លោកឧត្តមសេនីយ៍ ខេង ទីតូ អ្នកនាំពាក្យនៃកងរាជអាវុធហត្ថលើផ្ទៃប្រទេសបាន ប្រាប់ភ្នំពេញប៉ុស្តិ៍តាមទូរស័ព្ទថា លោក អំាង មាលតី ត្រូវអង្គភាពប្រឆាំងអំពើពុករលួយឃាត់ខ្លួននៅក្នុងអង្គភាពនេះតែម្តង បន្ទាប់ពីបានបញ្ចប់ការសាកសួររូបគាត់កាលពីរសៀលថ្ងៃពុធម្សិលមិញ។
លោក ខេង ទីតូ បញ្ជាក់ថា៖ «បច្ចុប្បន្ននេះលោក អំាង មាលតី កំពុងត្រូវឃុំខ្លួនជាបណ្តោះអាសន្ន នៅឯអង្គភាពប្រឆាំងអំពើពុករលួយនិងត្រៀមបញ្ជូនទៅសាលាដំបូងរាជធានីភ្នំពេញនៅថ្ងៃព្រហស្បតិ៍នេះ»។
ទាក់ទងទៅនឹងករណីនេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) និងលោក កែវ រ៉េមី អ្នកនាំពាក្យអង្គភាពនេះមិនអាច ទាក់ទងសុំបញ្ជាក់ព័ត៌មាននេះបានឡើយ កាលពីម្សិលមិញ។
ក៏ ប៉ុន្តែលោក ឱម យ៉ិនទៀង បានសរសេរក្នុង WhatsApp ផ្ទាល់ខ្លួនផ្សព្វផ្សាយជាសាធារណៈកាលពីម្សិលមិញថា៖ «ACU បានកោះហៅលោក អាំង មាលតី មកបំភ្លឺតាំងពីថ្ងៃម្សិលមិញមកម្ល៉េះ។ ២ថ្ងៃនេះ ACU យល់ថា មិនទាន់គ្រប់គ្រាន់ទេ ហើយ ACU ត្រូវការជួបនិងស្តាប់ការបំភ្លឺពីលោក អាំង មាលតី ច្រើនដងទៅមុខទៀត»។
ទាក់ទងនឹងករណីនេះ លោក អំាង មាលតី និងមេធាវីការពារក្តី មិនអាចទាក់ទងដើម្បីសុំការបំភ្លឺបានឡើយ។
គួររំឭកថា លោក អាំង មាលតី ត្រូវបានដកចេញពីប្រធានសាលាដំបូងរាជធានីភ្នំពេញ កាលពីរសៀលថ្ងៃទី១៨ ខែកុម្ភៈ និងត្រូវផ្ទេរភារកិច្ចមកក្រសួងយុត្តិធម៌ក្រោយពីមានប្រតិកម្មពីលោកនាយករដ្ឋមន្ត្រី ហ៊ុន សែន ពាក់ព័ន្ធនឹងសំណុំរឿងដោះលែងឪពុកម្តាយលោកឧកញ៉ា ថោង សារ៉ាត់។
ក្រោយការដកហូតពីប្រធានសាលាដំបូងរាជធានី ក៏លេចធ្លាយរឿងរ៉ាវយករថយន្តជាវត្ថុតាងក្នុងបទល្មើសផ្សេងៗជាច្រើនគ្រឿង ទៅឲ្យមនុស្សជំនិតលោក មាន លោកឧត្តមសេនីយ៍ ពេជ្រ ព្រហ្មមុនី និងកូនប្រុសឈ្មោះ អាំង មុនី ជាអធិការរងខណ្ឌ៧មករាប្រើប្រាស់ផ្ទាល់ខ្លួនទៀតនៅពេលយករថយន្តទាំងនោះប្រគល់ឲ្យសាលាដំបូងរាជធានីភ្នំពេញវិញ។
ថ្មីៗនេះ ជនជាប់ចោទនៅក្នុងសំណុំរឿងពុករលួយដែលពាក់ព័ន្ធនឹងករណីកាប់រានដីព្រៃរបស់រដ្ឋនៅក្នុងខេត្តបន្ទាយមានជ័យក៏បានដាក់ពាក្យប្តឹងលោក អាំង មាលតី អំពីទង្វើមិនប្រក្រតីនិងរំលោភច្បាប់ ប្រឌិតបំភ្លៃអង្គហេតុ ភ័ស្តុតាង បំពានបទចោទនានាជាច្រើន មកលោកនាយករដ្ឋមន្ត្រីអន្តរាគមន៍ថែមទៀត។
លោក អាំង មាលតី កាលនៅជាប្រធានសាលាដំបូងបន្ទាយមានជ័យ (ពីឆ្នាំ ២០០៧ ដល់ឆ្នាំ ២០១៤) ក៏ធ្លាប់មានរឿងអាស្រូវប៉ះទង្គិចគ្នាជាមួយអាជ្ញាធរខេត្តរហូតលោក អ៊ុង អឿន អតីតអភិបាលខេត្តបន្ទាយមានជ័យ សរសេរលិខិតផ្លូវការជូនលោកនាយករដ្ឋមន្ត្រី ហ៊ុន សែន ស្នើឲ្យផ្ទេរភារកិច្ចលោកចៅក្រម អាំង មាលតី ចេញពីខេត្តនេះផងដែរ ហើយនៅលើលិខិតរបស់លោក អ៊ុង អឿន នោះលោក ហ៊ុន សែន ក៏បានចារបង្គាប់ឲ្យលោកទេសរដ្ឋមន្ត្រី ឱម យ៉ិនទៀង ចាត់វិធានការជាបន្ទាន់ផងដែរ។
ប៉ុន្តែ ស្ងាត់ៗក្រោយមកលោក អាំង មាលតី ស្រាប់តែត្រូវផ្ទេរមកកាន់តំណែងជាប្រធានសាលាដំបូងរាជធានីភ្នំពេញ នៅខែមេសា ឆ្នាំ ២០១៤ ទៅវិញ៕
No comments:
Post a Comment