ស្តាប់សំឡេង៖ |
ចម្លងទុក |
អគ្គមេបញ្ជាការរងកងយោធពលខេមរភូមិន្ទនិងជាតំណាងគណៈមេបញ្ជាការឯកភាពសមរភូមិប្រាសាទព្រះវិហារ លោក ជា តារា នៅថ្ងៃពុធនេះ បានប្រកាសថាកងទ័ពជាមនុស្សរបស់គណបក្សប្រជាជនកម្ពុជា ក្រោមហេតុផលថាលោកនាយករដ្ឋមន្រ្តី ហ៊ុន សែន ជាអ្នកថែរក្សាពួកគេ។
លោក ជា តារា បានថ្លែងបែបនេះនៅក្នុងសិក្ខាសាលាស្ដីពីសម្ព័ន្ធមេត្រីភាពរវាងអង្គភាពកងទ័ព កងនគរបាលជាតិជាមួយស្ថាប័នអង្គភាពស៊ីវិល នៅវិមានសន្តិភាព ដែលមានការចូលរួមពីលោកស្រីម៉ែន សំអន រដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច មេបញ្ជាការកងរាជអាវុធហត្ថ លោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ លោក ហ៊ីង ប៊ុនហៀង និងមន្រ្តីជាន់ខ្ពស់របស់រដ្ឋាភិបាលមួយចំនួនទៀត។
លោក ជា តារា បានថ្លែងថាកងទ័ពមានតួនាទីក្នុងការការពាររដ្ឋធម្មនុញ្ញ ព្រះមហាក្សត្រនិងរដ្ឋាភិបាលស្រច្បាប់ ហើយប្រឆាំងដាច់ខាតនឹងបដិវត្តន៍ពណ៌។ លោកបានលើកឡើងពីប្រសាសន៍របស់នាយករដ្ឋមន្រ្តី និងបានថ្លែងបញ្ជាក់ថា៖”…ប៉ុន្តែកងទ័ពនៅមានភារកិច្ចមួយទៀត សម្តេចតេជោទើបមានប្រសាសន៍ ហើយប្រសាសន៍នេះចងចាំតាំងពីយូរហើយ ថ្ងៃទី២៣(ខែកក្កដា) កងទ័ព បើនិយាឲ្យចំកងទ័ពម្នាក់ជារបស់ប្រជាជន របស់គណបក្សប្រជាជន ពីព្រោះសម្តេចតេជោជាអ្នកចិញ្ចឹមបីបាច់ថែរក្សា ដឹកនាំ បញ្ជាកងទ័ព។ កងទ័ពគឺជាកងទព័របស់គណបក្សប្រជាជន និយាយឲ្យស្មោះត្រង់ហ្មង”។
លោក ជា តារា បានបញ្ជាក់បន្ថែមពាក់ព័ន្ធនឹងការបង្រ្កាបអ្នកធ្វើឲ្យមានបដិវត្តន៍ពណ៌ថា៖”មិនបាច់ចាំបាច់ប្រើបេអឹម មិនបាច់ប្រើរថក្រោះទេ ប្រើតែព្រនង់ក៏រត់អត់រួចដែរ”។
កាលពីថ្ងៃទី២៣ខែកក្កដា ក្នុងពិធីជួបសំណេះសំណាលជាមួយកងកម្លាំងប្រដាប់អាវុធនិងមន្ត្រីរាជការប្រមាណ៥ពាន់នាក់ មកពីបណ្តាអង្គភាពនានានៅទូទាំងប្រទេស លោក ហ៊ុន សែន បានបញ្ជាឲ្យប្រឆាំងដាច់ខាតនឹងបដិវត្តន៍ពណ៌។
