លោក ឈឹម ផលវរុណ បានប្រាប់ Fresh News ថា «ការងាររបស់ខ្ញុំ ដែលធ្វើនេះមានតែជួយជាចំហរ មិនមានលាក់លៀមពីក្រោយខ្នងឯណា ហើយករណីលោក មឿន និងប្រជាពលរដ្ឋដទៃទៀត គឺយើងដឹងរឿងរ៉ាវ តាមរយៈវិទ្យុរបស់យើង ដូច្នេះលោក មឿន បានដឹងកម្មវិធីរបស់យើងពន្យល់អំពីច្បាប់ គាត់ចង់ដឹង ហើយយើងក៏ពន្យល់ នេះជារឿងការងាររបស់យើង មិនមែនលាក់លៀមក្រោយខ្នងទេ ចំណែកការងារតុលាការ ព្រះរាជអាជ្ញា គេមានឯករាជ្យភាពរបស់គេ» ។
ការលើកឡើង របស់លោក ឈឹម ផលវរុណ បានធ្វើឡើងបន្ទាប់ពី លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានធ្វើលិខិតអន្តរាគមន៍មួយ ទៅសម្តេចនាយករដ្ឋមន្ត្រី ហ៊ុន សែន ដោយលើកឡើងថាខ្លួនទទួលរងនូវភាពអយុត្តិធម៌ ដោយត្រូវសាលាឧទ្ធរណ៍សម្រេចចោទប្រកាន់ជាថ្មីម្តងទៀត ពាក់ព័ន្ធនឹង ករណីឆបោកទឹកប្រាក់៧ម៉ឺនដុល្លារ ដែលប្តឹងដោយឈ្មោះ ឌុក មឿន ។ លោក ខឹម វាសនា បានចោទលោក ឈឹម ផលវរុណ ថាបាននៅពីក្រោយខ្នង ក្នុងការជំរុញ ឱ្យមានការប្តឹងតវ៉ានេះ ខណៈដែលសាលាដំបូងបានសម្រេចតម្កល់មិនចាត់ការ ។
លោក ឈឹម ផលវរុណ បានជំរុញឱ្យ លោក ខឹម វាសនា ខិតខំរកមេធាវីជំនាញច្បាស់លាស់ និង ហេតុផលដោះបន្ទុកត្រឹមត្រូវប្រសើរជាងការ ដោះសារ ឬ ព្យាយាមចោទប្រកាន់ មកលើរូបលោក ។
សូមជំរាបថា លោក ឈឹម ផលវរុណ និង លោក ខឹម វាសនា ធ្លាប់មានការឆ្លើយឆ្លងពាក្យសម្តីគ្នា រហូតដល់ប្តឹងផ្តល់ទៅតុលាការម្តងរួចមកហើយ មុនពេលបោះឆ្នោត ជ្រើសតាំងតំណាងរាស្ត្រ អាណិត្តទី៥ ហើយពេលនេះបណ្តឹងរបស់ពួកគេ មិនទាន់ចប់នៅឡើយ៕
No comments:
Post a Comment