លោក ឡុង កុសល អនុប្រធានផ្នែកទំនាក់ទំនងរបស់អាជ្ញាធរអប្សរាបាន ប្រាប់
ភ្នំពេញ ប៉ុស្ដិ៍ កាលពីម្សិលមិញថា មានការពិភាក្សាផ្ទៃក្នុង ក្នុងចំណោមមន្ដ្រីរដ្ឋាភិបាល និងភាគីពាក់ព័ន្ធស្ដីពីការបង្កើនតម្លៃសំបុត្រចូលទស្សនាប្រាសាទអង្គរវត្តដោយសារតែតម្លៃបច្ចុប្បន្នទាបជាងអ្វីដែលកំពុងផ្ដល់ជូនដើម្បីចូលទស្សនាបរិវេណប្រាសាទអង្គរ។
លោកបន្តថា៖ «តម្លៃបច្ចុប្បន្នទាបបើធៀបនឹងតំបន់ដែលផ្ដល់ជូនដល់ភ្ញៀវទេសចរ។ នៅបរិវេណនេះ ភ្ញៀវទេសចរអាចទស្សនាបានកាន់តែច្រើនមិនគ្រាន់តែប្រាសាទអង្គរវត្តប៉ុណ្ណោះទេ ប៉ុន្តែថែមទាំងប្រាសាទបាយ័ន ប្រាសាទបន្ទាយស្រី និងទីកន្លែងជាច្រើនទៀតដើម្បីមើលព្រះអាទិត្យលិច និងព្រះអាទិត្យរះ។ ធៀបនឹងរមណីយដ្ឋានផ្សេងទៀតនៅតាមបណ្ដាប្រទេសផ្សេងៗ តម្លៃរបស់យើងគឺទាបជាងគេ»។
អាជ្ញាធរអប្សរាកំពុងពិចារណាពីការចាប់ផ្ដើមការសិក្សាស្ដីពី«តម្លៃដែលអាចទទួលយកបាន»ថានឹងមានផលប៉ះពាល់តិចតួចដល់វិស័យទេសចរណ៍ទាំងមូល។
លោកបន្តថា៖ «យើងពិចារណាអំពីតម្លៃដែលប៉ះពាល់ដល់ចំនួនភ្ញៀវទេសចរ។ នោះគឺជាមូលហេតុដែលយើងគ្រោងនឹងចាប់ផ្ដើមសិក្សាមើលពីលទ្ធភាពក្នុងការបង្កើនតម្លៃសំបុត្រនៅតាមរបៀបមួយដែលអ្នករាល់គ្នាអាចទទួលយកបាន»។
ប៉ុន្តែលោកមិនបានបង្ហាញចំនួនដែលនឹងបន្ថែមលើតម្លៃបច្ចុប្បន្ននោះទេ៖ «វាឆាប់ពេកមិនអាចនិយាយបានទេមុនពេលការសិក្សាណាមួយត្រូវបានធ្វើឡើង»។
បច្ចុប្បន្នភ្ញៀវទេសចរបរទេសត្រូវបង់ប្រាក់ ២០ដុល្លារសម្រាប់ការចូលទស្សនាបរិវេណប្រាសាទអង្គរមួយថ្ងៃ តម្លៃ ៤០ដុល្លារសម្រាប់រយៈពេលចូលទស្សនា ៣ថ្ងៃ និងតម្លៃ ៦០ដុល្លារសម្រាប់ចូលទស្សនារយៈពេលមួយសប្ដាហ៍។
លោក ហូ វណ្ឌី សហប្រធានក្រុមការងារវិស័យទេសចរណ៍ឯកជនរដ្ឋាភិបាលបានថ្លែងកាលពីម្សិលមិញថា ការបង្កើនតម្លៃនេះ ប្រសិនបើបង្កើនខ្ពស់ពេក នឹងបង្កើនការចំណាយមូលដ្ឋានរបស់ទេសចរណ៍កញ្ចប់ ហើយនឹងធ្វើឲ្យភ្ញៀវទេសចរជាច្រើននឹងងាកចេញទៅរកទិសដៅផ្សេងទៀតដែលមានកញ្ចប់ទេសចរមានតម្លៃទាបជាង។
លោកថ្លែងថា៖ «វានឹងប៉ះពាល់ដល់ភ្ញៀវទេសចរកញ្ចប់ដែលត្រូវបានរៀបចំដោយប្រតិបត្តិករទេសចរណ៍។ វានឹងបន្ថែមបន្ទុកចំណាយរបស់ភ្ញៀវទេសចរ ហើយបើទេសចរណ៍កញ្ចប់មានតម្លៃថ្លៃ ភ្ញៀវទេសចរទំនងនឹងប្តូរទៅរកទិសដៅផ្សេងទៀតមិនខាន»។
លោកបន្ថែមថា វិស័យទេសចរណ៍ឯកជនគួរតែត្រូវបានគេអញ្ជើញទៅចូលរួមពិភាក្សាស្ដីពីតម្លៃដែលកំណត់មុនពេលវាត្រូវបានប្រកាស។
