ប្រភពពីមន្ត្រីតុលាការបានអោយ «អង្រុត» ដឹងថា ថោង សារ៉ាត់ និងឪពុកម្តាយអាចនឹងត្រូវដោះលែងអោយនៅក្រៅឃុំបណ្តោះអាសន្នស្ថិតក្នុងការឃ្លាំមើលរបស់តុលាការអំឡុងពេលប្រកាសសាលក្រមនៅថ្ងៃចន្ទខាងមុខនេះ ពីព្រោះសំណុំរឿងនេះមានមន្ត្រីជាន់ខ្ពស់លំដាប់ផ្កាយនៅកម្ពុជាបានរត់ការខ្វែងដៃខ្វែងជើងដោយសុំ
អន្តរាគមន៍ទៅមន្ត្រីជាន់ខ្ពស់រាជរដ្ឋាភិបាលផងដែរ ។
ម្យ៉ាងវិញទៀតនៅក្នុងសវនាការជាង៤ម៉ោងកាលពីថ្ងៃទី២០ ឧសភា កន្លងមក ឧកញ៉ាថោង សារ៉ាត់ ដែលត្រូវចោទប្រកាន់ពីបទផ្តើមគំនិតគិតទុកជាមុនក្នុងការបាញ់សម្លាប់លោកឧកញ៉ាអ៊ឹង ម៉េងជឺ កាលពីយប់ថ្ងៃទី២២ វិច្ឆិកា ២០១៤ នោះ បានបដិសេធចំពោះការចោទប្រកាន់ និងច្រានចោលការកាន់កាប់អាវុធខុសច្បាប់នោះថែមទៀត ។
ចំណែកលោកថោង ចំរើន និងលោកស្រីកែវ សារី ជាឪពុកម្តាយថោង សារ៉ាត់ នោះវិញក៏បានបដិសេធការចោទប្រកាន់ពីបទលាក់ទុកអាវុធខុសច្បាប់នោះផងដែរ ។ ផ្ទុយទៅវិញនៅក្នុងសវនាការ លោកស្រីកែវ សារី បានអះអាងថា លោកស្រីមានកាំភ្លើង២ដើម និងមានលិខិតអនុញ្ញាតត្រឹមត្រូវ ។
លើសពីនេះទៀត នៅក្នុងសវនាការកាលពីថ្ងៃទី២០ ឧសភា ដដែលនោះ លោកឧត្តមសេនីយ៍ទោមាស វណ្ណា នាយករងខុទ្ទកាល័យក្រសួងការពារជាតិបាននិយាយថា ក្រសួងបានចេញអាជ្ញាប័ណ្ណកាំភ្លើងចំនួន៩ដើមជូនលោកថោង សារ៉ាត់ កាលពីខែមិថុនា ២០១៤ និង២ដើមទៅលោកថោង ចំរើន និងលោកស្រីកែវ សារី សម្រាប់បំពេញបេសកកម្ម ។
លោកផ្កាយ២មាស វណ្ណា បានបន្តថា «លិខិតអនុញ្ញាតប្រើប្រាស់កាំភ្លើងទាំង១១ដើមនេះនៅមានសុពលភាពនៅឡើយសម្រាប់បំពេញបេសកកម្មអោយក្រសួង ប៉ុន្តែខ្ញុំមិនអាចបញ្ជាក់លើសពីនេះទេ ព្រោះជាការសម្ងាត់របស់ជាតិ» ។ ដូច្នេះពិតណាស់ហេតុផលខាងលើចៅក្រមនឹងអាចអនុញ្ញាតអោយថោង សារ៉ាត់ និងឪពុកម្តាយនៅក្រៅឃុំបណ្តោះអាសន្ន តែស្ថិតក្នុងការត្រួតពិនិត្យរបស់តុលាការ ។
យ៉ាងណាក៏ដោយក្រុមអ្នកតាមដានស្ថានការណ៍សង្គមនៅកម្ពុជាបានលើកឡើងថា សំណុំរឿងនេះវាគ្មានអ្វីអាថ៌កំបាំង និងមិនលំបាកគិតនោះទេ ព្រោះស្រុកខ្មែរគេអាចកែប្រែ ឬបង្កើតសំណុំរឿងក្លែងក្លាយបានតាមចិត្ត អោយតែមានលុយ និងអំណាច ។ ម្យ៉ាងទៀតមានហេតុផលអ្វីបានជាពេលសមត្ថកិច្ចរកឃើញកាំភ្លើងនៅក្នុងបុរី៩៩៩របស់ថោង សារ៉ាត់ បែរជាថោង សារ៉ាត់ និងឪពុកម្តាយមិនបង្ហាញលិខិតស្នាមភ្លាមៗ ដូចការលើកឡើងក្នុងសវនាការរបស់លោកផ្កាយ២មាស វណ្ណា ចាំបាច់អីមកនិយាយថា កាំភ្លើង១១ដើមដែលសមត្ថកិច្ចរកឃើញមានលិខិតអនុញ្ញាតត្រឹមត្រូវទៅវិញ ។
មួយវិញទៀតករណីដូចគ្នានេះគឺសំណុំរឿងលោកឈឿន វណ្ណថន ហៅម៉ៅ អតីតប្រធានអង្គរក្សលោកជា ស៊ីម ដែលរងការចោទប្រកាន់ពីបទលាក់ទុកអាវុធខុសច្បាប់ និងលោកឈឿន វណ្ណថន មានឋានៈដល់ទៅផ្កាយ៣ មេអង្គរក្សប្រធានគណបក្សប្រជាជនកម្ពុជានោះ បែរជានៅក្នុងគុកទៅវិញ ឬសំណុំរឿងនេះជាការប៉ែងជើងគ្នារវាងលោកហ៊ុន សែន និងលោកជា ស៊ីម ។
យ៉ាងណាក៏ដោយ អ្នកអាន និង «អង្រុត» ចាំឃ្លាំមើលទាំងអស់គ្នាថា តើ ថោង សារ៉ាត់ និងឪពុកម្តាយ នឹងត្រូវដោះលែងអោយនៅក្រៅឃុំ ឬយ៉ាងណា? ។
ដោយឡែកប្រភពច្បាស់ការណ៍មួយបានបង្ហើបអោយដឹងថា ប្រសិនបើថោង សារ៉ាត់ និងឪពុកម្តាយនឹងត្រូវដោះលែងមែន ពួកគេនឹងចេញទៅរស់នៅសហរដ្ឋអាមេរិកថែមទៀតផង ៕
No comments:
Post a Comment