ក្រសួងមហាផ្ទៃ អនុញ្ញាតឲ្យចលនាអំណាចពលរដ្ឋខ្មែររបស់ លោក សួន សេរីរដ្ឋា បង្កើតគណបក្សនយោបាយ ដើម្បីចូលរួមប្រកួតប្រជែងក្នុងការបោះឆ្នោតនៅកម្ពុជា។
ក្នុងលិខិតផ្ញើទៅកាន់ លោក សួន សេរីរដ្ឋា ប្រធានចលនាអំណាចពលរដ្ឋខ្មែរ និងជាតំណាងស្ថាបនិកគណបក្សអំណាចខ្មែរ ចុះថ្ងៃទី៦ ខែមីនា រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាក់ប្រាប់ លោក សួន សេរីរដ្ឋា ថា ក្រសួងមហាផ្ទៃ បានទទួលរួចហើយនូវសេចក្តីជូនដំណឹងស្ដីពីការស្នើសុំបង្កើតគណបក្សអំណាចខ្មែរ។ ប៉ុន្តែ លោក ស ខេង បញ្ជាក់ថា ដើម្បីទទួលបានសុពលភាព គណបក្សអំណាចខ្មែរ ត្រូវបំពេញបែបបទ និងលក្ខខណ្ឌមួយចំនួនទៀតឲ្យស្របតាមច្បាប់ស្ដីពីគណបក្សនយោបាយ។
ចំណែកពីខាង លោក សួន សេរីរដ្ឋា វិញ លោកសម្ដែងការសប្បាយចិត្តនៅពេលទទួលបានដំណឹងពីក្រសួងមហាផ្ទៃ បែបនេះ។ ថ្លែងក្នុងលិខិតចំហទៅកាន់អ្នកគាំទ្ររបស់ខ្លួន នៅថ្ងៃទី៦ មីនា លោក សួន សេរីរដ្ឋា បញ្ជាក់ថា គណបក្សអំណាចខ្មែរ នឹងធ្វើការបំពេញបែបបទជំហានទី២ ដាក់ចូលក្រសួងមហាផ្ទៃ ឲ្យបានឆាប់ ដើម្បីដាក់ដំណើរការទីស្នាក់ការកណ្ដាលនៅក្រុងភ្នំពេញ ព្រមទាំងការិយាល័យសាខាបក្សនៅតាមបណ្ដាខេត្ត-ក្រុងនានា។
ការប្រកាសរបស់ក្រសួងមហាផ្ទៃ អនុញ្ញាតឲ្យ លោក សួន សេរីរដ្ឋា អាចបង្កើតគណបក្សនយោបាយនៅពេលនេះ ធ្វើឡើងប្រមាណ ២ខែប៉ុណ្ណោះ បន្ទាប់ពីសាលាដំបូងរាជធានីភ្នំពេញ កាត់ទោស លោក សួន សេរីរដ្ឋា ឲ្យជាប់ពន្ធនាគារចំនួន ៧ឆ្នាំ ពីបទពាក់ព័ន្ធនឹងរួមគំនិតក្បត់ជាតិ។ ចំណែកបក្ខពួករបស់ លោក សួន សេរីរដ្ឋា ៣នាក់ផ្សេងទៀត ក៏ត្រូវបានតុលាការផ្ដន្ទាទោសដាក់ពន្ធនាគារពី ៥ ទៅ ៦ឆ្នាំ ពីបទរួមគំនិតក្បត់ជាតិដូចគ្នា។
លោក សួន សេរីរដ្ឋា ដែលសព្វថ្ងៃកំពុងរស់នៅក្រៅប្រទេស ធ្លាប់បញ្ជាក់ប្រាប់វិទ្យុអាស៊ីសេរី ថា លោកនឹងធ្វើដំណើរចូលមកកម្ពុជា នៅពេលដែលរដ្ឋាភិបាលរបស់លោកនាយករដ្ឋមន្ត្រី ហ៊ុន សែន អនុញ្ញាតឲ្យចលនារបស់លោកបង្កើតគណបក្សនយោបាយរួចហើយនោះ៕
No comments:
Post a Comment