងក្រុមហ៊ុនខេឌីស៊ីរបស់ភរិយាលោក ជាមួយប្រជាពលរដ្ឋនៅសហគមន៍ឡពាង ឃុំតាជេស ស្រុកកំពង់ត្រឡាច កំពង់ឆ្នាំង ខណៈដែលលោកធ្វើសន្និសីទសារព័ត៌មាន ស្តីពីការប្រកាសដេញថ្លៃឲ្យក្រុមហ៊ុនបូមខ្សាច់ កាលពីថ្ងៃអង្គារម្សិលមិញ។
លោក ស៊ុយ សែម បានថ្លែងថា ក្រុមហ៊ុន ខេឌីស៊ី របស់ភរិយាលោក បានទិញដីនៅភូមិឡពាង និងភូមិជាង ១០ នៅក្បែរនោះតាំងពីឆ្នាំ ២០០៧ មក ដោយមានប័ណ្ណកម្មសិទ្ធិត្រឹមត្រូវ និងមានការទទួលស្គាល់ពីសុរិយាដីស្រុក និងខេត្ត ហើយចំណែកប្រជាពលរដ្ឋនៅភូមិឡពាង គឺមិនមានប័ណ្ណកម្មសិទ្ធិទេ។
ទោះយ៉ាងណាលោកថា ខាងក្រុមហ៊ុននៅតែចង់ដោះស្រាយ ដោយទិញដីថ្មីនៅតំបន់ក្បែរនោះ និងផ្តល់គោលនយោបាយជាប្រាក់កាក់ខ្លះជូនប្រជាពលរដ្ឋ។
លោក ស៊ុយ សែម បានបញ្ជាក់ថា៖ «ការចង់នៅកន្លែងដើមហ្នឹង វាអត់កើតទេ ព្រោះកន្លែងហ្នឹងគេចាត់ជាតំបន់ឧស្សាហកម្ម គេត្រៀមធ្វើជាតំបន់ឧស្សាហកម្ម យើងទៅចោះយកម៉េចកើត មានតែយកកន្លែងផ្សេងទៀត ហើយក្នុងពេលដែលគាត់អត់មានអីសោះ គាត់អត់មានប្លង់មានអីទេ គាត់ថាតែមាត់ទទេ ហើយយើងដោះស្រាយអ៊ីចឹងហើយ គាត់មិនព្រមទៀត ឲ្យយើងធ្វើម៉េចគាត់អត់មានអីទាំងអស់ គាត់លក់ដីហ្នឹងឲ្យគេអស់ហើយ»។
ជាមួយគ្នានេះដែរ លោក ស៊ុយ សែម បានលើកឡើងថា ការដែលជម្លោះដីធ្លីនៅឡពាងនេះនៅបន្តអូសបន្លាយរហូតមកដល់ពេលនេះ ដោយសារតែមានអង្គការអាដហុក និងអ្នកនយោបាយនៅពីក្រោយខ្នង ធ្វើការញុះញង់ និងបញ្ឆេះបញ្ហាជានិច្ចដែលធ្វើឲ្យពិបាកក្នុងការដោះស្រាយ។
តំណាងប្រជាពលរដ្ឋនៅភូមិឡពាង អ្នកស្រី អ៊ុំ សូភី បានច្រានចោល ចំពោះការលើកឡើងនេះ ហើយថា ក្រុមហ៊ុនរបស់ភរិយាលោក ស៊ុយ សែម ទៅវិញទេ ដែលឃុបឃិតជាមួយអាជ្ញាធរ លួចធ្វើប្លង់ក្លែងក្លាយ និងរឹបអូសយកដីធ្លីពីប្រជាពលរដ្ឋ ដែលបានរស់នៅចាប់តាំងពីឆ្នាំ ១៩៧៩ មក។