លោក លូ ម៉េង ប្រធានសមាគមសណ្ឋាគារកម្ពុជា យល់ថាតម្លៃសំបុត្របច្ចុប្បន្នទាបធៀបនឹងបណ្ដាប្រទេស ផ្សេងទៀត ហើយថាការបង្កើនតម្លៃសំបុត្រនឹងមានផលប៉ះពាល់តិចតួចដល់ចំនួនភ្ញៀវទេសចរ។
លោកបន្តថា៖ «គ្មាននរណាម្នាក់ចង់បានតម្លៃខ្ពស់នោះទេ។ វានឹងមានផលប៉ះពាល់ ប៉ុន្តែវានឹងមិនប៉ះពាល់ខ្លាំងនោះទេ បើយើងអាចធានាពីគុណភាពសេវាដែលយើងកំពុងផ្ដល់ជូន។ ទេសចរនឹងមិនសម្រេចចិត្តមកទស្សនាទីកន្លែងពឹងលើតម្លៃតែមួយនោះទេ។ បើកម្ពុជាមានសណ្ឋាគារល្អ អាហារនិងបដិសណ្ឋារកិច្ចល្អ ពួកគេនឹងចូលមកទោះបីជាតម្លៃខ្ពស់ក៏ដោយ»។
កាលពីឆ្នាំមុន សំបុត្រជាង ២លានត្រូវបានលក់ឲ្យជនបរទេសដែលមកទស្សនាប្រាសាទអង្គរ ដែលរកបានប្រាក់ចំណូលជិត ៦០លានដុល្លារ។ ប៉ុន្តែទិន្នន័យនៅតែរងការរិះគន់យ៉ាងខ្លាំងដោយគណបក្សប្រឆាំង។ ប្រាក់ចំណូលសរុបបានកើនឡើងពី ៥៧,៦លានដុល្លារកាលពីឆ្នាំ ២០១៣ ដល់ ៥៩,៣ លានដុល្លារកាលពីឆ្នាំមុន។ នេះបើយោងតាមទិន្នន័យបានពីអាជ្ញាធរអប្សរា ។
លោក សុន ឆ័យ តំណាងរាស្រ្តគណបក្សប្រឆាំង ថ្លែងកាលពីម្សិលមិញថា ការលុបបំបាត់ការលួចបន្លំលើចំណូលពីការទស្សនាតំបន់ប្រាសាទអង្គរវត្តនឹងបង្កើនតួលេខចំណូលបច្ចុប្បន្នចូលដល់ថវិកាជាតិ ដោយមិនចាំបាច់មានការដំឡើងថ្លៃសំបុត្រនោះទេ។
លោកថ្លែងថា៖«យើងមិនត្រូវបង្កើតបញ្ហាដល់ទេសចរទេ។ រឿងលក់សំបុត្រនេះ តម្លៃវាសមរម្យហើយ ហើយអ្វីដែលជាបញ្ហាគឺការលួចបន្លំ។ អប្សរាគឺលួចបំបាត់លុយ។ យើងត្រូវបង្កើតយន្តការថ្មីមួយដែលធានាមិនឲ្យមានការលួចបំបាត់ពីចំណូលនេះ។ ត្រូវតែមានការធ្វើបញ្ជីត្រឹមត្រូវ និងមិនត្រូវលុបចោលរូបថត លុបចោលឈ្មោះពីកុំព្យូទ័រដែលធ្វើសព្វថ្ងៃនេះទេ»។
លោកបន្តថា៖«តាមអប្សរាអះអាងថាភ្ញៀវស្ទើរតែ ៩០ភាគរយគឺទិញសំបុត្រចូលមើលតែមួយថ្ងៃទេ ជាការភូតភរតែម្តង»។
តាមលោក សុន ឆ័យ រហូតមកទល់ពេលនេះបើទោះបីជាមានការធ្វើរបាយការណ៍ជារៀងរាល់ខែក៏ដោយក៏យើងនៅតែទទួលបានដំណឹងថាមានការលួចបំបាត់ប្រហែល ៣០ភាគរយនៃប្រាក់ចំណូល។
លោកបន្ថែមថា៖«ជាយោបល់ ខ្ញុំមិនគាំទ្រទេ។ យើងត្រូវសម្អាតការងារដែលអាជ្ញាធរអប្សរា និងក្រុមហ៊ុនលោកសុខ គង់ លើការលក់សំបុត្រនោះ ហើយបើមានវិធានការដំឡើងថ្លៃសំបុត្រ យើងនឹងតវ៉ា»។
កាលពីឆ្នាំមុន កម្ពុជាទទួលបានភ្ញៀវទេសចរសរុប ៤,៥លាននាក់ដែលរកបានប្រាក់ចំណូលប្រហែល៣ពាន់លានដុល្លារអាមេរិក៕
No comments:
Post a Comment