ក្រៅឃុំ ដែលផ្ទុយពីករណីសំណុំរឿងរបស់លោក ឧកញ៉ា ថោង សារ៉ាត់ នាយកក្រុមហ៊ុន Meanchey International Investment និងក្រុមហ៊ុនបុរី៩៩៩ ដែលទើបតែកើតឡើងជាងបួនខែត្រូវបានតុលាការសម្រេចឃុំខ្លួនដាក់ពន្ធនាគារបណ្តោះអាសន្ន បើទោះបីជាបានលាក់ខ្លួននៅប្រទេសវៀតណាមមួយរយៈក៏ដោយ។
លោក ឈូក បណ្ឌិត អតីតអភិបាលក្រុងបាវិត ដែលបានបាញ់កម្មការិនីរោងចក្រនៅក្រុងបាវិត ៣ នាក់ឲ្យរងរបួសកាលពីថ្ងៃទី ២០ ខែកុម្ភៈ នៅខណៈតវ៉ាលក្ខខណ្ឌការងារប្រសើរ ត្រូវបានតុលាការចោទពីបទបង្ករបួសស្នាមដោយអចេតនាកាលពីថ្ងៃទី ៤ ខែមីនា ឆ្នាំ ២០១៣ សាលាឧទ្ធរណ៍ បានសម្រេចធ្វើការចោទប្រកាន់សាជាថ្មីឡើងវិញ ដោយបង្វិលសំណុំរឿងនេះទៅឲ្យតុលាការខេត្តស្វាយរៀងបើកសវនាសាជាថ្មី ហើយនៅថ្ងៃទី ២៥ ខែមិថុនា អតីតអភិបាលក្រុងបាវិតដ៏មានឥទ្ធិពលរូបនោះត្រូវបានសាលាដំបូងខេត្តស្វាយរៀងចេញដីកាបង្គាប់ឲ្យចាប់ខ្លួន បន្ទាប់ពីតុលាការបានសម្រេចធ្វើការផ្តន្ទាទោសឲ្យជាប់ពន្ធនាគារចំនួន ១ ឆ្នាំ ៦ ខែ ដោយពិន័យជាប្រាក់ ៣៨ លានរៀលតម្រូវឲ្យបង់សងជំងឺចិត្តឲ្យកម្មការិនីរងគ្រោះទាំងបីនាក់រូបនោះ។
ក្រោយពីតុលាការសម្រេចកាត់ទោស អតីតអភិបាលក្រុងបាវិតដ៏មានឥទ្ធិពលរូបនោះ បានដាក់ពាក្យប្ដឹងទៅសាលាឧទ្ធរណ៍ដើម្បីប្រឆាំងទាស់នឹងសាលក្រមរបស់សាលាដំបូងខេត្តស្វាយរៀង ដោយចាត់ទុកថាសាលក្រមនោះពុំបានផ្តល់យុត្តិធម៌ដល់ខ្លួន។ គិត រហូតមកទល់បច្ចុប្បន្ន ទោះបីមានឈ្មោះជាទណ្ឌិតរួចហើយក៏ដោយ ក៏លោក ឈូក បណ្ឌិត នៅមានឱកាសទទួលបានសេរីភាពរួចផុតពីការអនុវត្តទោសក្នុងពន្ធនាគារ និងកាតព្វកិច្ចសំណងរដ្ឋប្បវេណី អស់រយៈពេលជាង ៣ ឆ្នាំ ខណៈដែលកម្មការិនីរងគ្រោះបីនាក់នៅកំពុងដេកវេចសម្ពាយជំងឺដែលបង្កឡើងដោយជាតិរំសេវគ្រាប់កាំភ្លើង លោក បណ្ឌិត។
កម្មការិនី កែវ នា ដែលរងរបួសបានថ្លែងថា ពួកនាងទាំងបីនាក់គឺនៅតែឈឺនៅលើមុខរបួស ជាពិសេសជាតិរំសេវតែងតែធ្វើទុក្ខ ពេលខ្លះក្តៅខ្លួន ពេលខ្លះក៏សន្លប់ មិនសូវមានកម្លាំងកំហែង ប៉ុន្តែជនប្រព្រឹត្តដែលមានអំណាចជាអភិបាលក្រុងនៅតែមិនទាន់ចាប់ដាក់គុកនៅឡើយ។
នាងបានថ្លែងថា៖ «ក្នុងរឿងនេះបើមិនមែនជា ឈូក បណ្ឌិត គឺត្រូវចាប់ខ្លួនយូរមកហើយ ប៉ុន្តែនេះគេជាអ្នកធំ មានលុយមានអំណាច បើពួកយើងជាអ្នកប្រព្រឹត្តម្ល៉េះបានជាប់គុក ហើយបានចេញពីគុកវិញបាត់ទៅហើយ»។