អ្នកស្រីថា៖ «ក្រុមហ៊ុនទេ ជាអ្នកប្លន់ដីរបស់ពួកខ្ញុំ ហើយបើឲ្យដីនៅតំបន់ផ្សេង ដែលពួកខ្ញុំអាចទទួលយកបាន គឺដីនោះត្រូវនៅជិតសាលារៀន មានទីផ្សារ សម្រាប់ពួកខ្ញុំ តែបើឲ្យទៅនៅឆ្ងាយរាប់គីឡូម៉ែត្រ ពួកខ្ញុំមិនទៅទេ។ អ៊ីចឹងខ្ញុំនឹងដាក់ពាក្យបណ្តឹងរហូតទាល់តែមានយុត្តិធម៌សម្រាប់ពួកខ្ញុំ មិនមែនមានយុត្តិធម៌សម្រាប់តែអ្នកមានលុយមានអំណាចទេ»។
ចំណែក ប្រធានផ្នែកដីធ្លីនៃសមាគមការពារសិទ្ធិមនុស្សអាដហុក លោក ឡាត់ គី បានសម្តែងការសោកស្តាយ និងចាត់ទុកការលើកឡើងរបស់រដ្ឋមន្ត្រីក្រសួងរ៉ែ ដែលថា សមាគមលោកនៅពីក្រោយខ្នងជម្លោះដីធ្លីនោះថា ជាការលាបពណ៌ខុសពីការពិត។
លោកថា អាដហុក គ្រាន់តែជួយប្រឹក្សាយោបល់ និងបង្ហាញផ្លូវសម្រាប់ប្រជាពលរដ្ឋ ដែលរងគ្រោះ ក្នុងការស្វែងរកយុត្តិធម៌តាមផ្លូវច្បាប់ប៉ុណ្ណោះ មិនមែនជាខ្នងបង្អែកក្នុងផ្លូវទុច្ចរិតណាមួយឡើយ។
លោកបានបញ្ជាក់ថា៖ «បើទោះជាខំអះអាង លុបលាងយ៉ាងណាក៏ដោយ តែរឿងហ្នឹង ដោយសារតែឥទ្ធិពលរបស់គាត់ [លោក ស៊ុយ សែម ] ដែលធ្វើឲ្យវិវាទដីធ្លីរវាងភរិយាគាត់ ហើយ និងប្រជាពលរដ្ឋ មិនអាចរកដំណោះស្រាយបានរហូតមកដល់ថ្ងៃនេះ»។
ទំនាស់ដីធ្លីរវាងប្រជាពលរដ្ឋនៅឡពាង ជាមួយក្រុមហ៊ុន ខេឌីស៊ី របស់លោកស្រី ជា ខេង ភរិយាលោក ស៊ុយ សែម បានកើតឡើងតាំងពីឆ្នាំ ២០០៦ មក ហើយមកដល់ បច្ចុប្បន្ន គណៈកម្មការទី ១ នៃរដ្ឋសភា កំពុងធ្វើការសម្របសម្រួល ជាមួយភាគីទាំងពីរ ដើម្បីរកដំណោះស្រាយ។
ប្រធានគណៈកម្មការទី ១ រដ្ឋសភា ផ្នែកសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា លោក អេង ឆៃអ៊ាង បានថ្លែងថា មកដល់ពេលនេះ ពលរដ្ឋមួយចំនួនបានដាក់សំណើជាថវិកា ក្នុងការដោះស្រាយជម្លោះដីធ្លីនេះ ហើយបន្ទាប់មកគណៈកម្មការនឹងយកសំណើនេះទៅប្រាប់ខាងក្រុមហ៊ុន ដើម្បីធ្វើការចរចាគ្នា។
លោកថា ប្រសិនបើការចរចាពុំមានលទ្ធផលជាវិជ្ជមានទេនោះគណៈកម្មការនឹងបញ្ជូនសំណុំរឿងនេះ ទៅកាន់អាជ្ញាធររាជរដ្ឋាភិបាលជាអ្នកដោះស្រាយវិញ៕
No comments:
Post a Comment