ក្រសួងមហាផ្ទៃសម្រេចទទួលស្គាល់ និងផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍វៀតណាមសរុប១៥៥នាក់ នៅខេត្តព្រះសីហនុ។
ការប្រកាសទទួលស្គាល់ជនអន្តោប្រវេសន៍វៀតណាមបន្ថែមនិងការចែកប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខាងលើនេះធ្វើឡើងនៅស្នងការដ្ឋាននគរបាលខេត្តព្រះសីហនុ កាលពីព្រឹកថ្ងៃទី២៧ ខែកុម្ភៈ ឆ្នាំ២០១៥ម្សិលមិញ ដោយមានការចូលរួមពីលោក ហែម ថេង អគ្គនាយករង នៃអគ្គនាយកដ្ឋាននគរបាលអន្តោប្រវេសន៍ និងលោក ហេង សំអាន អភិបាលរងខេត្តព្រះសីហនុ រួមជាមួយ ជនជាតិវៀតណាមច្រើននាក់ទៀត ។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកលោក នី ចរិយា យល់ថា ការទទួលស្គាល់ និងផ្តល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍វៀតណាមនោះ លុះត្រាតែផ្អែកតាមមូលដ្ឋានច្បាស់លាស់និងស្របច្បាប់។ ទោះយ៉ាងណាលោកបញ្ជាក់ថា តាមច្បាប់អ្នកដែលមកស្នាក់នៅបណ្តោះអាសន្ន ឬស្នាក់នៅអចិន្ត្រៃយ៍ ដែលមិនមានសញ្ជាតិខ្មែរ គឺមិនមានសិទ្ធិបោះឆ្នោតទេ ។
កាលពីថ្ងៃទី១ ខែវិច្ឆិកា ឆ្នាំ២០១៣ ស្នងការដ្ឋាននគរបាលខេត្តព្រះសីហនុ បានអនុវត្តន៍តាមការណែនាំរបស់ក្រសួងមហាផ្ទៃ ដោយប្រកាសទទួលស្គាល់ជនអន្តោប្រវេសន៍វៀតណាមចំនួន៣៦១នាក់ ដែលមានស្ត្រី១៩៣នាក់ ប្រុស១៨៦នាក់។ ចំណែកលើកទី២នេះ ស្នងការដ្ឋាននគរបាលខេត្តព្រះសីហនុ បានអនុវត្តន៍តាមការណែនាំរបស់ក្រសួងមហាផ្ទៃដដែល ដោយប្រកាសទទួលស្គាល់ជនអន្តោប្រវេសន៍វៀតណាមបន្ថែមចំនួន៧៦នាក់ និងបានចែកប័ណ្ណស្នាក់នៅអចិន្ត្រៃយ៍ជូនជនអន្តោប្រវេសន៍វៀតណាមនោះចំនួន៧៩នាក់ទៀត ដោយមានស្ត្រី៤១នាក់ ប្រុស៣៨នាក់ ៕
.jpg)
No comments:
Post a Comment