អ្នកលក់សំបុត្រនៅក្រុមហ៊ុនរថយន្តក្រុង វីរៈ ប៊ុនថាំ ឲ្យដឹងថា ក្រុមហ៊ុនបានចាប់ផ្ដើមដំឡើងថ្លៃសំបុត្រកាលពីម្សិលមិញ ចំនួន២ដុល្លារលើសថ្ងៃធម្មតា តែពុំបានបញ្ជាក់ថា ការឡើងថ្លៃនេះនឹងបន្តចំនួនប៉ុន្មានថ្ងៃនោះទេ ។ ចំណែកអ្នកលក់សំបុត្រនៅក្រុមហ៊ុន រិទ្ធិ មុន្នី ឲ្យដឹងដែរថា ក្រុមហ៊ុនដំឡើងថ្លៃសំបុត្រលើសថ្ងៃធម្មតារ១០០០០រៀលនៅពេលចូលឆ្នាំនេះ ដូចជាថ្ងៃធម្មតា តម្លៃសំបុត្រពីភ្នំពេញទៅបាត់ដំបងតម្លៃ២៥០០០រៀល ឡើងទៅ៣៥០០០រៀល ។
ក្រុមហ៊ុនមួយចំនួនអះអាងថានៅមិនទាន់ដំឡើងតម្លៃសំបុត្ររបស់ខ្លួននៅឡើយទេនៅថ្ងៃព្រសហស្បតិ៍នេះ តែគ្រោងនឹងដំឡើងនៅពេលកៀកថ្ងៃចូលឆ្នាំ ។ អ្នកលក់សំបុត្រនៅក្រុមហ៊ុនកាពីតូល និងក្រុមហ៊ុនភ្នំពេញសូរិយាដឹកអ្នកដំណើរ អះអាងថា ក្រុមហ៊ុននឹងឡើងថ្លៃសំបុត្រចាប់ពីថ្ងៃស្អែក ឬខានស្អែកទៅតែពុំបានបញ្ជាក់ពីតម្លៃ និងចំនួនថ្ងៃដែលនឹងដំឡើងថ្លៃនោះទេ ។
បុគ្គលិកផ្នែកទីផ្សាររបស់ក្រុមហ៊ុនដឹកអ្នកដំណើរមួយសុំមិនបញ្ចេញឈ្មោះឲ្យដឹងថា ក្រុមហ៊ុនរបស់លោកក៏គ្រោងនឹងដំឡើងថ្លៃសេវាដឹកអ្នកដំណើរផងដែរក្នុងអំឡុងពេលចូលឆ្នាំប្រពៃណីខ្មែរខាងមុខនេះ ។ លោកថា ការឡើងថ្លៃនេះគឺដោយសារមានអ្នកធ្វើដំណើរច្រើនធ្វើដំណើរក្នុងទិសដៅតែមួយ និងត្រូវទូទាត់ការចំណាយលើថ្លៃសេវាកម្មផ្សេងៗ ជាពិសេសគឺថ្លៃបុគ្គលិកដែលធ្វើការនៅថ្ងៃបុណ្យ ។
បុគ្គលិកផ្នែកទីផ្សាររូបនោះលើកឡើងថា «ប្រហែលជាត្រូវឡើងតិចតួច ព្រោះអាពេលចូលឆ្នាំហ្នឹង ប្រជាជនយើងគាត់ចេញទៅខេត្ដច្រើន ហើយណាមួយយើងត្រូវការឡានឲ្យគាត់វិលពីខេត្តមកវិញ ដើម្បីដឹកជញ្ជូនអ្នកដំណើរហ្នឹង ហើយចំពោះបុគ្គលិកគាត់ធ្វើការក៏ត្រូវថែមម៉ោងត្រូវថែមលុយOT (លើសម៉ោង)ឲ្យគាត់ តៃកុងឡានក៏ដូចគ្នាដែរ ថែមលុយឲ្យគាត់អញ្ចឹង យើងត្រូវដំឡើងថ្លៃតិចតួចលើតម្លៃចាស់ » ។
អ្នករត់រថយន្តឈ្នួល(តាក់ស៊ី)ពីភ្នំពេញទៅខេត្តកំពង់ធំ អ្នកស្រី ភាត់ សុផល ឲ្យដឹងថា អ្នកស្រីនឹងដំឡើងថ្លៃឈ្នួលធ្វើដំណើរទ្វេដង រយៈពេលប្រាំមួយថ្ងៃក្នុងឱកាសបុណ្យចូលឆ្នាំថ្មីប្រពៃណីខ្មែរខាងមុខនេះ ។ អ្នកស្រីថា មូលហេតុដែលអ្នកស្រីដំឡើងថ្លៃរថយន្តគឺដោយសារមុនពេលចូលឆ្នាំមានតែអ្នកដំណើរពីភ្នំពេញទៅខេត្ដ ហើយក្រោយចូលឆ្នាំមានតែអ្នកដំណើរពីខេត្ដមកភ្នំពេញប៉ុណ្ណោះ ។ អ្នកស្រីអះអាងទៀតថា នៅពេលបុណ្យចូលឆ្នាំនេះ តម្លៃសេវាចំណតរថយន្ដក៏ឡើងថ្លៃ និងត្រូវបង់លុយឲ្យសមត្ថកិច្ចនៅតាមផ្លូវច្រើនកន្លែងផងដែរ ។
