ប្រជាពលរដ្ឋខ្មែរឥស្លាមដែលមកពីរាជធានី/ខេត្តនោះរួមមាន រាជធានីភ្នំពេញ ខេត្តត្បូងឃ្មុំ ក្រចេះ កំពង់ចាមជាដើម ។
តំណាងប្រជាពលរដ្ឋខ្មែរឥស្លាម លោក អ៊ីស្លា ឧស្មាន នៅឃុំជាំ ស្រុកមេមត់ ខេត្តត្បូងឃ្មុំ ប្រាប់VODនៅថ្ងៃសៅរិ៍នេះថា លោកនឹងដឹកនាំប្រជាពលរដ្ឋខ្មែរឥស្លាមជាង១៥០នាក់ ទៅពិនិត្យមើលព្រំដែនកម្ពុជា/វៀតណាមនៅថ្ងៃអាទិត្យទី៣១ ខែឧសភា ឆ្នាំ២០១៥ ដើម្បីរំឮកការបាត់បង់ទឹកដីនគរចម្ប៉ា កាលពីជិត២០០ឆ្នំមុន ដែលវៀតណាមបានឈ្លានពានយក នឹងដើម្បីដាស់ស្មារតីដល់ប្រជាពលរដ្ឋខែ្មរទូទៅអំពីប្រវត្តិសាស្ត្រនោះ ។
កាលពីថ្ងៃទី១៩ខែមេសា ឆ្នាំ២០១៥ ដំណាំពលរដ្ឋខ្មែរនៅព្រំដែនកម្ពុជា-វៀតណាម ស្ថិតនៅឃុំជាំ ស្រុកមេមត់ ខេត្តត្បូងឃ្មុំនោះ ត្រូវអាជ្ញាធរនិងពលរដ្ឋវៀតណាម បាញ់ថ្នាំបំផ្លាញ ដោយពួកគេអះអាងថា ពលរដ្ឋខ្មែរដាំដំណាំលើដីរបស់វៀតណាម ។ ប៉ុន្តែប្រជាពលរដ្ឋខ្មែរនៅតំបន់នោះអះអាងថា ជាដីរបស់ខ្មែរតាំងពីដូនតា ។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង ថ្មីៗនេះធ្លាប់អះអាងថាប្រជាជនខ្មែរនៅភូមិជើង ឃុំជាំ ស្រុកមេមត់ ខេត្តត្បូងឃ្មុំ បានដាំដំណាំចូលទឹកដីវៀតណាម ។
ទាក់ទិននឹងករណីនេះ សមាជិកសភាគណបក្សប្រឆាំងគ្រោងកោះហៅលោក ហោ ណាំហុង ឲ្យចូលបំភ្លឺបន្ថែមលើករណីនេះ នៅពេលឆាប់ៗខាងមុខ ។
គួររំឮកថា លោកនាយករដ្ឋមន្ត្រី ហ៊ុន សែន ធ្លាប់ចូលបកស្រាយក្នុងសភាជាង៥ម៉ោង កាលពីឆ្នាំ២០១២ ដោយមិនឲ្យតំណាងរាស្ត្រណាម្នាក់សួរដេញដោល ដែលក្នុងការបំភ្លឺនោះ លោក ហ៊ុន សែន បានអះអាងថា កម្ពុជាមិនបានបាត់បង់ទឹកដីទៅប្រទេសជិតខាងដូចការចោទប្រកាន់នោះទេ ៕
No comments:
Post a Comment