លោក អ៊ុំ សំអាន បានឲ្យដឹងកាលពីថ្ងៃអង្គារថា ចំណាររបស់លោក ហេង សំរិន ប្រធានរដ្ឋសភា គឺជាទង្វើផ្ទុយពីរដ្ឋធម្មនុញ្ញ ត្រង់មាត្រា ៩៦ ដែលតម្រូវឲ្យសំណើរបស់តំណាងរាស្ត្រ តាមរយៈប្រធានរដ្ឋសភា ត្រូវបញ្ជូនទៅរដ្ឋាភិបាល ឲ្យឆ្លើយតបក្នុងរយៈពេល ៧ថ្ងៃ។ កាលពី ថ្ងៃទី៣ ខែមីនា លោក អ៊ុំ សំអាន បានផ្ញើលិខិតជូនលោកនាយករដ្ឋមន្ត្រី ហ៊ុន សែន តាមរយៈប្រធានរដ្ឋសភា ដើម្បីស្នើសុំ «បញ្ឈប់កិច្ចសន្យាសម្បទានឲ្យ ក្រុមហ៊ុន សុខា អូតែល របស់ឧកញ៉ា សុខ គង់ ក្នុងការប្រមូលចំណូលពីការលក់ប័ណ្ណឲ្យភ្ញៀវទេសចរបរទេសចូលទស្សនាអង្គរ»។
លោកបានស្នើឲ្យដាក់អាជ្ញាធរអប្សរាស្ថិតក្រោមក្រសួងទេសចរណ៍ និងបើកឲ្យមានការដេញថ្លៃលើការលក់សំបុត្រ ពីក្រុមហ៊ុនផ្សេងៗ ដោយតម្លាភាព។ តំណាងរាស្ត្របក្សប្រឆាំងរូបនេះបានគូសបញ្ជាក់ថា ក្រុមហ៊ុននេះបានធ្វើឲ្យបាត់ចំណូលជាតិហើយអាជ្ញាធរអប្សរាដែលផ្តល់សិទ្ធិឲ្យក្រុមហ៊ុនលោក សុខ គង់ មិនបានបញ្ជាក់ពីតួលេខច្បាស់លាស់នូវចំនួនភ្ញៀវបរទេស ដែលបានទិញប័ណ្ណចូលទស្សនាអង្គរនិងប្រាក់ចំណូលពីការលក់ប័ណ្ណឡើយ។
លោក ហេង សំរិន បានចារលើលិខិតស្នើមួយនេះ ចុះ ថ្ងៃទី៩ ខែមីនា ហើយបញ្ជូនមកលោក អ៊ុំ សំអាន វិញដោយសរសេរថា៖ «ខ្ញុំថាកិច្ចការនេះ ទុកឲ្យគណៈកម្មការសេដ្ឋកិច្ច ហិរញ្ញវត្ថុ ធនាគារនិងសវនកម្ម នៃរដ្ឋសភា ជាអ្នកធ្វើវិញ»។
លោក សំអាន ថ្លែងថា៖ «ប្រធានរដ្ឋសភា គាត់មិនបានស៊ីញ៉េ និងវ៉ៃត្រាបញ្ជូនទៅលោកនាយករដ្ឋមន្ត្រីឲ្យខ្ញុំទេ។ នេះខុសនីតិវិធី។ យើងដឹងហើយថា គណៈកម្មការ ទី២ ដឹកនាំដោយលោក ជាម យៀប មកពីគណបក្សប្រជាជន...អ៊ីចឹងធ្វើម៉េចគាត់ទៅធ្វើកិច្ចការហ្នឹងទៅ?»។
លោកបន្តថា៖ «ខ្ញុំគ្រោងសរសេរពាក្យបណ្តឹង ទៅក្រុមប្រឹក្សាធម្មនុញ្ញ ដើម្បីឲ្យបដិសេធចំណារលោក ហេង សំរិន និងសុំឲ្យក្រុមប្រឹក្សាធម្មនុញ្ញ បកស្រាយពីមាត្រា ៩៦ ថាតើប្រធានសភា មានសិទ្ធិបដិសេធលិខិតតំណាងរាស្ត្រ ដោយមិនបញ្ជូនទៅអ៊ីចឹងដែរឬ?»។
លោក អ៊ុំ សំអាន បានលើកឡើងថា ការគ្រប់គ្រងមិនច្បាស់លាស់ពីការលក់ប័ណ្ណចូលតំបន់អង្គរ គឺជាអំពើពុករលួយ ឃុបឃិតគ្នា ធ្វើឲ្យបាត់ចំណូលជាតិ ដែល «គណបក្សប្រជាជនមិនអើពើបញ្ឈប់ ដើម្បីឲ្យក្រុមហ៊ុនដទៃទៀត ដេញថ្លៃតាមទីផ្សារសេរី ប្រកបដោយតម្លាភាពឡើយ»។
បើតាមលោក សំអាន កាលពីមុនចំណូលប្រមូលបានពីភ្ញៀវបរទេស ចូលទស្សនាប្រាសាទអង្គរ និងការចំណាយលម្អិតផ្សេងៗទៀត ត្រូវបានលាក់បាំង បើទោះបីជារដ្ឋសភា បានធ្វើការសួរដេញដោលបន្តបន្ទាប់ក្តី។ ប៉ុន្តែក្នុង ខែមករា និង ខែកុម្ភៈ ២០១៥ នេះចំណូលប្រចាំខែនីមួយៗត្រូវបានអាជ្ញាធរអប្សរា បានបញ្ចេញឲ្យដឹងជាផ្លូវការ។
លោក សំអាន បានកត់ត្រា របាយការណ៍អាជ្ញាធរអប្សរា ថា ភ្ញៀវចូលទស្សនាអង្គរ មានចំនួនជាង ២,៣ លាននាក់ ក្នុង ឆ្នាំ២០១៤ ដែលបានលក់ប័ណ្ណមានទឹកប្រាក់ ៥៩ លានដុល្លារអាមេរិក។
អ្នកនាំពាក្យរដ្ឋសភា លោក ឈាង វុន និងប្រធានគណៈកម្មការ ទី២ លោក ជាម យៀប មិនអាចទាក់ទងសុំការអធិប្បាយបានទេ។ ចំណែកលោកស្រី ចៅស៊ុន កិរិយា អ្នកនាំពាក្យអាជ្ញាធរអប្សរា ក៏ទាក់ទងមិនបានផងដែរ។
យ៉ាងណាក្តីលោក សួស យ៉ារ៉ា អ្នកនាំពាក្យគណបក្សប្រជាជន បានថ្លែងថា ការងាររបស់អាជ្ញាធរអប្សរា គួរតែពាក់ព័ន្ធរដ្ឋាភិបាល ព្រោះកិច្ចការជាតិនិងកិច្ចការគណបក្សគឺខុសគ្នា មិនអាចចេះតែធ្វើការចោទប្រកាន់បានទេ។
តែលោកនិយាយថា៖ «ពាក់ព័ន្ធនឹងតម្លាភាព និងភាពត្រឹមត្រូវ យើងយល់ថា មន្ត្រីគណបក្សទៅធ្វើការគឺតែងទទួលខុសត្រូវមុខច្បាប់ដូច្នេះការងារមួយចំនួនដែលទាក់ទងចំណូល យើងមានអង្គភាពអូឌីត (សវនកម្ម) ដែលធ្វើកិច្ចការជាប្រចាំ»៕
No comments:
Post a Comment