នាងបានថ្លែងឲ្យដឹងបន្តទៀតថា ពួកនាងមិនសង្ឃឹមថាទទួលបានយុត្តិធម៌នោះទេ ពួកនាងចង់ឲ្យអាជ្ញាធរចាប់ ឈូក បណ្ឌិត ដាក់គុក និងសងថ្លៃជំងឺចិត្តដើម្បីឲ្យពួកនាងបានលុយនោះទុកសម្រាប់ទិញថ្នាំដើម្បីព្យាបាលជំងឺរបស់ពួកគេ។ នាងនិយាយថា៖ «សព្វថ្ងៃនេះពួកយើងខំធ្វើការដើម្បីបានលុយទិញថ្នាំ ប៉ុន្តែប្រាក់ខែពួកយើងក៏គេកាត់អស់មួយចំនួនដែរដោយសារតែពួកយើងឈឺ សុំច្បាប់ឈប់»។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃពុំអាចទាក់ទងដើម្បីធ្វើការអត្ថាធិប្បាយបានទេកាលពីថ្ងៃម្សិលមិញ។
កាលពីខែកញ្ញា ឆ្នាំ ២០១៣ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃក៏បានចេញលិខិតបញ្ជាទៅអគ្គស្នងការនគរបាលជាតិឲ្យ ស្វែងរកចាប់ខ្លួនអតីតអភិបាលក្រុងបាវិត លោក ឈូក បណ្ឌិត តាមដីកាបង្គាប់ឲ្យចាប់ខ្លួនរបស់សាលាដំបូងខេត្តស្វាយរៀងផងដែរ។
មន្ត្រីនគរបាល ដែលសុំមិនបញ្ចេញឈ្មោះ បានឲ្យដឹងថា ទណ្ឌិត ឈូក បណ្ឌិត ដែលជាមនុស្សមានទំនាក់ទំនងជិតស្និទ្ធជាមួយលោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាអ្នកតំណាងរាស្ត្រមណ្ឌលខេត្តស្វាយរៀងដ៏មានឥទ្ធិពលនោះ មិនមែនសមត្ថកិច្ចចាប់ខ្លួនមិនបានទេ។
មន្ត្រីរូបនោះបានថ្លែងថា ៖«សមត្ថកិច្ច មិនហ៊ានចាប់ខ្លួនតែម្តង»។
លោក មេធាវី សុក សំអឿន ប្រធានក្រុមអ្នកច្បាប់ការពារសិទ្ធិកម្ពុជាបានថ្លែងថា ករណីលោក ឈូក បណ្ឌិត ដែលចោទបង្ករបួសស្នាមដោយអចេតនា គឺជាបទមជ្ឈិម ដូច្នេះបើគាត់នៅបន្តលាក់ខ្លួនពីសំណាញ់ច្បាប់រហូតដល់ ៥ ឆ្នាំគឺផុតអាជ្ញាយុកាលហើយ ប៉ុន្តែគាត់ត្រូវបង់ប្រាក់សំណងទៅឲ្យជនរងគ្រោះ។
លោកបានថ្លែងថា៖ «បើគាត់គេចផុត ៥ ឆ្នាំគឺលែងមានទោសហើយ»។
រវាងសំណុំរឿងទណ្ឌិត ឈូក បណ្ឌិត និងជនដែលត្រូវចោទ ថោង សារ៉ាត់ ជានាយទាហាននៃកងយោធពលខេមរភូមិន្ទមានឋានន្តរស័ក្តិថ្នាក់ឧត្តម សេនីយ៍ទោ ក្នុងសំណុំរឿងឃាតកម្មលើលោកឧកញ៉ា អ៊ឹង ម៉េងជឺ ដែលត្រូវបានចៅក្រមស៊ើបសួរសាលាដំបូងរាជធានីភ្នំពេញចេញដីកាបង្គាប់ឲ្យកម្លាំងសាធារណៈតាមចាប់ខ្លួននាថ្ងៃទី ០៥ ខែធ្នូ ឆ្នាំ ២០១៤ នោះគឺនៅថ្ងៃទី ១៦ ខែមេសា ឆ្នាំ ២០១៥ ត្រូវបានសមត្ថកិច្ចប្រកាសថា ចាប់ខ្លួនលោកឧកញ៉ា ថោង សារ៉ាត់ បានហើយៗក៏ត្រូវបានតុលាការសម្រេចឃុំខ្លួនដាក់ពន្ធនាគារបណ្តោះអាសន្ន នាថ្ងៃទី ១៧ ខែមេសា ឆ្នាំ ២០១៥ ក្រោយពីបានគេចខ្លួនបានជាង ០៤ ខែ។ ដូច្នេះតើលោក ឈូក បណ្ឌិតជាអ្នកណា?