ប្រធានស្ថាប័នស្រាវជ្រាវវេទិកាអនាគតនិងជាអ្នកវិភាគឯករាជ្យ លោក អ៊ូ វីរៈ យល់ថាការថ្លែងរបស់លោក ជា តារា ផ្ទុយនឹងរដ្ឋធម្មនុញ្ញនិងអាចជាសញ្ញានៃអស្ថិរភាពសម្រាប់ប្រទេសកម្ពុជាទៅថ្ងៃខាងមុខ។ លោកបញ្ជាក់ថា៖“ជារឿងអធម្មនុញ្ញ ជារឿងបណ្តាលឲ្យគ្រោះថ្នាក់ ជារឿងបណ្តាលឲ្យអស្ថិរភាពដល់ប្រទេសជាតិ។ ការប្តេជ្ញាចិត្តបែបហ្នឹងគឺជារឿងគ្រោះថ្នាក់ណាស់ រឿងអស្ថិរភាពដោយសារវាធ្វើឲ្យផ្នត់គំនិតកងទ័ពមានចែកជាបក្សជាពួក ហើយនៅពេលណាមានជាបក្សជាពួក ត្រូវមានយន្តការបក្សពួកដទៃ ប៉ះទង្គិចគ្នា ធ្វើសង្រ្គាមស៊ីវិលទៀតហើយ”។ លោកចាត់ទុកការថ្លែងបែបនេះមិនមានផលប្រយោជន៍សម្រាប់ប្រទេសជាតិ។ លោកបារម្ពពីស្ថានការណ៍ក្រោយការបោះឆ្នោតឆ្នាំ២០១៨ ដែលអាចមានអស្ថិរភាពក្នុងប្រទេស។
អ្នកនាំពាក្យគណបក្សសង្រ្គោះជាតិ លោក យ៉ែម បុញ្ញឫទ្ធិ មានប្រសាសន៍ថាលោកមានការសោកស្តាយចំពោះការថ្លែងនេះ ដោយអំពាវនាវឲ្យមានការបែកចែកអ្វីទៅជានាយករដ្ឋមន្រ្តី អ្វីទៅជាជាតិនិងអ្វីទៅដែលហៅថាបក្ស។ លោកស្នើឲ្យគណបក្សកាន់អំណាចពន្យល់ថ្នាក់ដឹកនាំគ្រប់រូបពីអត្ថន័យទាំងនេះ។លោកបន្តថាប្រសិនបើគណបក្សសង្រ្គោះជាតិឈ្នះការបោះឆ្នោតនៅឆ្នាំ២០១៨ នឹងមិនមានអស្ថិរភាពក្នុងប្រទេសនោះទេ ដោយសារប្រជាជនជាអ្នកផ្តល់អំណាចដល់គណបក្សណាមួយ។ លោកបញ្ជាក់ថា៖”ខ្ញុំមិនគិតដូច្នោះទេ ពីព្រោះស្ថិតទៅលើប្រជាពលរដ្ឋដែលជាអ្នកម្ចាស់អំណាច ម្ចាស់ឆ្នោត នៅពេលដែលលោកប្រគល់ទៅគណបក្សណាមួយ ពេលនោះគាត់នឹងការពារកម្លាំងសំឡេងឆ្នោតរបស់គាត់”។
គួររំឭកថា កាលពីថ្ងៃទី០១ខែកុម្ភៈ ឆ្នាំ២០១៥ មហាសន្និបាតវិសាមញ្ញរបស់គណបក្សប្រជាជនកម្ពុជាបានសម្រេចបន្ថែមសមាជិកថ្មី៣០៦រូប ដែលក្នុងនោះមានមេទ័ព នគរបាលនិងកងរាជអាវុធហត្ថប្រមាណ៨០រូប។ អង្គការសិទ្ធិមនុស្សអន្តរជាតិដែលមានមូលដ្ឋាននៅសហរដ្ឋអាមេរិក(HRW)បានរិះគន់ការបន្ថែមសមាជិកបក្សជាមេទ័ព នគរបាលនិងកងរាជអាវុធហត្ថ ថានឹងនាំឲ្យមានការរំលោភសិទ្ធិមនុស្ស ទំនាស់ផលប្រយោជន៍និងនិទណ្ឌភាពទៅថ្ងៃខាងមុខ៕
No comments:
Post a Comment