អ្នកនាំពាក្យព្រឹត្តិការណ៍អង្គរសង្រ្កាន្ត លោក សោម រតនា ប្រាប់អោយដឹងនៅរសៀលថ្ងៃចន្ទនេះថានៅម៉ោងប្រមាណ៤ និង ៣០ នាទី
រសៀលនេះ ក្រុមការងារGuinness World Records បានប្រកាសជាផ្លូវការចុះឈ្មោះនំអន្សមយក្សកម្ពុជាចូលក្នុងសៀវភៅកត់ត្រាពិភពលោក។ លោកបន្តថាមុននឹងនំអន្សមជាប់ជាកំណត់ត្រាពិភពលោក ខាងចៅក្រមបានពិនិត្យទៅលើបច្ចេកទេសនៃការធ្វើ គុណភាព រសជាតិ និងទម្ងន់ជាដើម(៤០៤០គីឡូក្រាម)។ យ៉ាងណាក៏ដោយលោកបញ្ជាក់ថា ក្រៅពីទទួលបានប័ណ្ណសរសើរពីGuinness World Records លោកមិនទាន់ដឹងថាកម្ពុជានឹងទទួលបានប្រាក់រង្វាន់ ឬសម្ភារៈអ្វីផ្សេងទៀតនោះទេ។
សហភាពសហព័ន្ធយុវជនកម្ពុជា(ស.ស.ក)ដែលជាក្រុមការងាររៀបចំ ព្រឹត្តិការណ៍អង្គរសង្រ្កាន្តបានប្រកាសថានេះជានំអន្សមយក្សដែលមាន ទំហំធំជាងគេក្នុងពិភពលោក។ សហភាពបន្តថាការធ្វើនំអន្សមដែលមានទំហំធំជាងគេនេះ គឺដើម្បីផ្សព្វផ្សាយឲ្យសាធារណជនលើកពិភពលោកបានដឹងពីវប្បធម៌ និងវត្ថុធាតុដើមនៃការធ្វើនំអន្សមរបស់កម្ពុជា។
កាលពីឆ្នាំ២០១៣ សហភាពសហព័ន្ធយុវជនកម្ពុជាបានរៀបចំធ្វើនំអន្សមយក្សដែលធ្វើពី អង្ករដំណើប សណ្ដែកបាយ និងសាច់ជ្រូក ទម្ងន់២តោន ត្រូវបានគេដាក់តាំងបង្ហាញនៅខាងមុខប្រាសាទអង្គរវត្ដក្នុងខេត្តសៀមរាប ដែលមានការចំណាយថវិកាអស់ជិត១ម៉ឺនដុល្លារអាមេរិក៕
No comments:
Post a Comment