អ្នកស្រី ភាត់ សុផល មានប្រសាសន៍ថា «ឡើងថ្លៃពីព្រោះមកពីផ្ទះអត់មានមនុស្សទេ មកយកមនុស្សពីនេះ(ភ្នំពេញ)ទៅវិញ...(ហើយពេលចូលឆ្នាំ)បេន(ចំណត)ឡើងថ្លៃថែមមួយម៉ឺនទៀត ។ ឡើងតែរយៈពេលប្រាំមួយថ្ងៃ មុនចូលឆ្នាំបីថ្ងៃ និងក្រោយចូលឆ្នាំបីថ្ងៃ» ។
ទោះយ៉ាងណា មន្ដ្រីសណ្ដាប់ធ្នាប់នៅសង្កាត់ស្រះចកដែលមានតួនាទីប្រមូលថវិកាពីម្ចាស់រថយន្តឈ្នួលនៅតាមចំណតក្នុងសង្កាត់នេះ លោក ញឹក កុសល អះអាងថា ចំណតរថយន្ដឈ្នួលក្នុងសង្កាត់លោកមិនកំណត់ថ្លៃចំពោះការចតរថយន្តឈ្នួលឡើយ ពោលគឺការប្រមូលថវិកាពីតាក់ស៊ីនីមួយៗ អាស្រ័យលើការផ្ដល់ឲ្យរបស់ម្ចាស់រថយន្តប៉ុណ្ណោះ ។
លោក ញឹក កុសល អះអាងថា «ចំពោះបេន (ចំណត) ខ្ញុំមិនអាចឡើង (ថ្លៃ) បានទេ ព្រោះបេន (ចំណត) ខ្ញុំមិនមែនកំណត់ជាបេនអាជីវកម្មរបស់ឯកជនហ្នឹង តាមខ្ញុំជាប្រជាការពារ ឬសណ្ដាប់ធ្នាប់ស្រះចកហ្នឹង រៀបចំឡើងដើម្បីកុំឲ្យកកស្ទះទៅ ជួនកាលពេញ (អ្នកដំណើរក្នុងរថយន្ដ) ទៅគេឲ្យមួយម៉ឺន ជួនអត់ពេញ(អ្នកដំណើរក្នុងរថយន្ដ) គេឲ្យតាមហ្នឹងទៅ ជួនកាល ២០០០ក៏មាន ៣០០០ក៏មាន» ។
គួររំឮកថា ក្នុងពិធីដាក់សម្ពោធស្ពានអ្នកលឿងកាលពីដើមសប្ដាហ៍នេះ លោកនាយករដ្ឋមន្ត្រី ហ៊ុន សែន អំពាវនាវកុំឲ្យម្ចាស់រថយន្តឈ្នួលទាំងអស់ដំឡើងថ្លៃរថយន្ត ដើម្បីឲ្យប្រជាពលរដ្ឋ ជាពិសេសកម្មករ កម្មការិនី អាចធ្វើដំណើរទៅលេងស្រុកកំណើតបាន ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ លើកឡើងថា ការអំពាវនាវនេះមិនដែលមានប្រសិទ្ធភាពនោះទេ ដោយលោកស្នើឲ្យរដ្ឋាភិបាលគួរចាត់ជាវិធានការ ច្បាស់លាស់ ។
ទោះយ៉ាងណា អ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ីមសុរិយា មានប្រសាសន៍ថា ក្រសួងបានត្រឹមតែប្រជុំណែនាំ និងសំណូមពរដល់ម្ចាស់ក្រុមហ៊ុនរថយន្តកុំឲ្យដំឡើងថ្លៃប៉ុណ្ណោះ ។ លោកថា ក្នុងសង្គមប្រជាធិបតេយ្យក្រុមហ៊ុនឯកជនជាអ្នកកំណត់តម្លៃទៅលើសេវាកម្មរបស់ខ្លួន ៕
No comments:
Post a Comment