សមាជិកសហគមន៍អូរពោធិ៍បឹងទន្លេម្រេចបីនាក់បានប្តឹងមន្រ្តីអាជ្ញាធរភូមិឃុំនិងឈ្មួញដីម្នាក់ទៅសាលាឧទ្ធរណ៍កាលពីម្សិលមិញ រឿងឈូសឆាយ និងលក់ដីសហគមន៍ជាង ១៥ហិកតា បន្ទាប់ពីតុលាការខេត្តព្រះវិហារ បានតម្កល់បណ្តឹងពួកគាត់មិនចាត់ការ។
ការដាក់បណ្តឹងទៅសាលាឧទ្ធរណ៍នេះ ត្រូវបានធ្វើឡើងបន្ទាប់ពីសមាជិកសហគមន៍មួយក្រុមផ្សេងទៀត បានឯកភាពគ្នាជាមួយនឹងអាជ្ញាធរភូមិឃុំ និងមន្ដ្រីបរិស្ថាន ដើម្បីប្តឹងសមាជិកសហគមន៍ទាំងបីនាក់នោះ កាលពីខែមីនាកន្លងមកពីរឿងទន្រ្ទានកាន់កាប់ដីរដ្ឋដោយខុសច្បាប់។
សមាជិកសហគមន៍ទាំងបីនាក់នោះរួមមានឈ្មោះ ហួន គីណូ អាយុ ៤១ឆ្នាំ លោកសុខ ឈិត អាយុ ៦៧ ឆ្នាំ និងលោកព្រះ កៃអាយុ ៤៧ ឆ្នាំ។ ពួកគាត់បានប្តឹងអតីតប្រធានសហគមន៍លោក ទេព ធីវ មេភូមិអូរពោធិ៍ លោក សុខ គង់ មេឃុំរមណីលោកសូ សៀ និងអ្នកទិញដីលោកឃៀ ម៉េងឈួង។
លោក ហួន គីណូ បានបញ្ជាក់ថា៖ «ពួកខ្ញុំតំណាងសហគមន៍ ១៣៧ គ្រួសារ ប្តឹងមេភូមិ មេឃុំនិងលោក ម៉េងឈួង ដែលបានលក់និងឈូសឆាយដីសហគមន៍ជាង ១៥ ហិកតា។ ដីហ្នឹងគេដាំដំណាំអស់ហើយ»។
លោក គីណូ បន្តថា បណ្តឹងរបស់ពួកគាត់ដាក់ទៅតុលាការខេត្តតាំងពីឆ្នាំ ២០១៤ ប៉ុន្តែបែរជាត្រូវតម្កល់ទុកឥតចាត់ការ ទើបពួកលោកប្តឹងទៅសាលាឧទ្ធរណ៍វិញម្តង។
ក្រុមលោក គីណូ បានដាក់លិខិតសុំអន្តរាគមន៍រួមមួយទៅរដ្ឋសភា ក្រសួងយុត្តិធម៌ និងសាលាឧទ្ធរណ៍ កាលពីថ្ងៃទី ១៨ ខែមីនា កន្លងមក បន្ទាប់ពីលោក ឡុង ស៊ីថា ព្រះរាជអាជ្ញារងអមសាលាដំបូងខេត្តព្រះវិហារ បានដឹកនាំកម្លាំងជាង ២០ នាក់ទៅរុះរើស្នាក់ការសហគមន៍របស់ពួកគាត់ចោល។ ការហ៊ានរុះរើដោយសំអាងថា ស្នាក់ការនោះ គឺមិនមានការឯកភាពពីគណៈកម្មការសហគមន៍ អាជ្ញាធរ និងមន្រ្តីបរិស្ថាននោះទេ ដោយសាងសង់បែបអនាធិបតេយ្យលើដីសហគមន៍ដែលគ្រប់គ្រងដោយបរិស្ថានដើម្បីចាប់យកដីលក់។ ពីរថ្ងៃក្រោយពីសុំអន្តរាគមន៍មក ក្រុមលោកគីណូ ត្រូវបានក្រុមអាជ្ញាធរ និងសមាជិកសហគមន៍ផ្សេងទៀតប្តឹងវិញ។
លោកគីណូបានចាត់ទុកថា ការប្តឹងពួកលោកនេះគឺទំនងជារឿង«គំនុំ»ដោយសារតែពួកលោកស្នើសុំកិច្ចអន្តរាគមន៍ទៅស្ថាប័នទាំងបីខាងលើនេះ។
ទោះយ៉ាងណាលោក មេឃុំសូ សៀ ជាជនជាតិដើមភាគតិចកួយបានថ្លែងថា ការដែលអាជ្ញាធរ និងសហគមន៍ឯកភាពគ្នាប្តឹងក្រុមលោកហួន គីណូនោះគឺដោយសារតែពួកគេកាប់ទន្រ្ទាន និងកាន់កាប់ដីសហគមន៍ជាដីរដ្ឋដោយខុសច្បាប់។
លោកមេឃុំក៏បានបដិសេធថា ពួកលោកមិនបានឈូសឆាយ និងលក់ដីសហគមន៍ឲ្យទៅលោកម៉េងឈួងនោះទេ។ «មិនពិតទេ។ អត់មានលក់ដីទេ គឺលោកម៉េង ឈួងបានកាន់កាប់ដីនោះតាំងពីមុនបង្កើតសហគមន៍ម៉្លេះ។ គេទិញពីអ្នកស្រុកទេ។ បើខ្ញុំចេះលក់ដីអ៊ីចឹងមានលុយទិញឡានជិះហើយ»។
លោកឡោ ចាន់អ្នកសម្របសម្រួលអង្គការអាដហុកខេត្តព្រះវិហារបានសង្កេតឃើញថា តុលាការមិនសូវចាត់ការបណ្តឹងរបស់ពលរដ្ឋឡើយ។ ប៉ុន្តែបើបណ្តឹងរបស់អាជ្ញាធរវិញតុលាការច្រើនតែចាត់វិធានការណ៍ ដែលធ្វើឲ្យពលរដ្ឋមានការភ័យខ្លាច និងប្រឈមទៅនឹងការជាប់ឃុំឃាំង។
អង្គការអាដហុកបានអំពាវនាវឲ្យអាជ្ញាធរថ្នាក់ជាតិពិនិត្យជម្លោះនៅសហគមន៍អូរពោធិ៍បឹងទន្លេម្រេចនេះ ដើម្បីកុំឲ្យស្ថានភាពកាន់តែធ្ងន់ធ្ងរថែមទៀត។
លោក ឡុង ស៊ីថា ព្រះរាជអាជ្ញារងអមសាលាដំបូង ខេត្តព្រះវិហារ ឲ្យដឹងថា មានសំណុំរឿងប្រមាណជា ៧ នៅតុលាការខេត្តដែលជាប់ពាក់ព័ន្ធនឹងលោក ហួន គីណូ។
លោកស៊ីថា សុំមិនធ្វើអត្ថាធិប្បាយបន្តដោយសុំឲ្យទាក់ទងទៅព្រះរាជអាជ្ញាលោក លី លន់។
លោក លី លន់ បានថ្លែងថា បណ្តឹងរបស់ក្រុមលោកគីណូបានតម្កល់មិនចាត់ការដោយសារតែ ពួកគាត់ប្តឹងខុសមនុស្ស។ រីឯ បណ្តឹងឧទ្ធរណ៍របស់ពួកគាត់នោះ តុលាការកំពុងតែរៀបចំបញ្ជូនទៅសាលាឧទ្ធរណ៍តាមផ្លូវច្បាប់៕
No comments:
Post a Comment