តំណាងរាស្ត្រមណ្ឌលស្វាយរៀងលោក រៀល ខេមរិន្ទ ប្រាប់អោយដឹងនៅព្រឹកនេះថា ប្រជាពលរដ្ឋនៅក្នុងឃុំខ្សែត្រ ស្រុកកំពង់រោទិ៍ បានរាយការណ៍មកលោកថា អាជ្ញាធរវៀតណាមមានបំណងធ្វើផ្លូវកាត់ភូមិសាស្ត្ររបស់ពួកគាត់ ជាពិសេសគឺកាត់កន្លែងកប់សពដូនតារបស់ពួកគាត់ ។ លោកបន្តថា ប្រជាពលរដ្ឋមិនយល់ស្របចំពោះករណីនេះ ទើបរាយការណ៍មករូបលោក ហើយលោកកំពុងដឹកនាំក្រុមយុវជនទៅពិនិត្យករណីនេះ ។
លោក រៀល ខេមរិន្ទ បន្ថែមថា «យួនបម្រុងនឹងធ្វើផ្លូវកាត់តាមភូមិហ្នឹង ជាពិសេសកាត់តាមទួលតាមឿង ដែលជាទីកន្លែងដែលគាត់កប់ ឬបូជាដូនតារបស់គាត់ ។ យួនហ្នឹងគឺបានប្រាប់ឲ្យគាត់រើសព រើឆ្អឹងអីហ្នឹងចេញ ព្រោះគេធ្វើថ្នល់កាត់តាមហ្នឹង អញ្ចឹងប្រជាពលរដ្ឋគាត់មិនយល់ស្របទេ ដោយសារតែ ដីហ្នឹងជារបស់ខ្មែរ ហើយទួលហ្នឹងជាទួលដែលគាត់កប់សពដូនតាតាំងពីណាពីណីមក» ។
លោក រៀល ខេមរិន្ទ ឲ្យដឹងដែរថា តាមព័ត៌មានចុងក្រោយដែលលោកទើបទទួលបាន គឺថាអាជ្ញាធរវៀតណាមបានយល់ព្រមធ្វើផ្លូវដោយវាងទួលតាមឿងនោះហើយ បន្ទាប់ពីលេចឮដំណឹងថាពួកលោកចុះទៅពិនិត្យនៅទីនោះ ។ ទោះយ៉ាងណា លោកថា បើទោះបីជាអាជ្ញាធរវៀតណាមយល់ព្រមវាងទួលនោះក្តី ក៏ផ្លូវថ្នល់នៅតែនៅលើដីខ្មែរដដែល ។
ភ្លាមៗនេះ VOD មិនទាន់អាចសុំការបញ្ជាក់មេឃុំខ្សែត្រលោក អ៊ុំ សុផន ពីបញ្ហានេះបាននៅឡើយទេ ៕
No comments:
Post a Comment