លោក អំ សំអាត មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សលីកាដូបានថ្លែងឲ្យដឹងថា មូលហេតុដែលលោក ឈូក បណ្ឌិត នៅតែមានសិទ្ធិរស់នៅក្រៅឃុំយ៉ាងសប្បាយបើទោះបីជាត្រូវបានតុលាការកាត់ទោសហើយក៏ដោយនោះគឺដោយសារតែសមត្ថកិច្ចគ្មានឆន្ទៈក្នុងការស្វែងរកចាប់ខ្លួនមកដាក់គុក។ ម្យ៉ាងទៀតគាត់មានអ្នកមានអំណាចនៅពីក្រោយខ្នង ដែលជាមន្ត្រីជាន់ខ្ពស់នៅក្នុងជួររដ្ឋាភិបាល។
លោកថ្លែងថា៖ «នេះបង្ហាញថាការអនុវត្តច្បាប់នៅក្នុងប្រទេសយើងនៅមានកម្រិត បើទោះបីជាតុលាការចេញដីកាឲ្យស្វែងរកចាប់ខ្លួនក៏ដោយ»។
លោកបានថ្លែងថា បើធៀបករណីលោក ឈូក បណ្ឌិត និងលោកឧកញ៉ា ថោង សារ៉ាត់ គឺវាខុសគ្នាស្រឡះគឺករណីលោកឧកញ៉ា ថោង សារ៉ាត់ បានបង្ហញថា សមត្ថកិច្ចមានបំណងក្នុងការចាប់ខ្លួនគាត់មកអនុវត្តទោសបើទោះបីជាគាត់បានរត់គេចខ្លួនទៅដល់ក្រៅប្រទេសក៏ដោយ។
លោកថា៖ «ករណីលោក ឈូក បណ្ឌិត នេះគឺធ្វើឲ្យប៉ះពាល់យ៉ាងធ្ងន់ធ្ងរគឺនិទ្ទណ្ឌភាព ចេះតែបន្តកើតឡើងដោយសារអ្នកផ្សេងឃើញថា អ្នកដែលប្រពឹត្តមិនត្រូវបានចាប់យកមកដាក់ទោស»។
សូមរំឭកផងដែរថា លោក ឈូក បណ្ឌិត មានឋានន្តរស័ក្តិជាវរមន្ត្រីថ្នាក់លេខ ១០ ធ្លាប់ត្រូវបានតែងតាំងជាអភិបាលនៃគណៈអភិបាលក្រុងបាវិត ដោយអនុក្រឹត្យរបស់រាជរដ្ឋាភិបាលលេខ ៧២៧ អនក្រ.តត ចុះថ្ងៃទី ២៥ ខែឧសភា ឆ្នាំ ២០០៩ និងក្រោយមកត្រូវបានរាជរដ្ឋាភិបាលសម្រេចដកហូតមុខតំណែងនេះឲ្យមក បម្រើការងារនៅសាលាខេត្តស្វាយរៀងវិញ ដោយអនុក្រឹត្យលេខ ២៥៩ អនក្រ.តត ចុះថ្ងៃទី ០៥ ខែមីនា ឆ្នាំ ២០១២ បន្ទាប់ពីមានរឿងអាស្រូវបាញ់ប្រហារលើកម្មការិនីរោងចក្រផលិត ស្បែកជើងកៅវេ បណ្តាលឲ្យរងរបួសធ្ងន់ធ្ងរស្ទើរបាត់បង់ជីវិតចំនួន ៣ នាក់ នៅពេលដែលនាំគ្នាធ្វើកូដកម្មបាតុកម្ម ទាមទារលក្ខខណ្ឌការងារល្អប្រសើរនាថ្ងៃទី ២០ ខែកុម្ភៈ ឆ្នាំ ២០១២៕PP
No comments:
Post a Comment